Lukas 10
10
Jesus inan meglaum sewenti totol inau
1Alouge Ujanzen inan meglaum sewenti aenta piliana, azuazu mon inaug i naonnen panu ujan, panu kitek mai, men i siben gazop uzip ilawoi ibol, melon ditozoi.#Mar 6:7–11 2I pidin, Fiafu gauai ienime, ge uzatai taitai mon, mewoi aŋ fiafu inan Ujanzen naonnen agodoi, i uzatai inan um fiafulaklon inaup dilawoi!#Joh 4:35; Mat 9:37, 38 3Segauz ala! Aloŋ, ŋa aŋ belelek nanun egin ŋonoaŋŋame, dazuk wagai leŋadinlon atozoi. 4Aŋ gaŋmalan inan badam, tazeŋ inan badam, tazeŋ inan adizlanen mai so aŋalep ale mon, aŋ dallak ta tabei so apani mon.#Luk 9:3–5; Kiŋ II 4:20 5Aŋ ab talak adusemap aboloi, Ab e mazozdaŋan ienoi. 6Aon ai mazoz madoimetap mazozpez aŋ dadom apanilak, i fonlak idup ienoi, teatap i aŋ ziminen saziz imuloi. 7Ab taimon me mon amado, abfun inan anaŋ ani, naz imili; uzatai inan uzat naon iŋalewoi. Ab zazezazep so aduse mon!#Tim I 5:18 8Aŋ panu talon adulemap, aon aŋ diŋiliaŋmap anaŋ depanaŋpa me aniwoi. 9Maiaidaŋan ikibiniawoi, ipidin, Anut kiŋdom ziminen sizizlon iseg ienime. 10Ge panu aenta aŋ dimoidime, nadin dallak adup, ipidin, 11Nami panu inan kulukal niema bugutalak e faun usuas apanaŋ en ienoi. Taimon e bo aloŋoi: Anut kiŋdom aŋ sizizlon iseg ien.#Apos 13:51; 18:6 12Ŋa ŋepaiaŋ, Fatu bininen wadanlon panu me Sodom inan naon ŋalenen me beleŋanip iŋalewoi.
Panupanu so didaŋsawoi, Waio! ipidin
13Waio, Korasin! Waio, Betsaida! Tirus Sidon mai abaŋ aŋ anasiame i denasipeges, i jamel memasenlon sagaflon mai dematal didaŋsape. 14Malik, Tirus Sidon mai gazop betenaek ujanlon naon muzuan aŋ egin tea. 15Me Kapernaum, o get did latnen egin bisiog madelak, o Hadeslon bitop uduwoi! 16Tata i nami auami iloŋpa, dab ipaniime, i ŋainag auag iloŋ, dab ipani; tata i aŋ meselanaŋime me ŋa meselanagime, me meselaniime, i me ŋa noaglak me meselaniime.#Mat 10:40
Meglaum sewenti dimulge dise
17Ai sewenti dimulge disemeg judin isag dibol, Ujazen, buga oina nealon nama auama mai duzi dipinidindime. 18I bo pidin, Ŋa ŋenasilak, Satan lelei egin didlakge ibal idu.#Joh 12:31; Bo 12:8, 9; Mar 16:18; Kan 91:13 19Aloŋ, ŋa tiwon ŋepanaŋlak, aŋ mot, jipiap mai apazpa, so dijiziaŋoi, agez inan tiwon atazeknen mai ŋepanaŋlak; ge aŋ melon alan ta so ibiaŋoi. 20Ge buga nami auami duzi dipinidinlak, mewoi aŋ so zigiaŋoi, tea, nami neami didlak igez dienlak, mewoi mon zigiaŋoi.#Ekso 32:32; Fil 4:3; Bo 3:5
Jesus Mam Anut pez pani
21Saen melon Jesus Uzgunlon muguzuŋ inaumeg ibol, Mam ŋa kalel ŋepano, did mai tan mai inan Ujanzen, o abaŋ me tamol maŋaumaŋau, kaginkagin mai noadinnen miŋianilak; ge me i ai kinkin boboloanig pinidinlak. Au, Mam megin o gamun funolak.#Mat 11:25–27 22Abaŋ daŋan inag Mam ŋa nimaglon inaulak; tata i so iloŋ, nanunai it mon Mam siben mon iloŋ, me Mam it mon, me nanunai mon iloŋ, me mon mai iloŋoi, i nanunai boboloanig ipaiime. 23Apostel zidinnen idaŋseg i mon pidin, A i putudin isawoi, inadin meladin denasidime, me aŋ gazo anasiame me.#Mat 13:16, 17; Pet I 1:10 24Ŋa ŋepaiaŋ, Profet kuzum, kiŋgaz mai denasiwoi dibol, me aŋ gazo anasiame, ge i so denasilak; aŋ aloŋame me i diloŋoi dibol, ge so diloŋlak.
Samariawain teŋaen alan
25Nasi, gazekmaŋau ta imais, Jesus kibianiwoi, ibol, Maŋautamol, ŋa dodin ta ŋenaup ŋa so ŋepadaloi, ŋa patug isap ŋemadowoi?#Luk 18:18–20 26Jesus ipai, Kibiaiŋlon ait gazelak? O dodin ta sutilak? 27I auan jabi ibol, O Anut, i oina Ujanzen, bube daŋanlon, nitu daŋanlon, ilo kankan daŋanlon ilo paniwoi; o sibe o dado ilo paniumelak egin, megin muduban mai ilo paniwoi.#Deut 6:5; Lew 19:18 28Jesus ipai, O gauai ubollak, o megin mon naup utozmap o bas madowoi.#Lew 18:5; Mat 19:17 29Ge i siben inan sedazekoi gaten pasiwoige, Jesus ipai, Itgaz mon ŋainag muduban? 30Jesus auanlon pasi ŋale ipai, Tamol ta Jerusalemnenge Jerikonen ilawoi ilemeg agez dallak dufunati deŋaleg jamel desebaza idug dufuni, imat pasiwoi inaumeg dibinig diau. 31Gazo egin waliŋ ta dal me uzig ise, nasimeg nenazig ile.#Kan 38:12; Luk 18:11 32Megin mon lewit ta ise, nasimeg mai nenazig ile. 33Alou mok Samariawain ta megin mon ise. Izinnen itaseg isemeg teŋaen alan,#Mat 10:5 34ipaz iseg gazeŋlon, medisinlon dai daŋan kibiniag pau pani. Ibiseg inan dazuklak inau, panulon duzig ile; men tazeŋtamol ablon idug puzupuzemeg made. 35Nal ta ilawoige inan gaŋmalan pasig abfun azugen panimeg ipai, O dab paniwoi, o abe kudetap, gazop ŋamulpa ŋasop naon ŋepanowoi. 36O dodin ta ubolume, Tamol tolgen ditozlak, it mon tamol i alan inaulak inan muduban? 37Gazekmaŋau ibol, Ai iwoi teŋaen alanlak ŋan me. Jesus mug ipai, Meginge ulap mai mon megin unaup utoz.#Joh 13:17
Marta Maria mai
38Nal ta ditozmeg i panu kitek talon ditase. Men pain ta, nean Marta, inan ablak iduzig dile.#Joh 11:1; 12:2, 3 39Inan tain me Maria, i Ujanzen nien fun imatal idu, inan auan dab panimeg made. 40Ge Marta bian palunenoi gauz pupuzemeg itoz. I Jesus izinnen ipaz iseg ipai, O Ujazen, o mewoi kin so ubolume, taig binagge ŋa sibeg dadog mon oina bia ŋepalu ŋatozŋame? O kin paiŋan, ŋa uzat kin wiziagoi. 41Ujanzen auan jabig ipai, Marta, Marta, o abaŋ kuzumoi jaeŋ gauz funoime; 42taimonoi mon jaeŋ funop iduse. Maria abaŋ boi gauai mon pilianilak, me i so duzaewoi.#Mat 6:33
Currently Selected:
Lukas 10: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
