Johanes 6
6
Jesus tamolai 5000 futualak
1Abaŋ e uzig Jesus Galilea inan wililuk me nean ta Tiberias, me aen talon ile. 2Tamolai pifoldaŋan duzig dile, i inan kubelmaŋau maiaigaz ilonnen inaulak me denasilakoi. 3Me Jesus meglaum mai did ilonnen diduseg dematal.#Mat 5:1 4Pasa, Juda nadin ubou ta, me siziz.#Joh 2:13; 11:55; Luk 22:1 5Jesus malan biseg tamolai malan zen izinnen disemeg ilge i Filipus ipai, Id domten anaŋ tadadpa i dianiwoi. 6Ge i kibianiwoi mon ipai, siben abaŋ ta inauwoi inauime. 7Filipus i auan jabig ibol, Paund 7‐lon sepalaŋ tadadpa boi kinkin mon deŋalemap mai so isaboi. 8Inan meglaum ta, Andreas, Simon Petrus inan tain, i ipai, 9Ai faun ta madoime i barli inan sepalaŋ boi 5, ij kinkin 2 maidaŋan. Ge me kuzum ilonlon isabnen tea. 10Jesus ibol, Tamolai anaupa demataloi, fatu me ifuz gauailak. Meginge tamol dematallak me 5000. 11Meginge Jesus sepalaŋ boi me ŋaleg jabig kalel pani binig i dematallak me wae pinidin, ij mai megin idusanen ipinidin.#Joh 21:13 12I loadin didilag Jesus meglaum pidin, Nenamun diendime me nanep ta so padaloi. 13Meginge tamolai loadin didilag anaŋ wadan barli sepalaŋ 5 inan nenamun idulak me didizig sazeg 12 auadinnen. 14Uzig tamol me Jesus inan kubelmaŋau i inaulak me denasilag dibol, Me malik profet tanlak itasawoi dibollak ŋan i.#Deut 18:15; Joh 12:13; 18:36
15Meginge Jesus iloŋge gik dibolpa duduzip kiŋ denauwoi i nien taimon did me iduseg made.
16Mug sufuni idulakoi inan meglaum mas laŋten didu. 17Wag talak diduseg mas dedaiap Kapernaumnen dilawoi dile. Gazo mug mafuz pani me Jesus zidinnen so ise. 18Me mas tim gauz fazeimelak kizikoz imais.#Mat 8:24 19Meginge mail 3 ilap 4 dikoilag i Jesus mas atenlak itozmeg wag siziz panimeg denasig i dizez. 20Ge i pidin, Ŋa sibeg, so azez mon. 21Meginge i waglak idusawoi dibolge i fatu dilawoi dibollak men pasak dibal.
Jesus Kapernaumnen dedeŋaneknen anaŋoi pidin
22Nal uzilak tamolai naz laŋ aen talon ditiuzmeg diloŋ wag ta tealak, taimon melon meglaumgaz diduselak me mon, me Jesus inan meglaum maig so dilelak, tea, meglaum sebadin mon dile. 23Wag kinkin aenta bo Tiberiasnenge diseg aben me Jesus get sepalaŋ baz panig i dianilak men dise.#Joh 6:11 24Meginge tamolai malan zen diloŋge Jesus, inan meglaum mai so demadodime, i dududin waglak diduseg diseg Jesus debezanidime.#Mar 1:36
25Mas tinin aentalon denasig i depai, Tamoluja, o saŋepte use? 26Jesus auadin jabig pidin, Malik mok malik, ŋa aŋ ŋepaiaŋ, aŋ kubelmaŋau anasilak mewoi aŋ so abezanag, tea, aŋ sepalaŋ anig loami didilak mewoi. 27Aŋ anaŋ padalimelak mewoi mon uzat so anau mon, tea, anaŋ dedeŋanip ienoi mewoi, me Tamolai ipanaŋoi, i mon Anut Taman pilianilak.#Joh 4:14; 5:36; Mat 16:12 28Meginge i depai, Am abaŋte anaup am Anut inan uzat anauwoi? 29Jesus auan jabig pidin, E me Anut inan uzat, aŋ i inaug iselak ŋan i lamilon malikoi.#Joh I 3:23 30Meginge i depai, Bagoz ait unauume me am anasip o lamalon malikoi? O abaŋte unauume?#Joh 2:18; Mar 8:11 31Amnama mamgaz i fatu udaulon mana dianilak, gazelak egin: I didlakge sepalaŋ pinidinge diani.#Ekso 16:13, 14; Kan 78:24 32Meginge Jesus i pidin, Malik mok malik, ŋa aŋ ŋepaiaŋ, Moses i didnen sepalaŋ me so panaŋlak; ŋainag Mam bo didlakge sepalaŋ niŋon panaŋime.#Joh 6:49 33Nasi, Anut inan sepalaŋ ŋan me i didnenge isoime, me tan e bas niŋon paniime. 34Meginge i depai, Tamoluja, sansan sepalaŋ me penamape.
35Jesus i pidin, Ŋa basnen sepalaŋ, i ŋa izignen isoime i pitol so mok funiwoi; me i ŋa ilonlon malikime i sansan nazoi so imatoi.#Joh 6:48; 4:14; 7:37 36Ŋa bo aŋ ŋepaiaŋ, me aŋ ŋa anasaglak ge lamilon so malik.#Joh 6:26, 29 37Mam i ŋa panagime me daŋan ŋa izignen disowoi; me i ŋa izignen isoime me ŋa so ŋebetetaniwoi.#Joh 17:6–8; Mat 11:28; Joh 4:34 38Ŋa didlakge ŋaselak, me ŋa sibeg auag mon dab so ŋepaniwoi, tea, me ŋa noagge ŋaselak i inan auan mon dagom ŋepaniwoi. 39Ge me i ŋa noagge ŋaselak i ibol, I ŋa daŋan panaglak menen ta izignen so padal ilawoi, tea, nal wadanlonpa ŋa faun ŋufuŋunip imaisoi.#Joh 10:28, 29; 17:12 40Me i ŋa noagge ŋaselak i ibol, daŋan me Anut ai denasip ilonlon malik mai i dedeŋaneknen bas iŋalewoi, me ŋa sibeg nal wadanlonpa ŋibisap bas imaisoi.#Joh 5:29; 11:24
Judagaz Jesusoi duŋuzuz
41Meginge Judagaz iwoi duŋuzuz, i ibollakoi, Ŋa sepalaŋ me didlonge iselak me. 42Me i dibol, Me Jesus, Josef inan ai, me tinan taman id so taloŋ tat? I dodin ibol, Ŋa didnenge ŋase?#Luk 4:22 43Jesus auadin jabig pidin, Aŋ nugnug so uŋuzuz mon. 44Tata Mam me ŋa noagge ŋaselak i so izaetap i izignen isonen tea, meginpe nal wadanlonpa ŋibisap bas madowoi.#Joh 6:65 45Profet nadin gazeklon gazelak, Daŋan Anut siben inan kagin peteŋanawoi. Daŋan me Mam inan auan iloŋmeg inan kagin ŋaleime i izignen isoime.#Jes 54:13; Jer 31:33, 34 46Ta bo malanlon Mam so nasilak, tea, me i Anut izinnenge iselak i mon.#Joh 1:18 47Malik mok malik, ŋa aŋ ŋepaiaŋ, me i ŋa ilonlon malik i dedeŋanip basdaŋan.#Joh 3:16 48Ŋa basnen sepalaŋ.#Joh 6:35; Joh 6:31, 32; Kor I 10:3, 5 49Nami temami fatu udaulon mana dianilakge i dimat. 50Sepalaŋ didlonge iselak ŋan ie, tamol ta menen janitap i so imatoi. 51Ŋa basnen sepalaŋ didnenge idulak. Tamol ta menen janitap i dedeŋanip madowoi. Sepalaŋ me ŋa panupanuwain basnenoi ŋipinidinoi me ŋainag tinig.
52Meginge Judagaz nugnug dizoige dibol, Me dodin tamol e inan mudan taniwoi panadoi. 53Mewoi Jesus i pidin, Malik mok malik, ŋa aŋ ŋepaiaŋŋame, aŋ Tamolai inan tinin so anip, inan daz mai so imilip aŋ dudumi basnen tea.#Joh 5:26; 4:14 54Me i ŋainag tinig janip ŋainag daz mai imilimap i dedeŋaneknen basdaŋan, me nal wadanlonpa ŋa i ŋibisap imaisoi. 55Ŋainag tinig me anaŋ niŋon, me ŋainag daz me mileknen naz niŋon. 56Me i ŋainag tinig janimap ŋainag daz mai imilimap i ŋalon madoime, me ŋa i‐lon ŋemadoŋame.#Joh 15:4; Joh I 3:24 57Mam basdaŋan ŋa noagge ŋaselak, me ŋa Mamlon bas ŋemadoŋame egin, megin i me ŋa jiniagime i ŋalon bas madowoi. 58Ŋan me sepalaŋ me didlonge iselak; me temamigaz dianilak egin tea, i dianilakge dimat. I sepalaŋ e janimap i dedeŋanip bas madowoi. 59Azu e daŋan Jesus sinagoglon Kapernaumnen kagin peteŋanameg ipidin.
Sunuzek aenta mug Jesus dibini
60Meglaum kuzum i me diloŋge dibol, Azu me iben mok, ite auan dab paninen iloŋ. 61Ge Jesus ilonlon iloŋge meglaum mewoi duŋuzuzdime i ipidin, Aŋ ewoi lami bebaze? 62Meginpe Tamolai i get imadelak melak imulpa ilawoipe aŋ anasip aŋ dodin aboloi?#Joh 3:13 63Uz i bas inauime, tinin me se mok mon. Azu me ŋa ŋepaiaŋŋame me Uzdaŋan basdaŋan mai.#Kor II 3:6 64Aŋ tata bo lamilon so malik. Funlonge me i Jesus ladinlon so maliklak i iloŋ, i blaninen me mai iloŋ.#Joh 6:36; 13:11 65I bateg ibol, Mewoi ŋepaiaŋlak, tata siben ŋa izignen so isowoi, ŋainag Mam i duziime me mon.#Joh 6:44
66Saen melonge inan meglaum kuzum miz depani, i maig faun so ditoz. 67Meginge Jesus meglaum twelf mai pidin, Aŋ mai binagpa auwoi?#Joh 11:8; Luk 22:28 68Me Simon Petrus auan jabig ibol, Ujazen am it izinnen alawoi? o dedeŋaneknen bas inan azudaŋan.#Joh 6:63 69Me am lamalon malik, dab apani mai, o Kristus, Anut bas inan Ai mok.#Joh 1:49; 11:27 70Jesus auadin jabig ibol, Ŋa aŋ twelf so ŋipilianaŋ tat? Me aŋ ilonnen ta Satan nanun.#Joh 13:18; 15:16 71Me i Judas Iskariot, Simon inan aiwoi, ibol. I ai twelf ilonlon mademeg i blaniwoi kankanime.
Currently Selected:
Johanes 6: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
