Lukas 19
19
Selna getadin Sakeus
1Meginmeg i Jeriko panulon iduleg panu uzig ile. 2Men tamol ta made, nean Sakeus, i selna getadin, i filian. 3I Jesus nasiwoi, it tat ibol, mewoi jaeŋ funig itoz, ge inau lo tea, i tukuzanlakoi. 4Mewoi palu imugseg ja talak iduseg, melakpa i nasi gauaioi ibol. Dal egin isop ilawoi dibollak me iloŋ. 5Jesus ŋan megin isemeg, Sakeus paenlon itiuzge itad, nasig ipai, Sakeus pasak udu, ŋa gazo mok oina ablak ŋadusawoi. 6I pasak idug zigezigemeg duzig inan ablak dile. 7Daŋan i me denasig duŋuzuz, aupasekbibian izinnen iduselakoi.#Luk 5:30; 15:2 8Ge Sakeus imaisge Ujanzen ipai, Ujazen, uloŋ, ŋainag jes ŋepezezeŋanep malan ta tamol waiz ŋipinidinoi; ŋa aenta nadin jes se gegaunlon ŋiwizidinlak me mon palpal ŋipinidinoi.#Ekso 21:37 9Mug Jesus i ipai, Gazo ab e inangaz abaŋ gauai deyalelak, i mai Abraham inan ai talakoi.#Luk 13:16 10Tamolai mewoi iselak, tamolpain depadallak bezanap itoz, iŋalpa putudin pasiwoi.#Luk 5:32; Tim I 1:15
Kiŋ ta inan jes begabeg nimadinlon se inau
11Tamolpain megin inan azu diloŋmeg i azu faŋanfaŋan ta pidin. I Jerusalem sizizlonlakoi tamolpain ladinlon dibol, Jesuslon Anut kiŋdom mug boboloanip itasawoi tat, dibol. 12Mewoi i ibol, Tamolujan ta dal makaiu fatu talon ile, aon kiŋ inaup imulpa isowoi ibol.#Mar 13:34 13Inan begabeg ten wigidin, disowoi ibolge dise, gaŋmalan dab 10 pinidinge pidin, Elon dadeŋ uzat anaup ilap, ŋamulpa ŋasowoi eginmap. 14Inan panugaz iwoi buzudin isag totol denaug, duzig dile, dibol, Me i amnama kiŋ madonen amoi.#Joh 1:11 15I aon kiŋ inaulag, imulge iseg, inan begabeg, get gaŋmalan pinidinlak, wigidinge disowoi ibol. I iloŋoi i saen melon gaŋmalan mai abaŋte denaulak. 16Malanmalan iseg ibol, Ujazen, oina dap taimon ŋenaugŋenaug, mug dap 10 ŋaŋallak. 17I me ipai, Es gauai, o begabeg malikdaŋan! O abaŋ mitinlon bube malikdaŋanlak, o panu ten ŋepanop o i getadin madowoi.#Luk 16:10 18Mizimu iseg ipai, Ujazen, oina dap taimon ŋenaugŋenaug, mug dap 5 ŋaŋallak. 19Me mai ipai, O megin mon panu 5 ŋepanop o getadin madowoi. 20Tol me iseg ibol, Ujazen nasi, oina gaŋmalan dap taimon panaglak ŋan ie, ŋa jamellon gauai ŋepaug dab ŋepani. 21Ŋa owoi ŋazutlak, ŋa ŋaloŋ, o tamol gegau: o so unaulak me naneume, so paelak me inan niŋon taŋeume. 22Me ipai, O ai gedagad, oina aualon pasi ŋale ŋepao: O uloŋlakge ŋa tamol gegaug, so ŋenaulak me ŋenaneŋame, so ŋepaelak me ŋetaŋeŋame ubol! 23Aitoige o inag gaŋmalan poalektamol so pinidinlak, i melon uzat denaup, meginpe ŋamulpa ŋasop subuŋan ta mai ŋaŋalpe? 24I maig ditiuzlak me ipidin, Gaŋmalan dap taimon me owozaip, ta i mug tendaŋan me ipani. 25I depai, Ujazen, i mug tendaŋan! 26Ŋa ŋepaiaŋ, Ta mug inan ien me faun ta paniwoi; ta i tealak me i jabiime mai wozaiwoi.#Luk 8:18; Mat 13:12 27Ge ŋainag agez inadin kiŋ so ŋemadowoi dibollak me aŋalpa afup dimatoi.
Jesus Jerusalemnen itaseg idule
28Azu megin daŋan ibol binilag, imaisge ileg, Jerusalemnen itasawoi ilaime. 29Ileg Betfage, Betana panu mai sizizlon, Gazeŋdid babenlon itasemeg, inan ai azugen inaug 30me pidin, Alap panu kitek ta madonen ienime, melon adulemap, doŋki nanun saseg madoime me anasiwoi, tata get fonlak so matallak me apasip duzip aso. 31Ta aŋ sidiziaŋtap, Aitoi me pasiame? an apaip, Ujanzen ŋalewoi ibol. 32Totol dileg ibollak doŋki megin denasi. 33Doŋki nanun depasimeg inan fungaz totol dipidin, Ait mon aŋ doŋki nanun aflaleame? 34I dibol, Ujanzen ŋalewoi ibol. 35Meginge i Jesus izinnen duduzig diseg, nadin jamel fonlak dozoanag, Jesus dibiseg doŋki fonlak denau. 36Ilemeg tamolpain nadin jamel dallak dozoanameg dile. 37I Gazeŋdid salo dal sazuznen ienime melak itasemeg, inan ai malanzen auadin dubufatemeg muguzuŋlon Anut kalel depani, i getget kubelmaŋau inaumeg denasilak, mewoi. 38I dibol, Biŋan tibisawoi, e i kiŋ, Ujanzen neanlon isoime! Didlon mazoz ien, inan biŋan biseg ilaime, latnen mok.#Kan 118:26; Luk 2:14 39Farisea taitai malan ilonnenge depai, Peteŋanek, o oina ai kin bebanap to diboloi. 40Ge i auadin jabig pidin, Ŋa ŋepaiaŋ, e auadin itaupe pat dibobpe.
Jesus Jerusalemoi melaun idu, pitiŋinekoi ibol
41I panu iziknen itaseg ilalemeg, iwoi itameg ibol,#Kiŋ II 8:11; Joh 11:35 42O Jerusalem, o mai gazo e ilo kankanpeges, o ait unaup mazozdaŋan madowoi! Ge megin monlakoi o naonen taonig ien.#Deut 32:29 43Ge saen ta iduwoi, oina agez disop o oina nanugaz mai tenatanlon kizikozkizikoz denaup detilianaŋoi, digilinaŋpa salosalo dububuzaŋoi. 44Au, i o pitiŋinowoi, oina nanugaz, oina mad ilonnen demadodime debetetanap petefazawoi; pat ta aenta fonlak so dibinip ienoi, me o tininenlak oina wadajabek; o saen melon Ujanzen ŋiliop nuo gauainen so uloŋoi ubollak, mewoi.#Luk 21:6
Jesus tempel kibine. Dufuniwoi dibol
45Meginlag i tempellon idule. Melon i tamolpain didad ile, didad ŋale isulusualg ditase. 46I pidin, Gazek ien: Ŋainag ab i gadiŋab, ge aŋ zuaiktamol nadin pat gogoŋ egin anaug abedanilak.#Jes 56:7; Jer 7:11
47I nalnal tempellon kagin peteŋana. Waliŋgatengaz, gazekmaŋaugaz, tamolujangaz temanig mai jaeŋ sufutanameg, dufuniwoi dibol. 48Ge denaunen tea, tamolpain daŋan inan auan diloŋmeg jitiag demade.
Currently Selected:
Lukas 19: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
