Lukas 11
11
Jesus inan meglaum godoanek fun iflale
1Santa i aben talon godoani. Ibinilag inan meglaum ta ipai, Ujazen, godoaninen am peteŋanamape, Johanes inan meglaum mai peteŋanalak megin. #Luk 5:33 2I pidin ibol, Aŋ godoaniwoi abolmap egin abol: Amnama Mam, o didlon madoume, oina nea gun inauwoi. Oina kagin idu isowoi. Oina aua mon uzi paniwoi, didlon egin, megin tanlak mai. 3Amnama anaŋ nalnen gazomnen o am penamape. 4Amnama aupasek o ilo padalpe, am e nadin maip lama padalime, i am donoama alan. Am bitimape, Satan am so kibianama mon. Abaŋ salan am ŋiliama zuma, putuma pasipe.
Jesus stemanek, dedeŋanek godoaninenoi ibol
5I faun te pidin, Aŋ it inan kadoi madoime, i izinnen tidom loanlon ilap ipaip, Kadoi, sepalaŋ tolgen ti panagŋan, 6inag kadoi ta tazeŋ jabilak ise, ŋa anaŋ ŋepaninen teabe. 7Ge i ablonpa auan jabip ipaip, Binagpe, ait fuŋunagume! Dalauan mug funatig ien, inag nanuggaz ŋa maig aename, ŋamaispa ŋepanonen so ŋaloŋ.#Mat 26:10; Mar 14:6 8Ŋa nepaiaŋ, I inan kadoilakoi bo so imaisime, ge i gauz seseŋanilakoi, imaispa, abaŋ igodlak me daŋan ipaniwoi.#Luk 18:5
9Mewoi ŋa aŋ ŋepaiaŋŋame, Agodpa, megin aŋ panaŋoi; abezanipa, megin aŋ anasiwoi; ititipa, megin pasi panaŋoi. 10Dadon i igodime, me iŋaleime; ibezaniime, me inasiime; ititiime, me pasi paniwoi. 11Taman it tat mon inan nanun i sepalaŋoi igod, ge pat mon ipaniime? Ijoi igod, ge ij naon mot ipaniime? 12Kekazek patunoi igodims, ge jipiap ipaniime? Tea, megin so inauime. 13Naei, aŋ mug, aŋ slamilak, nami nunumigaz abaŋ gauai mon ipinidiname, eginpe malik nami Temami didlak, ta i mewoi igodime, i Uzgun paniwoi.#Luk 18:19
Farisea Jesus Beelsebuboi dizan dewai depani
14I buga ta ikudui, me auan itaulak. Buga tinin seflalelag, tamol azu ibol. Tamolpain denasig dizut deladal. 15Taitai dibol, Beelsebublon, buga salan getadin, i buga kuduaime. 16Aenta dikibiani, bagoz didnenpe ta inaup idup denasiwoi dibol.#Mar 8:11 17Ge Jesus nadin azu ladinlon ien, iloŋge pidin, Kiŋdom dadon, men tamolpain sebadin bubudin taimon teadime, me gazop fuzai inau, ab zazep belemanag dibal didup salanoi. 18Aŋ abolame, ŋa Beelsebublon buga ŋukuduaŋame, me dodin mon! Satan siben inangaz mai bubudin taimon teap, inan kiŋdom dodin stemanip ienoi? 19Ge ŋa Beelsebublon buga ŋukuduaŋame abolge namigaz itlon dukuduadime. Mewoi i aŋnami betenaekkamaŋ demadowoi. 20Ge ŋa Anut tiwonlon buga ŋukuduatap, Anut inan kiŋdom ziminen itaselak.#Ekso 8:15
21Ta tiwon gegaundaŋan inan abaŋ tizinamap, inan abaŋ mazozlon ienoi. 22Aloumap ta isetap, inan tiwon e inan nenazimap, i seŋaniwoi, inan abaŋabaŋ i inau panilak, isebazap, inan naŋen daŋan jubi iwaep pinidinoi.#Kol 2:15 23Ta i ŋa so maitame, i diŋiagime; ta i ŋa mai so tenanetame, i sezaneime.#Luk 9:50; Joh 11:52
Saziz imulnen faŋan ibol
24Buga tinin ta seflalep ilaime, fuzailon tizituz funig itozse itozlaime, madoknen bezani lo teaime. Meginge i ibol, Ŋainag ab ŋataselak men faun ŋamuloi. 25Isop inasip gezeŋanig, kibineg, bala jabig ien gauai mok. 26Meginpe i faun imul ilaime, buga wagai mok sewen aenta, me i denenazidime, a iŋal imul, diduladime. Meginpe tamol me aloupa salan getnen nenazip salan wagai denau.#Joh 5:14
It mon patun isaime?
27I megin ibolmeg pain ta malan zen ilonnen auan biseg ipai, Pain i o nuolak, inan su o wanilak, me patun isag madoime.#Luk 1:28, 48 28I auanlon pasi ŋale ibol, Tea, Anut inan azu diloŋdime, ladin denau, bubudinlon du ibolime, me mon putudin isap demadodime.#Luk 8:15, 21
Jona inan bagoz
29Tamolpain malan detemanig dububuz disemeg, imaisge ibol, Tamolpain gazo sladin i bagozoi dibol; ge bagoz faun ta i so denasiwoi, tea, Jona inan mon. 30Jona i Niniwe tamolpain ilonnen bagoz egin itozlak, megin te Tamolai gazo e tamolpain ilonnen bagoz madoime. 31Kwin jauan baŋenlon get dal makaiu iseg, Solomon inan maŋau iloŋoi ibol, i loantap betenaek ujanlon imaisoi, tamolpain gazo e imeselanawoi. Aloŋ, Tamolai e i Solomon beleŋaniime.#Kiŋ I 10:1 32Niniwegaz betenaek ujanlon dimaisoi, tamolpain gazo e demeselanawoi; i Jona inan auan diloŋmeg, tulufuna didaŋselak. Aloŋ, en ta itiuzime, i Jona nenaziime!#Jona 3:5
33Ta i lamp tunimap i so miŋianiime, kunuplon so segemaniime, tea, inan dazuklak inauime, me i ablak didusadime, inan lelaman denasiwoi.#Luk 8:16; Mat 5:15 34Oina mala i tini inan lamp. Mala gauaitap oina tini daŋan mai lelamanoi, tea, i salantap, oina tini daŋan mafuz egin. 35Dab nau, ina lelaman ilolon ienime, mafuz so inauwoi. 36Ina tini daŋan lelamantap, mafuz ta so ientap, meginpe i daŋan leleiime, lamp sepetadeg nunutig ienime egin.
Fariseagaz bubudin sakeklak, Jesus azu pidin
37Jesus azu e ibol saseg ienmeg, farisea ta igod ipai i maip anaŋ dianiwoi. I maig dileg dematal.#Luk 7:36; 14:1; Mar 15:2 38Farisea inasig i get niman so flanilak, i malan ti ibolge izut. 39Ge Jesus i ipai, Au ŋan e: Aŋ fariseagaz bo tabiz, nabud mai tinidin ikibiniaame, ge nami lami bulases, abaŋ salan mai mon fuam. 40Gedagad aŋ, i tinin inaulak, me ilon so inaulak tatge? 41Lami inan abaŋ lo awap, meginpa abaŋ daŋan noaminen imonoi. 42Waio, aŋ fariseagaz, aŋ dulam, kupezzaun, sagau aenta mai daŋan inan tezepalek tenoi kibiaiŋ anauame, ge abaŋ tali nauknen, Anut lamipanek mai aŋ apenenazaame. Ge e me anauwoi, a so ibiniwoi. 43Waio, aŋ farisea, nami ubouablon aŋ malanmalan mon amataloi abol, tamolpain aŋ tabei depanaŋoi mai.#Luk 20:46 44Waio, aŋ fedafod piziŋineklak egin, me fonlak tamolpain ditozse ditozladime, so diloŋ men fedafod diendime.
Peteŋanek mai bubudin funek ditoz ipidin
45Mug kibiaiŋkamaŋ ta auan bufateg ibol, Peteŋanek, azu melon o am maig zezeŋanamaume. 46I ipai, Aŋ kibiaiŋkamaŋ megin mon, waio! Aŋ tamolpain aenta joazeknen dap muzuan ipinidiname, aŋ bo sebami tukumi taimonlon kin so ititiame. 47Waio, aŋ profetgaz temamigaz difug dimatlak. 48Mewoi aŋ i mai taimoname, i denaulak, aŋ gauai e abolame; i difulak, aŋ i nadin fedafod azazeame. 49Mewoi Anut inan kaginkagin mai ibollak: Ŋa profet mai apostel mai zidinnen ŋenaup dilawoi, menen aenta i difup dimatoi, aenta dukuduawoi, 50profet daŋan nadin daz fatu funlonge debedanig dufuzaklak, tamolpain e ja naon deŋalewoi. 51Abel inan dazlonge ilap Sakarias inan daz mai, me i janauknen wiwa mai tempel mai liluŋlon dufunig imatlak. Au, ŋa ŋepaiaŋ, Gazo ditozdime, me daz daŋan tinidinnen japal nauwoi.#Gen 4:8; Sai II 24:20 52Waio, aŋ gazekmaŋau! Ladinlon kagin diloŋnen inan ki aŋ iwizidinlak. Aŋ sebami so adulelak, aenta didulawoi dibollak, me noadinnen aŋ dal afalelak.
53I megin ibolmeg gazekmaŋaugaz fariseagaz mai iwoi teŋaedin gauz alange demade. I dimaisge abaŋ aenta mai kuzumoi i Jesus desedazeg denasi. 54I fenafunge ditoz, azu ta inan auanlon diloŋpa mewoi i, Siben tininnen, diboloi menen.#Luk 20:20
Currently Selected:
Lukas 11: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
