Lukas 9
9
Jesus apostel totol inau
1I inan apostel twelf wigidinge itemana, buga kudueknen, maiai funfun kibineken tiwon ipinidin. 2Meginge inaug dile, Anut kiŋdomoi azu diboloi ditoz, tata maiaidaŋan dikibiniawoi ibol. 3I pidin, Aŋ abaŋabaŋ tata so aŋalep atoz, tok tea, badam tea, sepalaŋ tea, gaŋmalan tea, jamel azugen mai tea. 4Aŋ ab talak adusemap, melak mon amado, amais alemap mon ibiniwoi.#Luk 10:5–7 5Tata aŋ dimoitap panu me ibini, nadin panu inan kulukal niemi bugutalak me mai atutep faun pinidinpa, i sebadin tinidinnen ipidin. #Luk 10:11 6Meginge i dimaisge dileg panupanu zazeg ditoz, totol gamun dipidin, maiaidaŋan dikibinia.
Herodes Jesusoi ilon bebazek
7Tetrark Herodes abaŋ e daŋanoi iloŋge ilon bebaze. Tata dibol flaneknen Johanes mateŋlonge faun fuŋunig imaislak. 8Aenta dibol, Elias faun mug itase; ta dibol, Profet getnen ta imais e dibol.#Mat 16:14 9Ge Herodes ibol, Johanes klagun ŋugusutilak ŋan e tat, inan maŋaumaŋau ŋaloŋŋame? I kin nasiwoi tinin inau.#Luk 23:8
Apostel dimul. Jesus tamolpain 5000 futua
10Apostel dimulge diseg denaulak e sai depani. I iŋalge ibennen, Betsaida panu izinnen idauzig dile. 11Tamolpaingaz me diloŋge duzge dile. Ilge i so imoi, tea, Anut kiŋdomoi azu pidin, aenta maiai ifulak ikibinia.
12Ad jeŋajoŋ inaumeg apostelgaz izinnen dipazge depai, O tamolpain kin ubinpa i panupanu depetetalep anaŋ dianiwoi, id en fatu udaulon temadotame. 13I pidin, Aŋ anaŋ pinidinoi! I auanlon pasi ŋale depai, Am sepalaŋ faif mon, ij azugen mai; am alapged anaŋ adadpa daŋan dianinen diloŋoi. 14Tamol 5000 demade. I meglaumgaz pidin, Anaup i malanmalan 50, 50‐pa dezazep demataloi. 15I megin daŋan denaug dematal. 16Meginge i sepalaŋ 5, ij 2 maig iŋalge didlak itad, iwoi Anut kalel pani. Meginge wozai ŋaleg bufateg idu, meglaumgaz pinidin, i tamolpain dewae dipinidinoi. 17I dianig daŋan loadin didi. Nenamun sazeg 12 denaneg didizig auadinnen.#Kiŋ II 4:44
Petrus Jesus fun blani. Jesus alan nauknenoi malanmalan ibol (Sab 9:44 nasi)
18Santa i siben dadon godoanimeg made, inan meglaumgaz mon izinnen demade. I sidiziag ibol, Tamolpain ŋawoi ait dibol, ŋa itai? 19I auan diabig dibol, Flaneknen Johanes dibol, aenta bo dibol Elias, aenta profet getnen ta imaislak dibol. 20I pidin, Aŋ bo dodin abol, ŋa itai? Petrus auan jabig ibol, O Anut inan Kristus. 21Ge i niman tikun wotemeg gauz piziana ibol, i tata me so depaiwoi ibol. 22Auan batemeg ipidin, Tamolai alan mok inauwoi, matugaz, waliŋgaz ta, gatengaz gazekmaŋau mai i dibitiwoi, dufuniwoi; ge taen azup geglon i faun fuŋunip imaisoi. #Luk 9:44; 18:32, 33
Jesus sunuzekoi
23Meginge i daŋan pidin, Ta i ŋa sunuzagoi ibol i siben dadon i zezeŋaniwoi, inan jakebazek nal dadodado iŋalep joazewoi, egin ŋa uzag mon itozoi. 24Ge me i inan tinin mon bas tetazi ŋalewoi ibol, i inan nitun padal ilawoi; ge ta i inan tinin bas ŋawoi padalime, me inan nitun tetazi ŋalewoi.#Luk 17:33; Mat 10:39; Joh 12:25 25Tamol ta tannen filian daŋan iŋaltap; ge i siben dadon benenaip ipadal me abaŋtenen tat? 26Ta i ŋawoi, inag azuoi mai mamai funitap, iwoi Tamolai gazop inan kubelkubellon, Taman inan mai, eŋel gun nadin mailon isemap mai mamai funiwoi.#Mat 10:33 27Malik ŋa aŋ ŋepaiaŋ, taitai en ditiuzdime, i mateŋ so denasiwoi, Anut inan kubelkubel wagam denasilak eginmap.
Jesus tinin buli
28Nal eit binig i Petrus, Johanes Jakobus mai iŋalge did talak diduse. Jesus aon godoaniwoi. 29Godoani mademeg inan naon bulig iben, inan jamel nunutig sepetade. 30Nasi, tamol azugen i maig dikibiai, ta i Moses, ta i Elias. 31I kubelkubeldaŋan ditaseg abaŋ Jesus Jerusalemnen inaunen, mewoi dikibiai. 32Petrus ai aenta mai meladin jof mon demade. Tinidin faun sifililia gauaimeg meladin po ibolmeg i inan kubelkubel denasi, tamol azugen Jesus maig ditiuzmeg dil. 33I dibinpa dilawoige Petrus Jesus ipai, O tamoluja, en temadonen gauai, o uboltap tazas tol tasosoi, ta oina, ta Moses inan, ta Elias inan. I ibollak me fun so iloŋ gauai, abaŋtewoi ibolime. 34Megin ibol mademeg, timtaen idu iseg daŋan stoana. Timtaen fodinlak doloanag i dizutge demade. 35Timtaen ilonnenge auan ta ibol idu: Me ŋainag ai pilianek wazan, inan auan dab apani. #Luk 3:22; Kan 2:7; Jes 42:1 36Auan megin diloŋlag, meladin ilemeg, Jesus siben taimon denasi. I to dibol, abaŋ denasilak, saen melon tata so depaig iloŋ.
Ai bugadaŋan Jesus ikibine
37I boŋanip egin didlakge didumeg tamolpain malan zen i mai naon tazetaze. 38Uloŋ, malan ilonnen tamol ta ibob ibol, Maŋautamol, ŋa ŋagod, o inag ai kin nasiwoi, i ŋainag taimon mok. 39Uloŋ, santa buga tininlon idup jabimap ai ibob, i funip izaese izaelap, maiab gauz funip kokou auanlon itasaime. Aloupa iseflaleime muzuan mon ibini, get gauz faun izaese izaele funi, ai jaeŋ gauz sufutani. 40Ŋa mug oina meglaum ŋagodlak, i dukuduiwoi, denau lo tea. 41Jesus auan jabig ibol, Aŋ lamilon maliknen tea egin, gedagad mon! Ŋa nal pite mon aŋ maip temadop ilog alanoi? Oina ai duzip aso! 42I ipaz isemeg buga salan ai jabi, izaese izaele funi, tinin feani. Ge Jesus tikun wotemeg buga salan gauz ipai, ai kibine, inan taman pani imul. 43I daŋan Anut inan tiwon zenoi meladin ti dibolge dizut.
Jesus alan naukoi ibol azug (Sab 9, 22 nasi)
Abaŋ daŋan me Jesus inaulak, mewoi tamolpain dizut deladalmeg i inan meglaum pidin, 44Aŋ azu e tiliŋamilon kabe aloŋoi: Kitek ta maip Tamolai i tamolpain nimadinlon inau pinidinoi.#Luk 9:22 45I bo azu me so diloŋ gauai, toanig mon ien, mewoi ladinlon so diloŋ gauai. Ge i mewoi Jesus desedazewoi dizutge so denau.#Luk 18:34; Mar 9:32
Meglaum nug biŋadinoi ŋagas ditoz
46I nug dikibiaig dibol, it tat aenta daŋan beleŋana ujan mok. 47Jesus azu e ladinlon ienmeg nasig, i nanun ta jabi, siben izinnen inaug 48ipidin, Ta i ŋainag neaglon nanun enen dagom ŋaleime, i ŋa ŋiliagime; ta i ŋa ŋiliagime, i ŋa noagge ŋase me ŋaleime. Aŋ leŋamilon ta mitin madoime me i ujan.#Mat 10:40 49Mug Johanes auan jabig ibol, Maŋautamol, am ta anasilak, i oina nealon buga ikudualak. Am iwoi laiŋ apazelak, i id so sunuzadime. 50Ge Jesus i ipai, Aŋ iwoi laiŋ so apaze mon, ta i aŋ so fiziaŋime, i aŋ mai taimon.#Mat 12:30; Luk 11:23; Fil 1:18
JESUS JERUSALEMNEN ILAIME, DALLAK UZAT INAU, 9:51—18:30
Samaria panu lo tea, meglaum ladin pasek
51Jesus inan saen tanlak itoznen kin geglon ienmeg i imaisge, Jerusalem daŋemeg ile.#Mar 10:32 52I totol inaug i dimugpa dilawoi. Samaria panu talon diduleg Jesus madoknenoi dikibiai.#Joh 4:4 53Ge i aben ta so depani, i Jerusalem daŋeg ilaimelakoi. 54Inan meglaum Jakobus Johanes maig megin diloŋge dibol, Ujazen, o uboltap ja didlakpa i fodinlak ibal iduwoi, taboloi, i daŋan ninia pasiwoi, Elias inaulak megin?#Kiŋ II 1:10, 12 55I idaŋseg niman tikun wotemeg pidin, Aŋ so aloŋ, aŋ uz it inan nanun?#Joh 3:17; 12:47 56Meginge i panu talon dile.#Kiŋ I 19:20
Jesus sunuzekoi
57Dilemeg ta Jesus ipai, O utozume me ŋa sansan ŋusunuzowoi. 58Jesus i ipai, Ŋeu i lofdaŋan, ma latnen dizoudime i uzdaŋan, ge Tamolai i aben wonanan tea. 59I ai ta ipai, O ŋa sunuzagpa utozoi! I ibol, Ujazen, uboltap, mam imatlak wagam ŋalap loflon ŋenauwoiged. 60Jesus i ipai, O ŋa uzag mon utozoi, i dimat egin ditozdimelak, sebadin tizadin denauwoi; o bo Anut kiŋdomoi azu ubolpa utozoi. 61Ai ta Jesus ipai, O Ujazen, ŋa o ŋusunuzowoi; ge o a a uboltap, ŋa get ŋalap inag taigtauaggaz maduo! ŋipidinoi.#Kiŋ I 19:20 62Ge Jesus ipai, Ta i uzat se itoz pani, bilikilakse bilikilakle mon i Anut kiŋdomnen so iduse.
Currently Selected:
Lukas 9: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
