Johanes 13
13
JESUS TANLAK UZAT WADAN FUNATIIME MAI SIGIANEK ANUT BAS INAN AIOI IDUSE, 13–21
Jesus bini iduknen naolalek panad
1Me Pasa ubou so idumeg Jesus iloŋge inan saen pisini, i tan e binip Taman izinnen ilawoi, i inangaz tan elon demadodime me ilon pinidinlak egin ileg wadanlon geg.#Joh 1:11; 8:20; 15:13 2Anaŋ janek geglon Satan get Judas Iskariot, Simon inan ai, Jesus blaniwoi seseŋani.#Luk 22:3 3Jesus iloŋ Taman abaŋ daŋan inan nimanlon inaulak, i me Anut izinnenge iselak Anut izinnen faun imulp ilawoi.#Joh 3:35; 16:28 4Me iloŋge i anaŋ janeklonge imais, jamel melaen me pasig sugueŋnen jamel ta izale.#Mat 11:29; Luk 12:37 5Uzig i tabiz talon naz walig fun inaug meglaum nadin niedin flana, sugueŋnen jamel izalelak melon i suas pinidin. 6I Simon Petrus izinnen itaseg Petrus i siben pizianig ipai, Ujazen, o ŋainag nieg flaniwoi ubolume? 7Jesus auan jabig ipai, Ŋa ŋenauŋame me gazo e so uloŋ, aloupa uloŋoi. 8Petrus i ipai, O nieg so mok flaniwoi. Jesus i ipai, Ŋa o so ŋeflanotap o ŋa mai abed tea. 9Simon Petrus i ipai, Ujazen, ŋainag nieg mon tea, ŋainag nimag gateg mai flaniwoi. 10Jesus i ipai, I isuglak i tinin daŋan ikok, nien mon flaniwoi; me aŋ bo ikok, ge daŋan mok tea.#Joh 15:3 11I inan blaninen me iloŋlakoi, mewoi i ibol, Aŋ daŋan ikok tea.#Joh 6:64, 70, 71
12Meginge i nadin niedin flanilakge inan jamel faun pilag matalge ipidin, Ŋa aŋ ŋonoaŋlak me aloŋ tat? 13Aŋ peteŋanek, Ujazen mai apaiagame, me gauai anaulak ŋa ŋan me.#Mat 23:8, 10 14Ge ŋa nami Ujanzen peteŋanek mai aŋnami niemi flanatap, aŋ mai nugnug niemi flaniwoi.#Luk 22:27; Tim I 5:10 15Me ŋa naolalek ta ŋepanaŋlak, ŋa ŋenaulak egin aŋ mai anauwoi.#Fil 2:5; Kol 3:13 16Malik mok malik, ŋa aŋ ŋepaiaŋ, Begabeg i inan ujanzen so nenazig isou itase, megin ta inaug iselak me tamol i ibolge iselak so nenaziime.#Mat 10:24 17Aŋ abaŋ e aloŋmap aŋ uzi paninenlon lami gauaipa amadowoi.#Mat 7:24 18Ŋa aŋ daŋanoi so ŋabol, ŋa ŋipilianalak me ŋaloŋ; ge azu gazek e niŋon inauwoi me ibol, I me ŋainag anaŋ janiime i ŋawoi boz fiziŋon bise.#Kan 41:10 19Me gazo so idumeg eginmeg ŋepaiaŋŋame, me gazop idumap aŋ lamilon malikoi, ŋa ŋan i.#Joh 8:24; 14:29 20Malik mok malik, ŋa aŋ ŋepaiaŋ, i me ŋa ŋenaug ilaime me kibinemap i ŋa kibiniag egin; me i ŋa kibiniagime i me, me ŋa noagge ŋaselak ikibineime.#Mat 10:40
Jesus Judas beŋten inau
21Me Jesus megin ibollakge i ilon izezge beŋten ibol, Malik, mok malik, ŋa aŋ ŋepaiaŋ, aŋ leŋamilon ta iblanagoi.#Joh 11:33; 12:27; Mat 26:21–25 22Mewoi meglaum nug lalelaleg, Itoi tat ibolime, dibol.#Mar 14:18–21 23Meginge meglaum ta me Jesus ilon paniime, i Jesus petazen dud panig matal,#Joh 19:26; 20:2; 21:20 24Simon Petrus i tabei ipani, i sedazep nasip itoi ibolime. 25I me Jesus petazen dud paniime i ipai, Ujazen, ite?#Joh 4:6 26Jesus auan jabig ibol, Ai ta me anaŋ boi ta ŋubuip ŋepaniwoi ŋenauŋame ŋan i. Meginge i anaŋ boi ibuig i Judas, Simon Iskariot inan ai, ipani. 27Anaŋ boi janilag Satan Judas bubenlon idule. Jesus i ipai, O unauwoi ubolume me pasak unau.#Joh 13:2 28Jesus megin ipailak me ai ta fun so iloŋ. 29Aenta ladin ibol, Judas i gaŋmalan inan badamdaŋanlakoi Jesus i ipailak, Tuz inan abaŋ id taninen me ulap udad, teap, i abaŋ ta waizgaz lo pinidinoi tat dibol.#Joh 12:6 30Judas anaŋ boi ŋaleg buntaimon idu, saen me tidom.
Ilopanek inan kibiaiŋ
31I idulag Jesus ibol, Gazo Tamolai kubeldaŋan, i‐lon Anut mai kubeldaŋan. 32Anut i‐lon kubeldaŋanmap Anut i sibenlon mai kubel ipaniwoi, buntaimon kubel ipaniwoi.#Joh 12:23; Joh 17:1–5 33Kitek ta mon ŋa aŋ maip temadowoi. Aŋ ŋa abezanagoi, ge get Judagaz ŋipidinlak gazo aŋ mai ŋepaiaŋ, Aben ŋa ŋalaŋame melon aŋ alanen tea.#Joh 8:21 34Kibiaiŋ faun ta ŋepanaŋŋame, me aŋ nug lami apanaŋoi; ŋa aŋ ilog ŋepanaŋlak egin, megin aŋ mai nug ilon panipaniwoi.#Joh 15:12; 13:17 35Aŋ nug ilon panipanimap melon tamolpain daŋan diloŋoi aŋ ŋainag meglaum.
Petrus iwoi kakezoi Jesus imugseg ibol
36Simon Petrus i ipai, O domten ulaume? Jesus auan jabig ibol, Ŋa ŋalaŋame melak o gazo uzagnen so uloŋ; aloupa o uzagoi.#Joh 7:34; 21:18, 19 37Petrus i ipai, Ujazen, aitoige ŋa gazo so ŋuzowoi? Ŋa owoi ŋamat pasinen ŋaloŋ. 38Jesus auan jabig ibol, O ŋawoi umat pasinen uloŋ? Malik mok malik, ŋa o ŋepao, kekazek so ibobmap o ŋawoi kakez tolp unauwoi.#Mat 26:33–35; Mar 14:29–31; Luk 22:31–34
Currently Selected:
Johanes 13: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
