Johanes 1
1
AZU TININ NALE, 1:1–18
Anut inan azu
1Fun moklon Azu ien, Azu me Anut mailak, me Azu Anut mai dikol.#Joh I 1:1, 2; Joh 17:5; Bo 19:13 2I fun moklonge Anut mailak.#Met 8:22 3Abaŋ daŋan I‐lon inaulak, i tealon abaŋ taimon ta so inaulak.#Kol 1:16, 17; Heb 1:2 4I‐lon bas niŋon ienlak, bas niŋon me tamolai nadin sul.#Joh 5:26; 8:12 5Sul me mafuzlon lelaman, me mafuz sul me so jabi ŋale.#Joh 3:19 6Tamol ta inaulak me Anut inaug iselak, i nean Johanes.#Luk 1:13–17, 57–80 7Ŋan i totoloi ise, i suloi sigianip itozoi, meginpe tamolpain daŋan i‐lon ladinlon malikoi.#Mat 3:1 8Me i siben sul me tea, ge i sul mewoi sigianip itozoi ise.#Joh 1:20
9Sul niŋon me tamol daŋan lelaman pinidinime me tanlak isoimelak; 10i tanlak made, tan me I‐lon itaselakge tan inan tamolpain me i so diloŋ.#Joh 1:3–5; 14:17 11I inannen iselak, ge inangaz me lo so didu. 12Ge tata i deŋalelak i Anut nanun denauwoi tiwon pinidin, me inan nean ladinlon maliklak ŋan me.#Gal 3:26; Apos 4:12 13I daz tezepaleklon, tinin ibollaklon tamol ibollakoi so inaulak, tea, Anutlon mon.#Joh 3:5, 6
14Me Azu tamol tinin jabig leŋadinlon made, me am inan kubel anasi, me Anut siben inan Ai mok inan kubel egin, lo mok, malik niŋon mai.#Jes 7:14; Pet II 1:16, 17; Jes 60:1 15Johanes i sigianig iwog ibol, I ŋan me ŋa iwoi ŋabollak, i me ŋa uzagge isoime, i ŋa nenazag, i imugsen madelakoi.#Joh 1:27, 30 16I inan subuŋan idusanenlon id lo sedageg taŋal.#Joh 3:34; Kol 1:19 17Kibiaiŋ me Moseslon pinidinlak, ge lo, malik niŋon mai me Kristuslon itase.#Rom 10:4; Kan 25:10 18Tata saen talon Anut so nasilak, inan Ai taimon me Taman petazen dud paniime i mon Anut boboloanilak.#Joh 6:46; Joh I 4:12; Mat 11:27
JESUS INAN SIGIANEK FUN, 1:19—2:11
19Saen Judawain waliŋgaz ta kanamkamaŋ mai Jerusalemnenge denaug sodoz depani, O itai?#Luk 3:15, 16 20Johanes megin sigianig beŋten ibol, so kakez, Ŋa Kristus tea.#Apos 13:25 21I sodoz depanig dibol, Abaŋte, o Elias? I ibol, Tea. O profet ŋan i dibollak me? I me auadin jabig ibol, Tea.#Mat 17:10; Deut 18:15 22Meginge i depai, O itai? Ubolpa am tamol donoamalak me pidinoi. O sibewoi dodin ubolume? 23I ibol, Ŋa auan ta me udaulon iwogime, Ujanzen inan dal tiduk nau, profet Jesaia ibolime egin.#Jes 40:3; Mat 3:3; Mar 1:3; Luk 3:4
24Tamol i denaulak menen aenta me farisea. 25I dibol, O Kristus, Elias, profet ta isowoi dibollak, me teatap o aitoi flanameg utozume?#Mat 21:25 26Johanes auadin jabig ibol, Ŋa nazlon ŋeflanaŋame, ge taimon leŋamilon itiuzime me aŋ so aloŋ.#Mat 3:11; Mar 1:7, 8 27I ŋan me i ŋa uzagge isoime, me inan nienaten inan mol ŋa ŋeflalenen so ŋaduse.#Joh 3:26 28Abaŋ me Betanianen Jordan akilon Johanes flanameg itozmeg men inaulak.#Mat 3:6, 13
Johanes Anut inan Belelek Nanun peteŋana
29Nal uzig Jesus Johanes izinnen isemeg nasig ibol, Anasi, Anut inan Belelek Nanun me tan fatu e inan aupasek pasiime.#Jes 53:7; Joh 1:36; Joh 1:15, 27 30I ŋan me iwoi ŋa ŋabollak, ta ŋa uzagpa isowoi, i wagamnen, i ŋa imugsen madelak. 31Ŋa i so ŋaloŋ, ge i Israel noadinnen beŋten itasawoi mewoi ŋa ŋaseg nazlon flanameg ŋatoz. 32Johanes i sigianig ibol, Ŋa Uzgun didnenge bun egin idumeg ŋenasig i fonlak made.#Mat 3:16; Mar 1:10; Luk 3:22 33Ŋa i so ŋaloŋ, ge me i nazlon ŋeflanawoi noaglak i ŋa paiag, Ŋan Uz idup fonlak mademap ŋan i Auanuzgunlon flanag itozime.#Luk 3:2; Mat 3:11 34Me ŋa ŋenasig ŋisigiani mai, i Anut ai.#Mat 3:17
Meglaum azugen Jesus izinnen dile
35Nal uzig Johanes inan meglaum azugen maig ditiuzge 36i Jesus itozmeg inasig ibol, Nasipe, me Anut inan Belelek Nanun.#Joh 1:29; Jes 53:7 37Meglaum azugen azu me ibolmeg diloŋge i Jesus duzi. 38Jesus i idaŋseg i duzimeg ilge i pidin, Abaŋte abezaniame? I depai, Rabi (me fun peteŋanek), o domten madoume? 39I ibol, Asop anasi. I diseg i madoime aben denasig ad me i maig demade, gazo ad sakekge admetelaen foar. 40Ai azugen me Johanes inan azu diloŋge duzilak menen ta Andreas, Simon Petrus inan tain.#Mat 4:18 41I malan siben inan tain Simon bezanig ipai, Am Mesias anasilak, me Kristus.#Sam I 2:10; Kan 2:2 42I me Kristus izinnen duzig ise. Me Jesus inasig i ibol, O Simon, Jonas inan ai, O Kefas blanowoi, me fun Pat.#Deut 18:18; Jes 7:14; 53:2; Jer 23:5
Filipus Natanael mai Jesus dusunuzidime
43Nal uzig Jesus Galileanen ilawoi ilemeg i Filipus nasig ipai, O ŋa sunuzagpa utoz. 44Me Filipus Betsaidawain, Andreas Petrus mai panu taimon. 45Filipus Natanael nasig ipai, Me am Moses kibiaiŋ profet nadin gazeklon mai gazelak, Jesus Nasaretwain, Josef inan ai, me anasi.#Deut 18:18; Jes 7:14; 53:2; Jer 23:5 46Natanael i ipai, Abaŋ gauai ta Nazaretnenge isowoi tat? Filipus ibol, Usop nasi.#Joh 7:41, 52 47Jesus Natanael isemeg nasig i ibol, Anasi, Israelwain malik, ilon sekauk tea.#Kan 32:2; 73:1 48Natanael i ipai, O dodin ŋa uloŋ? Jesus auan jabig ipai, Filipus o so wigiomeg, o guzab paenlon mademeg ŋa o ŋenaso. 49Natanael auan jabig ibol, O Rabi, o Anut Ai, o Israel nadin kiŋ.#Sam II 7:14; Kan 2:7 50Jesus auan jabig ibol, Ŋa o guzab paenlon ŋenasog ŋepaolakoi o ŋa ilolon malik. O abaŋ e nenazilak ta nasiwoi.#Mat 14:33; 16:16 51I me pidin, Malik mok malik ŋa aŋ ŋepaiaŋ, aŋ did fuep Anut inan eŋel Tamolai fonlak diduse didulemap ailoi.#Gen 28:12; Mat 4:11; Mar 1:13
Currently Selected:
Johanes 1: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
