Johanes 7
7
JUDAGAZ I JESUS INAN SIGIANEKOI BUZUDIN ISA, 7–10
Judagaz Jesus mai dupusai
1Abaŋ e uzig Jesus Galileanen itozse itozle, i Judeanen itoznen imoilak, Judagaz i dufuni menen.#Joh 6:1; 5:18 2Gazo Juda nadin tazas ubou siziz.#Lew 23:34 3Meginge inan tain depai, Umaispa Judeanen ulap men oina meglaum nauknauk o unauume me denasiwoi.#Joh 2:12; Mat 12:46; Apos 1:14 4Tamol tata beŋten itasawoi ibolmap i kukumkukum uzat so inauime; o abaŋ unautap o panupanu noadinnen unau.#Mat 12:16 5Inan taingaz mai iwoi ladinlon so maliklak.#Mat 13:55 6Meginge Jesus i pidin, Ŋainag saen me so idu, ge aŋnami saen me sansan ienime.#Joh 2:4 7Tealakgaz me aŋ zezeŋanaŋnen tea, ge ŋa i dezezeŋanagdime, nadin nauknauk salan me beŋten ŋabollakoi.#Joh 3:19; 15:18 8Aŋ sebami ubou e anasiwoi ala, ŋa bo so ŋamugpa ŋalawoi, ŋainag saen mok me so idulak. 9I azu e pidinlakge i Galileanen kin made.
10Inan taingaz uboulon dilemeg i maig ile, beŋbeŋ tea, tea, kin melabublon egin ile. 11Meginge Judagaz uboulon i debezanig dibol, I domten? 12Me tamolai ilonnen iwoi komkom kin zen ien. Aenta dibol, I tamol gauai. Me aenta i dibol, Tea, i tamolpain se wizidinime.#Mat 27:63 13Tamolai ta bo iwoi beŋten so dibol i Judaoi dizez.#Joh 9:22; 12:42; 19:38
14Me ubou bisonlon Jesus tempellon iduseg azu peteŋana.#Joh 7:37; Luk 19:47 15Meginge Judagaz i dizut, dibol, Tamol e dodin gazek iloŋ, i skul ujanlon so madelak.#Mat 13:54 16Jesus i auadin jabig ibol, Ŋainag peteŋanek azu me ŋainag tea, i me ŋa noagge ŋaselak me inan.#Joh 12:49 17Tata i inan auan uzi paniwoi ibol i peteŋanek azu Anut izinnenge iselak me iloŋoi, tea, sibegoi ŋabol tat me mai iloŋoi. 18Me i sibenoi ibolime i siben inan biŋan bezaniime. Ge i me i inauge iselak me inan biŋan bezanimap i me malik, ilon sekauk ta so ien.#Joh 5:41–44 19Moses aŋ so tat kibiaiŋ panaŋ? Me aŋ bo taimon ta kibiaiŋ uzi so paniime. Aitoi ŋa funagoi lami ienime.#Apos 7:53; Joh 5:16, 18 20Tamolpain auan diabig dibol, O buga salandaŋan. It o funowoi ilon ienime?#Joh 8:48, 52; 10:20 21Jesus auadin jabig i pidin, Ŋa uzat ta ŋenaulak me aŋ daŋan mewoi azutlak.#Joh 5:16 22Moses tinin taleknen muluŋ panaŋlak (me Moses i fun tea, tea, me temamigaz nadin), me aŋ uboulon tamol tinin ataleame.#Gen 17:10–12 23Tamol ta Moses inan kibiaiŋ so tefalokoi uboulon tinin talemap, aŋ buzumi isa me ŋa tamol ta uboulon tinin ŋikibinelak? 24Aŋ abaŋ fon mon so tali mon, tea, aŋ taoz atali.#Joh 8:15
25Meginge Jerusalemwain ta dibol, I so tat me i dufuniwoi defenafundime?#Joh 7:1, 19 26I gik ibolge beŋten ibolime, me i azu ta so depaidime. Gaten i tat malik diloŋ ŋan i Kristus. 27Id tamol e domtenge iselak me taloŋlak. Me Kristus isemap tamol ta so ilonoi i dontemge itase.#Joh 7:41 28Meginge Kristus iwog tempellon azu pidinmeg ibol, Aŋ ŋa aloŋ, me ŋa domtenge ŋaselak me mai aloŋ? Ge ŋa sibeg ŋabolge so ŋase; me i ŋa noagge ŋaselak i malik, aŋ i so aloŋ. 29Ŋa bo i ŋaloŋ, ŋa i izinnenge ŋaselakoi, me i noagge ŋaselak.#Mat 11:27 30Meginge i diabiwoi denau, ge tamol ta jabiwoi niman so isou, inan saen get so idulak.#Joh 8:20; 13:1; Luk 22:53 31Ge tamolpain menen kuzum iwoi ladinlon malikge dibol, Kristus isemap i kubelmaŋau tamol e inaulak me kin nenazip inauwoi tat?
32Farisea tamolpain iwoi dukumukommeg diloŋge me waliŋgaten farisea mai i Jesus diabiwoi tamolbegabeg ta denauge dile. 33Meginge Jesus ibol, Kitek ta mon ŋa aŋ maip temadowoi, uzip me noagge ŋaselak i izinnen ŋalawoi.#Joh 13:33 34Aŋ ŋa abezanagoi ge so anasagoi; ŋa ŋemadoŋame melak aŋ alanen so aloŋoi.#Joh 8:21 35Megin Judagaz nug paipaig dibol, I domten ilawoi me id tebezanip so tenasiwoi? I pezetaleklon Grik ilonlon Grikgaz kagin peteŋananenoi ilawoi? 36Azu i ibolime me dodin, Aŋ ŋa abezanagoi ge so anasagoi, me ŋa ŋemadoŋame melak aŋ alanen so aloŋoi?
37Nal wadanlon ubou me inan nal ujanlon Jesus itiuz, ibobge ibol, Tamol tata nazoi imattap izignen isop miliŋan.#Lew 23:36; Joh 4:10, 14 38Me i ŋa ilonlon malik azu gazek ibollak egin, inan bubenlonge naz basnen itasawoi.#Jes 44:3; Joh 4:14 39Abaŋ e bo Uzgunoi ibol, me i ladinlon malik me deŋalewoi ibol; Uzgun get so panilak, Jesus i tinin so bulig iŋalelakoi.#Joh 16:7; Kor II 3:17
40Meginge tamolai aenta i azu me diloŋlag i Malik e dibol, i profetoi dibollak ŋan me.#Joh 6:14; Deut 18:15 41Aenta dibol, E me Kristus. Ge aenta dibol, Tea, Kristus Galileanenge isowoi.#Joh 1:46 42Azu gazek so tat ibol Kristus i Dawid inan dazlon imaisoi, Betlehem panulonge itasawoi, Dawid imadelak melon.#Sam II 7:12; Mika 5:1; Mat 2:5, 6; Kan 89:4 43Meginlakoi tamolpain iwoi leŋadinlon tezepale. 44Ilonnen aenta i diabiwoige tata nimadin tininlak so denau.#Joh 7:30
45Meginge opasgaten waliŋgaten farisea mai zidinnen dimulge dileg me dipidinge dibol, Aitoige aŋ so uduzig ase? 46Opasgaten auadin diabig dibol, Get ta tamol e egin azu so ibol.#Mat 7:28, 29; Mat 27:63 47Meginge farisea auadin diabig dibol, Aŋ mai se wiziaŋlak? 48Tamolujan ta, tea, farisea tat i ladinlon maliklak? 49Pifoldaŋan bo me kibiaiŋ so diloŋ i meselanilak. 50Nikodemus me get Jesus izinnen ilelak, i mai tamolujanlak, i me pidin.#Joh 3:1, 2 51Idinad kibiaiŋ me tamol ta malanmalan so sedazemap i me inau me fun so taloŋmap se meselaniime.#Deut 1:16, 17 52I auan diabig dibol, O mai Galileawain? Azu gazeklon laŋaipe anasiwoi, Galileanenge profet ta so isowoi.
Currently Selected:
Johanes 7: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
