Lukas 16
16
Uzatgaten tali tea, ge kaginkagindaŋan, iwoi faŋan ibol
1I inan meglaum ta pidin, Tamol filian ta inan uzatgaten made. Iwoi aenta diseg i naonnen uf denau, inan jes se mon bedani e dibol. 2I wagig ipai, Owoi dibolge ŋaloŋlak me dodin? Abaŋ unaulak fun flalep ubol, o mug abgaten tea. 3Abgaten kankanmeg siben ilon gaze: ŋa ait ŋenauwoi? Tamag inan abaŋ wiziagime. Uzat ŋenaunen so ŋaloŋ, kekazeŋ ŋanip ŋatozoi mamai funag. 4Ŋa mug ŋaloŋ, dodin ŋenauwoi, gazop ŋa uzatgaten teap i ŋa diŋiliagpa donoag gauaioi. 5Tamol i taman inan jesoi tinidinnen jadaŋan e wigidinge dadodado diseg ta ipai, O um wadan pite taman paniwoi? 6I ibol, Gazeŋ tin 100. Me ipai, O ja tininen gazek ŋalep matalpa, pasak gaze 50 mon. 7Ta sedaze, O um wadan pite paniwoi? I ibol, Baza bek 100. Me ipai, Oina ja tininen gazek ŋalep gaze 80 mon. 8Taman iloŋge inan uzatgaten, i buben so talilak, iwoi ibol, I kaginkagindaŋan; tan e nunudin inadin abaŋlon kaginkagindaŋan, sul nunudin i maig demadodime inadin abaŋlon egin tea.#Ef 5:8; Tes I 5:5
9Ŋa ŋepaiaŋ, Aŋ mamon so talilak, melon aŋ aenta tizami ab, meginpe gazop me binimap, i me aŋ diŋiliaŋpa panu dedeŋaneklon amadowoi.#Luk 14:14; Mat 6:20; 10:40; 19:21
Bubed malikoi
10Me i abaŋ mitinlon buben malik daŋanime, i abaŋ ujanlon megin mon buben malikdaŋan; ge me i abaŋ mitinlon so taliime, i abaŋ ujanlon mai so tali.#Luk 19:17 11Aŋ mamon so taozlak melon bubumi malik teamap, it mon abaŋ niŋon inaup panaŋoi? 12Aŋ abaŋ baslon bubumi malik teamap, it mon abaŋ nami me aŋ panaŋoi? 13Begabeg ta i taman azugen biadin palunen so iloŋ, tea, ta i zezeŋanimap tawoi i iboloi; tea, i ta uzi panimap ta i meselaniwoi. Aŋ Anut mai mamon maiwoi biadin palunen so aloŋ!#Mat 6:24
Farisea digaslak, dizan waik mai tiliŋadin jabi
14Azu me daŋan farisea, i gaŋmalan ŋalekoi jaeŋ sufutanalak, diloŋ; ge i Jesus dizan dewai depani.#Mat 23:14 15Meginmeg i me pidin, Aŋ tamol e, i sebadin nadin taozoi tamolpain noadinnen auan belabol diboldime, ge Anut nami bubumi iloŋ pasi. Abaŋ tamolpain noadinnen biseg ienime me Anut sizin isaime.#Luk 18:9–14; Kan 7:10; Met 6:16, 17 16Kibiaiŋ azu, profetgaz azu mai Johanes itaseg geg, Johanes inan saenlonge Anut kiŋdomoi totol gamun ienime, me tamolpain dududin didulawoi wagai denaug gik diboldime.#Mat 11:12, 13 17Did mai tan mai bo pasak depadal dilawoi; ge kibiaiŋ azu menen migilankamo ta so padal ilawoi.#Mat 5:18
18Tamol ta inan iwon biniime, ta iŋale, i betezemanek tuzutiime; ta i pain me tamol ibitilak, iŋaleime, i mai betezemanek tuzutiime.#Mat 5:32; 19:9
Tamol filian, Lasarus waiz mai
19Tamol filian ta made, i jamel gizaud mok mon nule, sansan anaŋ gamun mon jani, zigemeg mon itozime. 20Tamol waiz ta made, i nean Lasarus, i daidaŋan i filian inan ab gezaŋenlon matalmeg, 21filian anaŋ janimap, nenamun idup janiwoi ibolge tinin naug made. Gaun mai diseg dai dipile depani. 22Santa Lasarus imat pasi. Eŋel didu diseg daŋale, duduzig dile, Abraham galinlak denaug made. Alouge filianzen mai imat pasig denau. 23Mug Hadeslon alan mok inaug mademeg, malan ileg, Abraham kin dal makaiu inasi, inan galinlak Lasarus matalmeg il. 24I iwog ibol, Ne, mam Abraham, ilo panagpa, Lasarus paip, inan tikun damon mon naz kitek ta saep, ŋalep isop baleg titip, bodo iboloi; jamalan elon tinig gauz izozime. 25Ge Abraham ibol, Nanugai, ilo mon isoupa, o abaŋ gauai ŋan get tanlak ŋale pasi, me Lasarus i get alan mon inaulak; meginge i gazo tinin binig madoime, o sibe funo, titiliomeg madoume.#Luk 6:24; Kan 17:14 26Uloŋume, me nenazig ta mai ien, am aentalon, aŋ aentalon, liluŋlon gezapen zen mok ienime. En ta men ilawoi ibol, so iloŋ, men ta en isonen mai dal tea. 27I faun igosigos ibol, Lasarus naup inag fug panulon ilap, 28inag taiggaz faif abeglon demadodime, i me kabe tiliŋadin ijaboi pidin, panu e salan mokged, mai en so dise mon. 29Abraham ibol, I Moses, profetgaz nadin azudaŋanlak, me diloŋoi.#Tim II 3:16 30Ge i ibol, Mam Abraham, tea, ta imatlak, imul ilap denasip, dizutpa tulufunap didaŋsawoi. 31Abraham auan jabig ipai, I Moses, profetgaz azu so duzi depanidime eginmap, ta dimatlak dimaispa megin mon mai ladinlon so malikoi.
Currently Selected:
Lukas 16: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
