Lukas 15
15
Tamolpain tataz iŋalnen, belelek faŋanlon ibol
1Selna aupasekbibian mai gazo i izinnen azu diloŋoi dise. 2Fariseagaz, gazekmaŋaugaz mewoi duŋuzuzge dibol, Tamol e aupasekbibian iŋal, i maig anaŋ dianidime.#Luk 5:30 3Meginmeg Jesus azu faŋanfaŋan e pidin ibol.
4Aŋ tamol it tat inan belelek 100 ditozdimelak, taimon padal tat ilemap i 99 aenta fatu udaulon kin so tat ibin, taimon me uzip faun inasimap eginmap.#Hesek 34:11, 16; Luk 19:10 5I nasimap bisa ŋalep zigemeg mon i joazeime. 6Panulon itasap tizangaz, mudubangaz wigidinpa pdin, Aŋ ŋa maip zigiadoi, inag belelek taimon padallak mug ŋeŋalie. 7Ŋa ŋepaiaŋ, Megin mon didpanulon zigiaime, aupasekai taimon buben tulufunip idaŋsemap, 99 aenta i mug taoz e dibol, mewoi i tulufuna didaŋsanen teabe, iwoi didlon zigiek aupasekai taimonoi egin tea.
Gaŋmalan faŋanfaŋan
8Tea, nami pain it tat inan gaŋmalan 10 dien, taimon tat padal ilemap i lamp kin so tat tunip, ab gezeŋanip, taimon padallak mewoi laŋaimap itozoi? Malik i jaeŋ funip bezaniwoi. 9I nasimap iŋalep idu, tizangaz, mudubangaz wigidin, pidin, Aŋ ŋa maip zigiadoi, inag gaŋmalan taimon padallak mug ŋeŋalie. 10Ŋa ŋepaiaŋ, Anut inan eŋel megin mon zigiawoi, aupasekai taimon buben tulufunip idaŋsemap, mewoi.#Ef 3:10
Ai padallak
11Batemeg faun te ibol, Tamol ta inan ai azugen ditozdime. 12Ai mizimu taman ipai, Mam, jes tezepalep inag me ŋa panag. Ibollak megin taman jes tezepaleg, aenta i pani. 13Kin made panilag, ai mizimu inan abaŋ dadon isag itemanag imaisge panu talon ile. Aon inan jes pasak sisunenlon se bedani.#Met 29:3 14Inan jes megin se bedanilag, alouge panu melon pitol ujan idu, ai me mai jabi. 15I gezaŋen uzig itozime, tamol ta inan begabeg inauwoi ipai. Tamol me ipai, i ilap, inan boz umlon tizinawoi ibol. 16Ai boz inan anaŋ kekazeŋoi itoz, ilon ibol, Kin ŋanip loag didipe, ibol; tatata kin so depani jani.#Met 23:21 17Mug ilon faun seflalemeg ibol, Mam bo wei kuzum iŋal, anaŋ dadon isag dianidime, ge ŋa pitoloi ŋamatmeg ŋatozŋame.#Apos 12:11 18Ŋa ŋamulpa mam izinnen ŋalap ŋepaiwoi, Mam, ŋa didlak me naonnen, o naonen mai auŋapasge ŋatozlak, mug ŋasie.#Jer 3:12, 13; Kan 51:6 19Ŋa salaglakoi ŋa oina ai ŋan e so ubol mon, begabeg egin mon noag. 20Ibollag imaisge inan taman izinnen ilawoi ile. Ai kin dal makaiu egin isemeg, taman malan ileg inasig, ilon pani, imaisge palug ile, naon tazetazeg jabi, kadoi pani, musuk mai ipani. 21Ai ipai, Mam, ŋa didlak me naonnen, o naonen mai auŋapasge ŋatozlak, ŋa oina ai ŋan e so ubol mon. 22Mug taman inan aibegabeg pidin, Alap jamel gizaud ta ŋalep aso, ai e nula pani, nimannen biu ta nula pani, nienaten adizla pani, 23bulmakau numuzandaŋan ta aŋalep asae, id tanip zigiadmap temadowoi; 24ŋainag ai e imat egin itozlak, gazo e bas madoime, i padallak ŋan teŋalie. I zigiameg demade.#Ef 2:1, 5; 5:14
25Ai matu gazo umlon made. I imulge isemeg ab izinnen itaseg, dug diabimeg, zigiameg liŋadin iloŋ. 26Aibegabeg ta iwagig izinnen iseg sodoz pani, abaŋte denaudime. 27I ipai, Oina tai iselakoi tama bulmakau numuzandaŋan isaelak, me dianimeg demadodime, ai bas nasilakoi zigiaime. 28Iloŋge buzun isa, albak so iduse, imoi. Inan taman ablakge tapas idug igosigos ipai.#Luk 15:2 29I auan jabig taman ipai, Uloŋume, ŋa umaz kuzum o bia ŋepalug ŋatozlak, oina aua kin so ŋemeselanilak; belelek nanun ta bo so panaglak, tizaggaz mai kin anipe, zigiamamap amadope. 30Au, gazo ina ai e iselak, i inan jes daŋan se jaitlon sezaneg dilelak, iwoi bo o pasak bulmakau numuzan sae. 31I ibol, Nanug, o sansan ŋa maig temadelak, abaŋ i ŋainag me oina mai. 32Ge gazo bo jaud isap zigiek mon ienoi; ŋan e, oina tai, imatlakge gazo e bas madoime, i padallakge ŋan faun teŋalie, mewoi.
Currently Selected:
Lukas 15: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
