Johanes 11
11
JESUS TAMOLPAIN LEŊADINLON SIGIANEK UZAT WADAN FUNATI, 11–12
Lasarus maiai funig imat
1Tamol ta nean Lasarus me gazo maiai funi, i Betaniawain, Maria tain Marta mai nadin panu.#Luk 10:38, 39 2Maria i get gazeŋlon Ujanzen nien buzugusig gatenzaunlon suas panilak me liun Lasarus maiai funilak.#Joh 12:3 3Mewoi inan liun i izinnen totol inauge dileg depai, Ujazen, o iwoi umatlak me i maiai funig madoime. 4Ge Jesus me iloŋge i ibol, Maiai me mateŋnen tea, tea, Anut inan kubel menen, Anut Ai inan biŋan melon imais ilawoilakoi.#Joh 9:3
5Me Jesus Marta, tain mai, Lasarus mai ilon pinidin.#Deut 33:3 6Meginge i Lasarus maiai funilak iloŋge i ad azugen aben i madoimelak men made pani. 7Alouge i inan meglaum pidin, Id faun Judeanen talawoi. 8Inan meglaum i depai, Rabi, Judagaz wozi patlon dufunowoi denau me o faun ulawoi?#Joh 8:59; 10:31 9Jesus auadin jabig ibol, Ad taimon me aur 12 teage? Tamol tata adlon itoztap i so peselauwoi, i tan e inan lelaman nasiimelak.#Joh 9:4, 5 10Tamol ta bo tidomlon itoztap i peselauwoi, i‐lon lelaman ta so ienimelakoi.#Joh 12:35 11Abaŋ e ibolge uzig i pidin, Idinad kadoi Lasarus ien padal, ge ŋa ŋalap ŋufuŋuniwoi.#Mat 9:24 12Meginge inan meglaum dibol, I ien padaltap i pasa ibolpa madowoi. 13Jesus bo inan mateŋoi ibol, me i ladin ibol Jesus wonoŋlon inan tiwon ŋalekoi ibol. 14Meginge Jesus beŋten pidin, Lasarus imat pasi. 15Me ŋa aon so ŋemadelak mewoi aŋoi ilog gauai, aŋ lamilon malikoi. Ge gazo izinnen talaŋan. 16Ge Tomas me nean ta Didimus i meglaumgaz pidin, Id i maip tamatoi tala.#Mar 10:32; 14:31; Joh 20:24; 21:2
Lasarus get imatge denaulak
17Jesus itaseg i iloŋ Lasarus mug nal palgen fedafodlon ien. 18Me Betania Jerusalem izinnen, inan dal me mail azugen egin mon. 19Judagaz kuzum Marta Maria mai ludinoi ladin deŋelewoi dise. 20Marta Jesus isoime iloŋge i mai naon tazetazewoi ile, ge Maria i ablon matalmeg made.#Luk 10:39 21Meginge Marta Jesus ipai, Ujazen, o madope ŋainag liug so imatpe. 22Me bo ŋaloŋ abaŋ te o gazo Anut godoanimap i o panowoi. 23Jesus i ipai, Oina liu faun imaisoi. 24Marta i ipai, Ŋa ŋaloŋ tiziau ujan nal wadanlonpa i imaisoi.#Joh 5:29; 6:40 25Jesus i ipai, Ŋa tiziau niŋon, ŋa bas niŋon mai, me i ŋa ilonlon malik, i imatmap i so imat i basoi.#Luk 14:14 26Tata bas madoime ilonlon malik mai i dedeŋanip so imatoi. O me ilolon malik?#Joh 5:24; 8:51 27I ipai, Au, Ujazen, ŋa iloglon malik, o Kristus, Anut Ai me tanlak iduwoi dibollak.#Joh 6:69
28I megin ibollag i ileg melabublon tain Maria wagi, ibol, Tamolujan iseg iwigioime. 29I me iloŋtag i pasak imais izinnen ile. 30Jesus get panulon so idu, tea, Marta i mai dikibiailak aben melon madoime.#Joh 11:20 31Judagaz me i maig ilon deŋaleg ablon demademeg i Maria pasak imaisge beŋten idumeg denasig i duzig dile, dibol, I fedafodlon itawoi ilaime. 32Meginge Maria Jesus madoime men itaseg Jesus nasig i nien funlon ibal idug ipai, Ujazen, o elak madope ŋainag liug so imatpe. 33Meginge Jesus i itameg inasig, me Judagaz i mai diselak me mai ditameg ilge i uzdaŋan ilon bebazeg ibol,#Joh 13:21 34Aŋ domten anaulak? I depai, Tamoluja, usop nasi.#Luk 19:41 35Jesus ita. 36Meginge Judagaz dibol, Anasipe, i iwoi imat. 37Aenta dibol, Tamol e i tamolai meladin itaulak me inaug po ibol, i tamol e inan mateŋ bitinen so tat iloŋ.
Jesus Lasarus fuŋunig imais
38Jesus faun te ilon mon sagaimeg fedafod izinnen ile. Me gogoŋ auan patlon funatilak.#Mat 27:60 39Jesus ibol, Aŋ pat apasi. Ai imatlak inan liun Marta me i ipai, Ujazen, i mug zuŋanime, i imatlak mug ad palgen binilak. 40Jesus i ipai, Ŋa o so ŋepaoge, o ilolon malikpe o Anut inan kubel nasiwoi?#Joh 11:4, 23, 25, 26 41Meginge i pat depasi. Me Jesus inan malan biseg ibol, Mam, o ŋainag gadiŋ uloŋlakoi ŋa pez ŋepano. 42Ŋa ŋaloŋlak o sansan ŋainag auag uloŋume, ge tamolpain diseg demadodime iwoi ŋa ŋabol, i me noagge ŋaselak me ladinlon malikoi.#Joh 12:30 43I megin ibollakge i auan ujanlon iwog, Lasarus, umaispa utasa.#Apos 14:10 44Imatlak me itase, niman nien mai jamellon puzilak, inan naon mai maiab suasnen jamel kamolon depaulak. Jesus ipidin, Pasip, binip ila.#Mar 5:43
Judagaz aenta Jesus ladinlon malik, aenta dedaŋe
45Mewoi Judagaz Maria maig dilelak menen kuzum Jesus inaulak me denasig i ladinlon malik. 46Aenta bo Jesus inaulak me farisea dipidinoi dile. 47Meginge waliŋgaten farisea mai detemanig dibol, Id dodin tenauwoi, tamol e bagoz kuzum inauime?#Joh 12:37; 7:31 48Id i malad mon tenasitap tamolai daŋan i ladinlon malikoi, meginpe Romgaz disop idinad tempel inad kiŋdom wiziadoi. 49Ge i ilonlon taimon ta nean Kaifas, i umaz melon waliŋgaten madoime, i pidin, 50Aŋ abaŋ ta so aloŋ, dab mai so apaniame, segauz tamol taimon tamolpainoi imatoi, meginpe daŋan so depadaloi.#Joh 18:14 51Me i siben so ibol, tea, i umaz melon waliŋgaten inaumeg i imugseg ibol, Jesus i tamolpainoi imat pasiwoi.#Ekso 28:30; Num 27:21 52Tamolpainbadim ewoi mon tea, tea, Anut nanungaz fatufatulon depezetaleg ditozdime me mai temanap aben taimon demadowoi.#Joh 10:16; Mat 12:30 53Nal melon fun denaug dufuniwoi dikibiai. 54Mewoilakoi Jesus i faun Judagaz ilonlon beŋten so itoz; i fatu ta fatu udau izinnen men Efraim panu talon ileg inan meglaum maig melak demade.#Joh 3:22
55Ge Juda nadin Pasa ubou me siziz. Pasa so idumeg kuzum panupanulonge Jerusalemnen gun denaup demadowoi dile.#Sai II 30:17 56I Jesusoi dedalel, sebadin nug dukumukom, tempellon demademeg dibol, Aŋ dodin abol, i ubou e nasiwoi so isowoi? 57Me waliŋgaten farisea mai dibol, tata iloŋ tat i domten madoime i ipidinpa meginpe i diabiwoi.
Currently Selected:
Johanes 11: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
