Johanes 3
3
Nikodemus
1Farisea tamol ta made, nean Nikodemus Judagaz nadin kibiaipanek ta,#Joh 7:50; 19:39 2I me tidomlon Jesus izinnen iseg ipai, Tamoluja, am aloŋ o peteŋanek Anut izinnenge uselak, nasi, tamol ta Anut i mai teatap i maŋau o unauumelak me inaunen so iloŋ.#Mat 22:16; Joh 9:33 3Jesus auan jabig ipai, Malik mok malik, ŋa o ŋepaoŋame, ta i faun so inau mugmap i Anut inan kiŋdom nasinen tea.#Mat 18:3; Pet I 1:23 4Nikodemus i ipai, Tamol dinou inaulak me dodin faun inauwoi? I faun tinan teŋaenlon idulap faun inau mugoi tat? 5Jesus auan jabig ibol, Malik mok malik, ŋa o ŋepaoŋame, tamol ta nazlon Auanuzgunlon faun so inaumap i Anut inan kiŋdomlon so idulawoi.#Hesek 36:25–27; Ef 5:26; Tit 3:5 6Me i tininlon mon inaulak me i se, me i Auanuzgunlon inaulak me i niŋon.#Joh 1:13; Gen 5:3; Kan 51:7 7So uzut mon ŋa o ŋepaolak, Aŋ faun noaŋ mokoi. 8Tim me paluwoi ibol paluime, liŋan mon uloŋume; it domten tatge iseg, domten tat ilaimelak o so uloŋ; tamol ta Auanuzgunlon faun inau mugmap abaŋ me i egin. 9Nikodemus auan jabig ipai, Abaŋ e dodin tatge? 10Jesus auan jabig ipai, O Israel nadin peteŋanek o me so uloŋ? 11Malik mok malik, ŋa o ŋepao, abaŋ aloŋlak menen abolame, anasiamelak me sigianiame, me aŋ nama totol dab so apaniame.#Joh 7:16; 8:26, 28 12Ŋa tannen abaŋoi ŋepaiaŋlak me aŋ lamilon so malik, me dodin didnen abaŋoi ŋepaiaŋtap me lamilon malikoi?#Luk 22:67 13Ta i didlak so iduselak, tea, didlakge idulak ŋan i mon, Tamolai didlak madoimelak me.#Ef 4:9 14Moses fatu udaulon mot biseg ikuklak egin, megin mok mon Tamolai bisap ikuk mokoi.#Num 21:8, 9; Joh 12:32, 33 15Meginpe me i ilonlon malikmap so padaloi, tea, dedeŋanip bas gauai madowoi. 16Anut i megin panupanuwain ilon pinidinlak, tamolpain daŋan i ladinlon malikmap i so depadaloi, me i dedeŋanip putudin isap bas mok demadowoi.#Rom 5:8; 8:32; Joh I 4:9 17Anut inan Ai panupanuwain meselanawoi tanlak so inaug iselak, tea, i‐lon panupanuwain putudin pasiwoi mewoi mon.#Joh 5:22; 12:47 18Me i ilonlon malik i betenaek padalnen so ŋalewoi, ge ta i ilonlon so malik i mug betenaek padalnen ŋale, i Anut inan Ai taimon mok inan nean ilonlon so maliklakoi.#Joh 3:36; 5:24 19Beteneak padalnen ŋan e, me sul tanlak iselak ge tamol mafuzoi mon dimat, suloi egin so dimat, inadin nauknauk me salanlakoi.#Joh I 5:9–11 20Daŋan i abaŋ salan inauime i lelaman zezeŋaniime, sul izinnen mai so isoime, inan nauknauk beŋten so itasawoi mewoi.#Ef 5:13 21Ge ta i abaŋ malik inauime i sul izinnen isoime, meginpe inan nauknauk me i Anutlon inaulak me beŋten nasiwoi.
Johanes faun Jesusoi sigiani
22Me uzig Jesus inan meglaum mai Judea fatulon dile, melak i mai flanameg demade.#Joh 4:1, 2; 5:1; 7:1 23Johanes mai Aenon Salim izinnen flanameg itoz, melak naz wililuk kinkin mai kin kuzum dienlakoi. Tamolai diseg flanek deŋale. 24Johanes get sebaneklon so denaulak.#Mat 14:3
25Meginge Johanes inan meglaum Judawain ta mai liluŋlon tinin flanekoi azu itase. 26I me Johanes izinnen diseg depai, Rabi i me Jordan akilon o maig amadelak, iwoi o sigianilak, ŋan i flanameg itozime, me tamolai daŋan i izinnen diladime.#Joh 1:26–34 27Johanes auadin jabig ibol, Tamol ta siben abaŋ ta ŋalenen tea, didnenge idup panimap megin mon.#Heb 5:4 28Aŋ sebami aloŋ apasi me ŋa ŋabollak, ŋa Kristus tea, ŋa i naonnen totol ŋamugsawoi noaglak.#Joh 1:20, 23, 27 29Aifazeŋ i fazeŋdaŋan, me damag tizan i inan tizan mug pain ŋalelakoi iwoi zigeime. Me ŋainag zigieknen mug niŋon inau.#Mat 9:15; 22:2 30I me ujanoi, ŋa me mitinoi.
31Me i latnenge isoime i abaŋ daŋan nenazag madoime. Me i tanwainlak i tannen mon, tanoi mon kibiaiime; me i didnenge isoime i abaŋ daŋanlon isou itaseg madoime.#Joh 8:23 32Abaŋ i nasi iloŋ mailak me sigianiime, me tamol tata inan sigianek so deŋaledime.#Joh 3:11; 8:26, 28 33Me i inan sigianek azu dab ipanilak i Anut malik e me beŋten inau. 34Me Anut inaug iselak i Anut azu ibolime, Anut i Uzgun wadanwadan mon so paniimelakoi.#Joh 1:33, 34 35Taman i Ai ilon pani, abaŋ daŋan i nimanlon inaulak.#Joh 5:20; Mat 11:27 36Me i Ai ilonlon malik i bas dedeŋaneknendaŋange madoime; ta i ilonlon so malik i bas dedeŋaneknen so nasiwoi, Anut inan buzun i fonlak ienoi.#Joh 3:15, 18
Currently Selected:
Johanes 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
