Johanes 2
2
Jesus inan maŋau matu
1Nal tollon Kana panu Galilea fatulon ai ta pain depaniwoi dibol. Jesus tinan mai men ile. 2Jesus inan meglaum mai betezemaneklon dilawoi totol ise. 3I wain teatag tinan Jesus ipaig ibol, I wain tea. 4Jesus i ipai, Pain, ŋa o mai abaŋte? Ŋainag saen so idu.#Joh 19:26; Mat 12:48; 27:19 5Inan tinan begabeg pidin, I abaŋ tawoi paiaŋtap aŋ auan uzi apani.#Gen 41:55 6Ab damonlon naz niŋon siks disugnen denaug ienime me tenaek gallon 18 ilap 20.#Mar 7:3, 4 7Jesus i pidin, Naz jasip niŋon me auadinnen. I me dejasig auadinnen mok.#Mat 9:15; 26:29 8I pidin, Ta jasip anaŋ naiknen gaten apani. I me denau. 9Anaŋ naiknen gaten i wain me get naz se me kukumzi nasilag, fun so iloŋtag me begabeg i naz dejasilak i mon diloŋ, i aifazeŋ wagi. 10I ipai, Tamol daŋan get wain gauai pinidinpa dimilidime, aloupa tamolpain kin iduseg dimililak i kin salan me dimiliwoi. Ge o wain gauai pizianilak. 11Maŋau me Jesus funlon Kana panu Galileanen inaug inan kubel boboloanig idu, me meglaum i ladinlon malik.#Joh 1:14, 50; Jes 9:1
JESUS INAN SIGIANEK ISRAEL FATU FUAM, 2:12—4:54
Jesusgaz Kapernaumnen dile
12Me uzig i Kapernaumnen idu, i, inan tinan, inan tain meglaum mai, ge i melak nal kuzum so demade.#Joh 7:3; Mat 4:13
Jesus Jerusalemnen tempellon ile
13Juda nadin Pasa ubou me sizizge Jesus Jerusalemnen ile.#Joh 6:4; 11:55 14Men tempellon tamolpain bulmakau, belelek bun mai didadmeg gaŋmalan poaleknen tamol mai dematalmeg il. 15Meginge i mollon funeknen dazuk bekanig imaisge daŋan tempellonge kuduag beŋten didu, belelek bulmakau mai; i poaleknen tamol nadin gaŋmalan sezaneg ilemeg tebol mai potoloani. 16Bun inan dadeŋtamol me ipidin, Abaŋ e aŋalep ala, ŋainag Mam inan ab me dadeŋab so anau mon. 17Inan meglaum ladin isou, azu me gazelak, Oina aboi wagai me jiniagoi.#Kan 69:10 18Meginge Judagaz i desedazeg dibol, Bagoz ait peteŋanama me naon o abaŋ e unauume?#Mat 21:23 19Jesus auadin jabig ipidin, Tempel e sebazip nal tollon faun ŋesase mugoi.#Mat 12:6; 26:61; 27:40 20Meginge Judawain dibol, Umaz 46 tempel e desasemeg demade, me o nal tollon faun sasewoi ubol? 21Ge i inan tinin inan tempeloi ibol.#Kor I 6:19; Joh 12:16 22Alouge i mateŋlonge imaislakge inan meglaum ladin isou i get megin ipidinlak. Meginge i azu gazek me ladinlon malik, azu Jesus ibollak me mai. 23I Jerusalemnen Pasa ubouoi mademeg kuzum inan kubelmaŋau denasig inan nean ladinlon malik.#Joh 7:31; 8:30 24Ge Jesus i so inau pinidin, i tamol daŋan iloŋ. 25Tata tamol inan kankan peteŋaniwoi i so ibol, i siben tamol inan fun iloŋ pasilakoi.#Mar 2:8
Currently Selected:
Johanes 2: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
