Lukas 17
17
Meglaumgaz dab naup ditozoi, aten so saewoi
1Batemeg inan meglaum pidin, Malik mok, gazop aten saeknen diduwoi, ge i tininlon me didudime iwoi waio. 2Tamol me klagunlak pat sasep mas tiglon tanipe me iwoi gauai, meginpe i mitin en ditiuzdime ta aten saenen teape.#Mat 18:6, 7 3Aŋ dab anaup amadowoi!
Faun niman panekoi
Oina tai auipastap o i gauai bebani; i tulufunip teŋaen alantap, faun mug nima panip, toanip iduwoi.#Mat 18:15 4I nal taimonlon inuo alan sewenmap, i sewenpa maip o naonen igosigostap ibol, Ŋunuo alanlak, teŋaeg alan; meginpe o faun nima panip toanip iduwoi.#Mat 18:21, 22
Ilonlon maliknenoi
5Apostelgaz Ujanzen depai, Lamalon maliknen stemanip!#Mar 9:24; Mat 17:20; 21:21 6Ujanzen auadin jabig pidin, Nami lamilon maliknen mustard patun eginpeges aŋ ja ta paip, O belemanop maslon udup utiuzoi! I nami auami uzi paniwoi.
Naonoi uzat so nauwoi!
7Aŋ it tat inan begabeg, me umlon tan puluelag dazuk tat tizinalap panulon imulp itasap ipaiwoi, Pasak usop matalpa, anaŋ wanip mado? 8Tea, i me ipaiwoi, Ŋa anaŋ ŋaniwoi, kibine panag, dizi binilap biag palup utozoi. Ŋa ŋani ŋimili binimap, aloupa o mai waniwoi. 9Abol, i begabeg me abaŋ ipailak inaulakoi, mewoi pez paniwoi tat? 10Aŋ megin mon: Aŋ paiaŋlak, uzat me dadon isag anau binilap, aŋ aboloi, Am begabeg domoma tea, am anauwoi paiamalak me mon am anaulak.
Tamol ten pizapizdaŋan
11Jerusalemnen ilemeg i fatu Samaria Galilea mai bison mon ileg itoz.#Luk 9:51; 13:22 12I panu talon idumeg tamol ten pizapizdaŋan mai naon tazetaze, i kin ibennen ditiuz.#Lew 13:45, 46 13Auadin dibiseg diwog dibol, O Jesus, maŋautamol waza, ilo penamapa, putuma pasi! 14Ilmeg pidin, Alap tinimi waliŋgaz apeteŋana! Dilemeg dallak tinidin gauai pasi.#Luk 5:11; Lew 11:2, 3 15Menen ai taimon i nasi, inan tinin kibine pasilag imulge ise, dallak auan bufateg Anut kalel panimeg ise. 16I Jesus naonnen nien funlon ibal idug pez pani. Ai me Samariawain. 17Jesus auanlon pasi ŋale, ibol, Tamol ten tea tat tinidin kibinia pasilak? Me nain ŋan? 18Tata kin so ilon isouge, i imulpa isop Anut kalel paniwoi, panu tawain e siben taimon mok mon? 19Me i ipai, Umaispa ulaŋan! Oina ilolon maliknen o tini bas panolak.#Luk 7:50
Anut kiŋdom idunen, Tamolai imulpa isonen azu.
20Santa fariseagaz i desedazemeg depai, Anut kiŋdom saŋeptap iduwoi? I auadin jabi pidinge ibol, Anut kiŋdom barabara egin so iduwoi.#Joh 18:36 21So taboloi, En ien, aon ien. Aloŋ, Anut kiŋdom mug aŋ leŋamilon ienime.#Mat 24:23
22Batemeg inan meglaum pidin, Nal disowoi, melon aŋ Tamolai inan nal taimon mon anasiwoi akumeame; ge so anasiwoi. 23Meginpe aŋ depaiaŋoi, En nasi! Aon nasi! Ge aŋ so ale mon, uzi mai so pinidin mon!#Luk 21:8 24Lelei didlak u ibolge itaselak, sepetadeime egin, enge men ilaime, megin mok Tamolai inan nal inauwoi.#Mat 24:26, 27 25Ge i get alan naup madowoi, tamolpain gazo e i demeselanipged ilawoi.#Luk 9:22
26Noa inan saenlon inaulak egin, megin Tamolai inan nallon mai inauwoi:#Mat 24:37–39 27anaŋ dianimeg, tuz dimilimeg, pain deŋalemeg, pain tamol deŋalemeg demade; nal me Noa waglak iduseg siz bububu idumeg mon geg, daŋan idid pasi.#Gen 7:7–23 28Megin nok mon Lot inan nallon: anaŋ dianimeg, tuz dimilimeg, didad deŋalemeg, didad ilemeg, um depaemeg, ab disosmeg demade. 29Ge nal me Lot Sodomnenge itaseg ilemeg ja mai abaŋ zuŋan mateŋnen mai ui egin didlakge idu, dadon isag pitiŋina pasi.#Gen 19:15, 24, 25 30Megin mok mon nal elon, Tamolai boboloanip itasemap inauwoi.
31Nal e ta ab tininlak madoime, inan abaŋ bo ab ilonnen ien, i idup, me iŋaloi, so ibol mon. Ta umlon madoime, i megin mon, so panulon imul mon.#Mat 24:17, 18 32Lot iwon lami isoup mado!#Gen 19:26 33Ta i inan tinin mon bas tetazi ŋalewoi bezaniime, i inan nitun padal ilawoi. Ta inan tinin bas padal ilaime, i inan nitun tetazi iŋalewoi.#Luk 9:24 34Ŋa ŋepaiaŋ, Tidom elon azugen badim taimon dienoi, ta i ŋalewoi, aenta i biniwoi. 35Pain azugen fazoŋ desaedime, ta i ŋalep ilawoi, aenta i biniwoi.#Mat 24:40, 41 36Tamol azugen temanip umlon uzat denaudime, ta i ŋalewoi, ta i biniwoi. 37Meglaum desedazeg depai, Ujazen, ŋan? I pidin, Sesanun ienime ŋan melak kasfilian dizou diladime.#Mat 24:28
Currently Selected:
Lukas 17: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
