Jakobus 1
1
KIBIANEKLON SEGATIP MADONENOI; BUBEN TIDUKOI; ATENSAEK FUNOI MAI, 1:1–18
Tabei panek
1Jakobus, me Anut, Ujanzen Jesus Kristus mai inan begabeg, ŋa bagen twelf me pezetaleklon demadodime, tabei ŋipinidinŋame.#Pet I 1:1; Apos 15:23
Kibianek aitnenoi gauai
2Au, taiggaz, kibianek funfun aŋ ziminen idutap aŋ mewoi jumi gauz isap amadowoi.#Rom 5:3–5 3Aŋ ŋan aloŋame, lamilon maliknenoi kibianek me inan niŋon segatek aŋ aŋalewoi.#Pet I 1:7 4Segatek me nami tazeŋ daŋanlon niŋon dadon isap inauwoi, aŋ tezepasaŋpa, peneŋ teap amadowoilakoi, dallak kagin niŋon tata so teaboi.#Mat 5:48
Ilon kaginkaginoi tagodoi
5Aŋ ta ilon kagin teatap i Anut mai igodoi, ŋan i daŋan segauz ipinidinime, tata i so ipaiime; meginpe i ŋalewoi.#Met 2:3–6; Mat 7:7 6Ge ilonlon malikdaŋan igodoi, so ilonse ilonle mon! Me i ilonse ilonlaimelak i duban egin, me tim jabip tanise tanilaime.#Mar 11:24 7Tamol me so ibol mon, Ujanzen i abaŋ paniwoi, tea. 8I buben azugendaŋan egin, i ibalse iballe mon itozime.
Waizlak filiadindaŋan mai i medaeŋlon zazek taimon
9Tain waiz me inan jesoi zigianiwoi. 10Filiandaŋan me ŋa waiz e iboloi, kebasik inan zizigun ibiniimelak megin i mai sezanep ibiniwoi.#Jak 2:5; Pet I 1:24 11San ujanlon ad liwon gegaunpa funip wizez teap zizigun makazime, ibal idup zizigun malan gizaudlakge imat; meginmegin tamol filiandaŋan mai ipadaloi.#Jes 40:6, 7
Anut gauailak, ated so saeime
12Patun isap mado, me aten saeklon seŋanig itozime; i kibianeklon iduselap, i dedeŋaneknen bas niŋon iŋalewoi, me Anut ladin depanidime me iblani pinidinlak me.#Rom 8:28; Tim II 4:8; Pet I 5:4; Bo 2:10
13Tata buben aten saemap i so ibol mon, Anut ŋa ateg saeime, abaŋ alan Anut aten saenen tea mok. I siben mai taimon ta aten so isaeime. 14Tea, dadodado i aten saemap, me i siben inan ilon zagun salanlon malan isi buben mai imaisime.#Rom 7:7, 8 15Meginpe buben imaisnenlon aupasek fun inauime, aupasek subuloanip itubmap mateŋ uziime.#Rom 7:10
Anutlonge niŋon gauai mok mon itasaime
16Taiggaz wezami, aŋ sebami so izegai mon!#Gal 6:7 17Abaŋ zaiŋ gauai me daŋan, abaŋ suzuzum gamun mok me daŋan mai latnenge, Sultaman izinnenge mon iduime, me i so bulise bulilaime, i naonnen lelaman mai mafuz mai so poalekpoalek diendime.#Joh I 1:5; Mat 7:11; Joh 3:3, 27 18I siben ibollakge, azu maliklon id faun noad muglak, id inan abaŋ funfun daŋan leŋadinlon niŋon matu egin temadowoilakoi.#Joh 1:13; Pet I 1:23; Bo 14:4
ANUT KAGIN ME KRIS INAN TAZEDLON NIDON INAUP BEŊTEN ITASAIME 1:19–2
Anut azu se so tatoz paniwoi, tea, niŋon tenauwoi
19Taiggaz wezami, aŋ me aloŋame. Mewoi dadodado pasak tiliŋan po iboloi, auan so fezafuzoi, buzunoi muzuan mon inauwoi. 20Ta i buzundaŋanlak i Anut inan taoz niŋon so inauime.#Ef 4:26 21Mewoilakoi bunun salan buben funek dadon isag daŋan mai asebazawoi, azu wagam lamilon paeg ienlak me binaŋpa adup aŋale; i tiwondaŋan, nami nutumi patun pasinen iloŋlak.#Kol 3:8; Pet I 2:1 22Ge aŋ azu se so mon aloŋoi, tea, inan auan uzi panipa, niŋon anaup itasawoi mai, teatap, aŋ sebami se wiziaŋame.#Mat 7:26; Rom 2:13 23Ta i azu se iloŋ montap, ge melon so itozime, i tamol e ikol, me inan metelaen dodaliŋlon iliŋeime. 24I siben liŋelag ilaime, buntaimon ilon padal, i naon dodin tat. 25Ge me i Anut inan kibiaiŋ tezepaseklon me paseknen kibiaiŋ, iliŋe pasiime, melon binip idup mai madoime, kagin se itoz mon so paniime, tea, me uzi panig itozime: ŋan me i inan itoznenlon tinin binip imadowoi.#Jak 2:12; Rom 8:2; Joh 13:17
26Ta ŋa kris gauai e ibol, ge siben inan balen dab so panii me, tea, i siben inan buben se wozaiime, meginpe inan ilonlon maliknen mewoi i ibolime, me se lasen mon.#Kan 34:14 27Idinad Mam Anut naonnen ilonlon maliknen niŋon ikok mai ŋan e: ai i tinan taman tea bobpain mai me alan denaudime, me zidinnen lo talap kibiniawoi; tannen kagin inan nun mai so bibianadoi.
Currently Selected:
Jakobus 1: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
