Johanes 14
14
Jesus abed get kibinelak; Jesuslon id Anut Mam taloŋ
1Bubumi so alan mon; aŋ Anut lamilon malik, ŋa mai lamilon malik. 2Ŋainag Mam inan ablon galuŋ kuzum dien. Megin teape ŋa abemi ŋikibinewoi ŋalaŋame ŋepaiaŋpe? 3Ŋa aŋoi aben ŋikibinewoi ŋalemap ŋa faun ŋamulpa izignen amadowoi ŋuduzaŋoi, panu ŋa ŋemadoŋame melon aŋ mai amadowoi.#Joh 12:26; 17:24 4Ŋa ŋalaŋame me dal aloŋ. 5Tomas i ipai, Ujazen, o ulaume me am so aloŋ, am dodin dal aloŋoi? 6Jesus i ipai, Ŋa sibeg mon dal, malik niŋon mai, bas niŋon mai; tata siben sinan Mam izinnen so ilawoi, ŋalon mon ilanen iloŋ.#Heb 10:20; Mat 11:27; Joh 11:25; Rom 5:1, 2 7Aŋ ŋa aloŋpeges aŋ ŋainag Mam mai aloŋpe; me gazo aŋ i aloŋ anasi mailak.
8Filipus i ipai, Ujazen, Mam peteŋanamape, meginpe iduse e aboloi. 9Jesus i ipai, Filipus, ŋa saen melaen aŋ maig temadelakge o ŋa so uloŋ? Me i ŋa nasagmeg i Mam inasilak. O dodin mon ubol, Mam peteŋanamape.#Joh 12:45; Heb 1:3 10O ilolon so malik ŋa Mamlon ŋemadoŋame, me Mam ŋalon madoime? Azu me ŋa ŋepaiaŋŋame me sibeg ŋesepaleg so ŋabolŋame. Mam i ŋa maig amadoame i inan nauknauk inauime.#Joh 12:49 11Ŋa Mamlon, Mam ŋalon madoime me lamilon malik, teatap nauknauk ŋa ŋenauŋame mewoi lamilon malik.#Joh 10:25, 38; 14:20
Ilopanek, gadiŋ, uzipanek mai. Jesus so binad, Uzgun ipanadge Anut Jesus mai taloŋ
12Malik mok malik, ŋa aŋ ŋepaiaŋ, me i ŋa ilonlon malik i nauknauk me ŋa ŋenauŋame me i mai inauwoi, tea, i inaup ŋainag me nenaziwoi, ŋa Mam izinnen ŋalaŋamelak.#Mar 16:19, 20 13Aŋ abaŋ tawoi neaglon agodmap me ŋa dab ŋepaniwoi, meginpe Mam Ailon biŋan imaisoi.#Joh 15:7; Mar 11:24 14Aŋ ŋainag neaglon abaŋ tawoi agodmap ŋa ŋenauwoi.#Joh 16:23, 24
15Aŋ lami apanagmap aŋ ŋainag kibiaiŋ uzi apaniwoi.#Joh 15:10; Joh I 5:3 16Me ŋa Mam ŋogodoanip i Ilonŋaleknen ta ipanaŋoi, i dedeŋanip aŋ maip amadowoi.#Joh 15:26; 16:7; 14:26 17Maliknen Uz me tealakgaz deŋalenen so diloŋ, i so denasi, so diloŋ mailak. Aŋ bo i aloŋ, i aŋ maig amadoamelak, lamilon mai madowoi.#Joh 16:13; 7:39
18Ŋa aŋ so ŋibinaŋpa Temami tea egin amadowoi, ŋa ziminen ŋaduwoi. 19Kitek ta maip tealakgaz so denasagoi, ge aŋ anasagoi; ŋa sibeg bas ŋemadoŋame, mewoi aŋ mai bas amadowoi.#Joh 16:16 20Nal melon aŋ aloŋoi ŋa Mamlon ŋemadoŋame, me aŋ ŋalon, ŋa aŋlon ŋemadoŋame.#Joh 17:21–23
Ta Jesus ilon panimap i inan kibiaiŋ mai uzi panip Anut i maip demadowoi
21Me i ŋainag kibiaiŋdaŋan, dab paniime mai ŋan i ilon panagime; me i ŋa ilon panagime, Mam i ilon paniime, ŋa mai ilog ŋepanip bunug boboloanip izinnen ŋatasawoi.#Kor II 3:18 22Judas (Iskariot tea) me i ipai, Ujazen, dodinge o zimanen boboloanop uduwoi, me tealakgaz zidinnen tea? 23Jesus auan jabig ipai, Tamol ta ilon panagmap i ŋainag azu uzi paniwoi; meginpe ŋainag Mam i ilon panip am izinnen adup i maip amadowoi.#Joh 13:34; 14:21; Met 8:17; Ef 3:17 24Me i ŋa ilon so panag i ŋainag azu uzi so paniime; ge aŋ aloŋame azu me ŋainag tea, tea, me Mam i ŋa noagge ŋaselak me inan.#Joh 7:16
Auanuzgun Jesus naon iŋalge azu peteŋanadime Jesus mazoz panad, Satan inan wolaul nauk biti
25Abaŋ e daŋan aŋ maig temademeg ŋepaiaŋlak. 26Ge Ilonŋaleknen, Auanuzgun, me Mam inag neaglon inaup isowoi, i abaŋ daŋan peteŋanaŋoi, abaŋ daŋan get ŋepaiaŋlak lami isouknen ipanaŋoi.#Joh 14:16; Mat 10:19 27Mazoz niŋon ziminen ŋenaug ien; ŋainag mazoz ŋa aŋ ŋepanaŋ. Tan e panaŋime egin ŋa so ŋepanaŋ. Bubumi so alan mon, so izez mon.#Joh 16:33; Fil 4:7 28Ŋa ŋalap faun ziminen ŋamuloi ŋepaiaŋlak me aloŋ. Aŋ lami apanagpeges aŋ jumi isape ŋa ŋabollakoi, ŋa Mam izinnen ŋalawoi, Mam i nenazagge ujanlak.#Joh 14:3, 6, 18 29Gazo so idulak eginmeg mug ŋepaiaŋ, meginpe idumap aŋ lamilon malikoi.#Joh 13:19 30Mug faun aŋ mai gauz so tikibiaioi, tan e inan ujanzen bo isowoi, ge ŋawoi wolaul inaunen tea.#Joh 12:31; Ef 2:2 31Ge tealakgaz i diloŋoi ŋa Mam ilog ŋepaniŋame, mewoi Mam kibiai panaglak egin mon ŋenauŋame. Amais aon talawoi.#Joh 10:18
Currently Selected:
Johanes 14: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
