Johanes 10
10
Belelek nadin sep
1Malik mok malik, ŋa aŋ ŋepaiaŋ, me i dalauanlon belelek nadin azlon so idulemap, tea, iduseg dal talon idulaime i ponaubibian funekbibian mai. 2Ge me i dalauanlon idulaime i belelek nadin tizinek. 3Az tizinek i dalauan pasi paniime, belelek i inan auan diloŋ, inan belelek neadin blanaime, idauzig beŋten didudime. 4I siben inan belelek beŋten itezetanap i noadinnen itozpa belelek i duzidime, i inan klagun diloŋlakoi. 5Panu baswain i so mok duziwoi, tea, diauwoi, i baswain klugudin so diloŋlakoi. 6Azu faŋanfaŋan e Jesus sai janilak, ge i so diloŋ abaŋtewoi tat ipidinime.
Jesus belelek nadin dalauan.
7Meginge Jesus faun te pidin, ibol, Malik mok malik, ŋa aŋ ŋepaiaŋ, ŋa belelek nadin dalauan.#Kan 118:20 8Ŋa dimugge diselak me daŋan ponaubibian funekbibian mai, ge belelek inadin auadin so diloŋ.#Jer 23:1, 2 9Ŋa dalauan, tata ŋalon idulemap i patun pasip madowoi, i idulap itasap anaŋ inasiwoi. 10Ponaubibian ponauoi mon isoime, funip imatnen, pitiŋineknenoi mon. Ŋa bas niŋon dadon isaknen deŋalewoi ŋase.
Tizinek gauai
11Ŋa tizinek gauai. Tizinek gauai i belelekoi imat pasiime. 12Ge me i uzat ai mon, tizinek mok tea, me belelek mai inan tea, wolf isoime nasip i belelek ibinpa iauime; me dazuk salan ijab belelek pizitiliaime.#Kan 23:1; Jes 40:11; Hesek 34:11–23; 37:24 13Uzatai i iau, i gaŋmalanoi mon uzat inauime, i belelek ilon so pinidinime.#Joh 15:13 14Ŋa tizinek gauai, ŋa inag belelek ŋaloŋ, inaggaz me ŋa diloŋ.#Tim II 2:19 15Me Mam i ŋa iloŋime egin, megin ŋa mai Mam ŋaloŋ; inag belelekoi ŋamat pasiŋame.#Mat 11:27 16Ŋa belelek aentadaŋan i abadin en tea, me mai ŋedauzip disowoi, i ŋainag klagug diloŋoi. Meginpe belelek malan taimon, tizinek mai taimon mon.#Joh 11:52 17Mewoilakoi ŋainag Mam ilon panag, ŋa ŋamat pasiŋame, me gazop bas niŋon faun ŋeŋalewoi. 18Tata so wiziag, tea, ŋa sibeg ŋabolge basnen ŋibiniŋame. Ŋa ŋamatnenoi tiwogdaŋan, faun bas ŋeŋalenen mai ŋaloŋ. Kibiaiŋ me Mam ipanaglak.
19Azu ewoi Judawain ilonlon tamolpain faun tezepaleg malan azugen denau.#Joh 7:43; 9:16 20Kuzum dibol, I buga salandaŋan, i gedagad funiime, aitoige inan auan dab apaniame?#Joh 7:20; 8:48 21Aenta dibol, Ta i buga salandaŋan inan azu egin tea. Buga salan i tamol malan itaulak fuenen iloŋ?
Jesus inan nauknauk me sigianek ta
22Me Jerusalemnen Bezezeŋaneknen ubou idu. 23Tim ui maig Jesus tempellon Solomon inan galuŋlon ipazge itoz.#Apos 3:11 24Meginge Judagaz dililitig depaig dibol, Saen pitep o noamap am lamase lamalawoi. O Kristustap o kabe beŋten ubolpe. 25Jesus auadin jabig pidin, Ŋa ŋepaiaŋlakge aŋ lamilon so malik. Nauknauk ŋa ŋainag Mam neanlon ŋenauŋame me ŋa disigianagdime.#Joh 4:26; 5:36 26Aŋ bo lamilon so malik, aŋ ŋainag belelek tealakoi.#Joh 8:45 27Ŋainag belelek ŋainag klagug diloŋ, ŋa i ŋaloŋ, i ŋa duzagdime.#Joh 8:47; 10:3, 4 28Me ŋa bas dedeŋaneknen ŋipinidinŋame, i sansanpe so mok depadaloi; tamol tata i ŋainag nimaglon so wiziag iŋaloi. 29Ŋainag Mam me i ŋa panaglak daŋan nenaza pasi, tata i inag Mam inan nimanlon wozainen so iloŋ. 30Ŋa ŋainag Mam mai taimon.
Judagaz Jesus dufunip imatoi denaudime
31Meginge Judatamol faun pat dibiseg deŋale dufuniwoi denau.#Joh 8:59 32Jesus ipidin, Mam inan nauknauk kin kuzum ŋepeteŋanaŋlak, aitoi abaŋ menenoi patlon ufunagoi anauame? 33Judagaz i auan diabig dibol, nauknauk gauaioi am patlon so ufunop umatoi, tea, dizawaikoi, me o tamol monlakge o Anut nuoume.#Joh 5:18; Mat 26:65 34Jesus auadin jabig pidin, me nami kibiaiŋlon so gazelak, Ŋa sibeg ŋabol aŋ tibud?#Kan 82:6 35I me i zidinnen Anut azu iselak, tibud e blanaimetap, — me Anut inan gazek gaten pasinen tea —, 36aŋ me i Mam gun inaug tanlak idulak i apai, O dizanwaik azu ubolume, me ŋa ŋabol ŋa Anut Ai, mewoi?#Joh 5:17–20 37Ŋa Mam inan nauknauk so ŋenautap aŋ ŋa lamilon so malik mon. 38Ge me ŋenaumap aŋ ŋa dadog lamilon so maliktap, meginpe aŋ nauknauk lamilon malikoi. Meginpe aŋ dab apanip aloŋ gauai mai, Mam i ŋalon, ŋa Mamlon ŋemadoŋame. 39Meginge i faun diabiwoi denau, me i nimadinlonge ile.#Joh 8:59; Luk 4:30
40I faun Jordan akilon Johanes malanmalan tamolpain flanalak men ileg made.#Joh 1:28 41Kuzum izinnen didug dibol, Johanes i kubelmaŋau ta so inau, ge abaŋ daŋan Johanes tamol ewoi ibollak me malik. 42Kuzum men iwoi ladinlon malik.
Currently Selected:
Johanes 10: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
