Jakobus 3
3
ANUT UZATOI TINID BEZAU IMUGSENOI, BALEDNEN AUPASEKOI TILIŊAD IJAB 3:1–12
Medaeŋ uzatai betenaeknen metalun toanawoi
1Taiggaz wezami, aŋ aenta kagin apeteŋanawoi tinimi so aŋalep amug mon. Aŋ aloŋ, id Anut uzattamol tamol se nenazap Anut i kagin gegaunlon bitiniadoi.#Jak 1:19
Inad tezebedaneknen kuzum
2Id daŋan abaŋ kuzumlon tetezebedanitame. Ta i azu taimon ta moklon so tezebedaniime i mon taoz tezepasek mok. Me mai inan tinin daŋan duzinen iloŋ.#Jak 1:26 3Anasi, id siwali hors auanlon tunulemap, dagom panadoilakoi, meginpe id i tinin daŋan nimadlon tubulinen taloŋ.#Kan 32:9 4Wag mai anasipa, i ujanzen, tim metalun ituteg ilaime; ge ulum kiteklon tibititame. Waggaten ilawoi ibolge melon i wag ulum sinanlon ibulig ilaime.
Baled abaŋ mitin, ge aupasek ja itunip metalun inauime
5Megin mon mai inad baled i boi mitin mon, ge i auan fezafuzlon belabolime. Anasi, ja kitek malannenpa ze inanap isop ilap, ze aben ujan inana pasiime. 6Baled me mai jananin. Inad tinid inan boi daŋan ilonnen i abaŋ salan egin, tinid daŋan bibianiime, i inad ilod bubed tinid daŋan jalon egin itunig nanaime, Hades siben inad baled ituni.#Mat 15:11, 18, 19; 12:36, 37 7Dazuk funfun, ma, mot, maslon abaŋ mai daŋan tamol tiwonlon dagomdimelak, get mon, gazo e mai. 8Ge balen menen denaug lo tea, i inan fun dagom paninen teabe, i gisigas mok, mizimazdaŋan.#Kan 140:4 9Melon id Ujanzen Mam mai pez tepanitame, melon id tamolpain, i Anut walis inaug ditozdime, A bugap padal ula tipidintame.#Gen 1:27 10Auan taimon melon kibinek azu, meselanek azu mai itasaime. Taiggaz, megin ienlak me gauai teabe. 11Naz bubaik auan taimonlonge naz mok katizkatiz mai itasaime tat? 12Me guzablak azaupatun tat ifuime? Me doadulak guzab tat? Meginge mai naz bubuaiklon naz mok mai katizkatiz mai so zubuliime.
ILOD KAGINKAGIN TA TANNENGE, TA LATNENGE 3:13–18
Tan inan kagin
13It aŋ leŋamilon ilon kaginkagindaŋange abaŋ tezepasig iloŋ? Ŋan i kaginkaginkamaŋ egin binip iduknenlon, inan tazeŋ gauailon aenta inan nauknauk ipeteŋanap denasiwoi.#Jak 2:18; Pet I 2:12 14Ge nami bubumilon jenain isunen, nug saeksaeknen mai ientap, aŋ auami fezafuzlon so zigiaŋ mon, melon sekauk anaug sebami aloŋ.#Ef 4:31 15Kaginkagin me latnenge so iduimelak, tea, i tan e inan, buben bubulek inan, i Satan inan mai.#Jak 1:5, 17 16Aben me jenain isunen, nug saeksaek mai ienlak, melak siai mai abaŋ salan mai mon ienime.
Did inan kagin
17Ge kaginkagin latnenge me malan ikok mon, uzip mazoznen, so je uziime, dagom, aentawoi teŋaen alannenlon, niŋon gauai mai mon ifofokime, i so ilonse ilonlaime, sekauk teabe. 18Taoz inan niŋon me mazoz inan fabul, mazoztamol i fabul me depaedime.#Jes 32:17; Mat 5:9
Currently Selected:
Jakobus 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
