Jakobus 4
4
BEBANEKNEN FUNFUN 4–5
Siaiwoi, je uzekoi, tan abaŋoi tizan jabekoi mewoi tiliŋad ijab
1Domtenge ju pusuaik mai iseg ziminen ienime? I melonge so tat dise, bubumi imaisnen funfun tinimilon dizoidime?#Rom 7:23; Pet I 2:11 2Aŋ bo melami isiime, ge abaŋ ta so aŋaleame, aenta afup dimatoi lami ibol, aŋ jenain asui mai, ge abaŋ me so aŋaleame. Aŋ nug azoi, ju azu mai anau. So agodoanilakoi mewoi so aŋale. 3Aŋ agodame, ge abaŋ so idug panaŋ, aŋ agod alanlakoi, lami ibol, gadiŋ wadan me bubumi imaisnenlon abedanip gamun funaŋoi abol. 4Bubumi malik tealak aŋ, aŋ so aloŋ tat tannen abaŋoi tabolnen melon id Anut siai tepanitame? Meginge me i tan kadoi itozoi ibol, i siben Anut inan agez inaug madoime!#Luk 6:26; Rom 8:7; Joh I 2:15
5Anut gazek azu se tat ibol? Uz me i id panadlak, ilodlon madoime, i jenain isuimeg, idoi jaeŋ sufutanig madoime.#Ekso 20:3, 5; Mat 6:24 6Ge i inan kanim subuŋan panad, mewoi gazek ibol, Anut siben ŋagastamol liwon jabiime, ge ibin didulak ditoz me kanim iŋale pinidinime.#Met 3:34; Hiob 22:29; Mat 23:12; Pet I 5:5 7Aŋ Anut paenlon sibiniaŋ adup! Aŋ Satan aen ageuwoi, meginpe aŋ ibinaŋpa ijauwoi.#Ef 6:12; Pet I 5:8, 9 8Aŋ Anut siziz apanip, meginpe Anut aŋ mai siziz ipanaŋoi. Nimami flanip ikokoi, aŋ aupasekbibian; aŋ me lami pedagekdaŋan, aŋ bubumi gun anaupa!#Sak 1:3; Jes 1:16 9Aŋ noaŋ alanpa amado, asagai, ata! Nami diawaknen ibulisap lami alanpa agosoi, nami zigieknen ibulip bubumi muzuan mon panaŋpe atozoi. 10Au, aŋ Anut naonnen binaŋpa adup, meginpe i aŋ mai bisiaŋpa atasawoi.#Pet I 5:6
Tawoi muzikmuzik salan tabolnen, nug betenaeknen mai id tabitoi
11Taiggaz, nugoi muzikmuzik azu salan so abol mon. Ŋan me i tain ta muzikmuzik azu salan ta sepaleime, tain ta ibetenaeime, i melon ibolime, Anut inan kibiaiŋ so iduse. Ge kibiaiŋ me tamolpain bebananen so iduse uboltap, o kibiaiŋ inan uzekpanekkamaŋ teabe, tea, o oina tai inan betenaekkamaŋ unauume. 12Taimon siben mon i kibiaiŋ panekkamaŋ betenaekkamaŋ mai, i mon patunpasinen meselaninen mai iloŋ pasiime. Ge o it tatge o oina muduba betenaeume.#Mat 7:1; Rom 2:1; 14:4
Sibed dadod naod tenau panadnen me so gauai
13Aloŋ aŋ, me aŋ abol, Gazomnen, teap boŋanip tat panu melon talap umaz taimon aon tatozoi, abaŋ tadadse tadadlelap gaŋmalan subuŋan teŋalewoi,#Met 27:1 14ŋan me kin so aloŋame, boŋanip abaŋte tat inaup idup toanaŋoi! Nami bas madoknen me dodinime? Aŋ jakas egin mon, me gazog imaismap kitek mon ien, a faun mug pasak bini ijau pasi.#Luk 12:20; Kan 39:6, 12 15Mewoige aŋ egin aboloi, Ujanzen ibolpa, id bas temadopa, abaŋ meme tenauwoi.#Apos 18:21 16Ge gazo e aŋ nami agaslon sebami nami biŋami mon ibisaame. Biŋami bisaknen medaŋan salan mon. 17Me i abaŋ gauai me i inauwoi iloŋime, ge so inauimelak, ŋan me i siben tininnen.#Luk 12:47
Currently Selected:
Jakobus 4: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
