Johanes 4
4
Samaria pain
1Mewoilakoi Ujanzen dab panitag Farisea i diloŋ Jesus i Johanes nenazig tamolpain kin kuzum iŋalge flanaime#Joh 3:22, 26 2(me Jesus so flana, inan meglaum mon), 3i Judea binig faun mug Galileanen ile. 4I Samaria fatu bison mon bufateg ile.#Gen 48:22; Jos 24:32 5Meginge i Samaria inan panu talon itase me nean Sikar, tan me Jakob inan ai Josef panilak me izinnen. 6Men Jakob inan naz sazek ien, me Jesus i tinin izozge naz sazek dabinlon matal. Gazo ad liluŋ.
7Samaria pain ta naz jasiwoi ise. Jesus i ipai, Naz kin, panag ŋimilipe. 8Inan meglaum me anaŋ didadoi panulon dile.#Mar 6:37 9Ge Samaria pain i ipai, Me dodin o Judatamol o ŋa nazoi paiagume, me ŋa Samaria painlak, Juda tamolai i Samariawain mai so ditozdime.#Luk 9:53 10Jesus auan jabig ipai, O Anut inan zaiŋ uloŋpeges, o uloŋ maip ite o ipao, naz kin panagpe, o i upaipe i basnen naz ta panowoi.#Joh 7:38, 39 11Pain i ipai, Tamoluja, o naz jasinen abaŋ ta tea, naz sazek me tig, o domten naz basnen me ŋalewoi. 12O amnama temama Jakob kin nenazig uja tat, me i naz sazek me penamag i siben naz me mili, inan nanun dazuk mai dimollak.#Mat 12:41, 42 13Jesus auan jabig ibol, Me i naz menen miliime i faun nazoi imatoi.#Joh 6:58 14Ge naz me ŋa ŋepaniwoi i faun nazoi so imatoi, me i ilonlon dedeŋanip basnenoi bubuaiwoi.#Joh 6:27, 35; 7:37–39 15Pain i ipai, Tamoluja, naz me panagpe, ŋa faun nazoi so ŋamatoi, faun naz so ŋejasiwoi.#Joh 6:34
16Jesus i ipai, Ulap oina tamol wagip elak aso. 17Pain auan jabig ibol, Ŋa tamol tea. Jesus i ipai, O gauai ubol, ŋa tamol tea. 18O tamol faifdaŋanlak, ge gazo o maig amadoame me oina tea, o melon malik ubol. 19Pain i ipai, Tamoluja, ŋa mug ŋaloŋ o profet. 20Amnama temama did elak dogodoani, me aŋ abol tamolai daŋan Jerusalemnen mon dogodoaniwoi.#Deut 12:5; Kan 122 21Jesus i ipai, Pain, ŋa ŋabolŋame me ilolon malik, saen iduwoi melon aŋ elak mon Jerusalemnen mai mon Temami so godoaniwoi.#Mar 14:58 22Aŋ godoaniamelak me fun so aloŋ, tibud it tat, me am bo nama Tibud aloŋ, patunisanen me Judagaz i funlakoi.#Kiŋ II 17:29–41; Jes 2:3 23Saen bo iduwoi me gazo mug iduime, me tamolai i Mam mai malik dogodoaniwoi. Me i megin dogodoanidimelak iwoi Mam dab inauime.#Joh 5:25 24Anut i Uzgun niŋon, me i dogodoanidime i Auanuzgundaŋan bubudin malikdaŋan mai dogodoaniwoi.#Kor II 3:17 25Pain i ipai, Ŋa ŋaloŋ Mesias isowoi, me i Kristus deblanidime. I isop i abaŋ daŋanoi totol penamawoi.#Joh 1:41 26Jesus i ipai, Ŋa ŋan, o mai tikibiaitame.#Joh 9:37; 10:25
27Meginge inan meglaum diseg Jesus pain mai dikibiaitag dizut. Ge ta so sedazeg ibol, Abaŋte bezaniume? Aitoige i maig ikibiaiame? 28Meginge pain inan nabud binig panulon ileg tamol pidin, 29Asop tamol ta anasi, abaŋ ŋenauŋamelak me daŋan ipaiag. Abolpe i Kristus tat? 30Meginge i panu dibinig i izinnen dise.
31Meglaum deseseŋanig dibol, Tamoluja, wani. 32I bo ibol, Ŋa anaŋ tadaŋan me aŋ so aloŋ.#Joh 4:34; Mat 16:7 33Meglaum mewoi nug paipai, Tamol ta janeknen ta ŋaleg iseg pani?#Joh 17:4; Mat 4:4 34Jesus ibol, Ŋainag anaŋ me i ŋa noagge ŋaselak inan auan ŋuzi ŋepaninen, inan uzat ŋenaup bininen ŋan me. 35Aŋ so tat abol, Fulei palgen binip melaun saen iduwoi? Aloŋ, ŋa aŋ ŋepaiaŋ, Melami bisa, baza um anasi, i mug demelaundime.#Mat 9:37; Luk 10:2; Apos 8:25 36Me i niŋon ŋaleime i uzat naon ŋaleime, dedeŋaneknen bas inan niŋon temanaime; meginpe paektamol, niŋon ŋalelak mai judin isa taimonoi.#Jes 9:2 37Melon azu me malik me ibol, Ta fabul ipaeime, ta niŋon ŋaleime. 38Ŋa uzat aŋ so anaulak melon ŋonoaŋge abaŋ melaun aŋalewoi. Tamol aenta dimugseg uzat denaulak, aŋ inadin uzat asebatelak.
39Samariawain kuzum ladinlon malik, pain azu ibollak sinan, i ibol, Abaŋ daŋan ŋa ŋenaulak me ipaiag pasi. 40Samariawain i izinnen diselag i dogodoanig zidinnen kin madowoi depai. I nal azugen maig demade.#Mat 8:34; Luk 9:53 41Tamolai subuŋan ta mai Jesus inan azuoi ladinlon malik. 42I pain depai, O am paiamalakoi mon lamalon so malik, tea, am sebama inan auan aloŋlak, am aloŋ i malik Kristus, tan inan Patunpaseknen.
Jesus opasgaten ta inan ai kibine
43Ad azugen binig Jesus idug Galileanen ile.#Mat 4:12 44Ge Jesus siben ibol, Profet i funpanulon biŋan tea.#Mat 13:57; Mar 6:4; Luk 4:24 45I megin mon Galileanen itaseg Galileawain i abaŋ Jerusalemnen ubou ujanlon inaulak me denasilakoi i Gauai usie depai. I mai ubou ujan denasiwoi dilelakoi.#Joh 2:23
46Meginge Jesus faun Kana panu Galileanen nazlon wain inaulak men itase. Melak kiŋ inan opasgaten ta me inan ai maiaidaŋan Kapernaumnen madoime.#Joh 2:1, 9 47I Jesus Judeanenge Galileanen iselak me iloŋge i izinnen ileg godoanig i ilap inan ai kibinewoi, i imatoi mok inauimelakoi. 48Meginge Jesus i ipai, Aŋ bagoz kubelmaŋau mai so anasip aŋ lamilon so malik.#Joh 2:18; Kor I 1:22 49Opasgaten i ipai, Ujazen, udu uso, ŋainag nanug so imatlak eginmap. 50Jesus i ipai, Segauz ula, oina ai bas madoime. I azu Jesus i ipailak me ilonlon malikge inannen ile. 51I idug dallak inan begabeg maig naon tazetazeg inan ai bas madoime me depai.#Mat 8:6 52Meginge i sodoz pinidin saen saŋepte tinin gaulak. I auan diabig dibol, Noznen admetelaen wonlon maiai ibinilak. 53Meginge taman i iloŋ saen me moklon Jesus i ipai, Oina ai bas madoime, Meginge i siben ilonlon malik, inangaz daŋan mai,#Apos 16:15, 31 54Me kubelmaŋau ta Jesus inau, Judeanenge Galileanen isemeg saen melon.#Joh 2:11, 23
Currently Selected:
Johanes 4: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
