Hebrea 9
9
Tan inan galuŋ gun mok gun fun dodin?
1Temaneknen malanmalan me ubou naseknen inan kibiaiŋ, tan inan galuŋ gun mok gun inan kibiaiŋ mai ien.#Ekso 25:23; 30:31 2Lealai ta denaulak menen ta kin muzinnen me galuŋ gun e deblani, melon sulmadud, peteŋaneknen sepalaŋ kapaldaŋan mai dien. 3Lai ta geg me ilonnen galuŋ ta ien, me gun mok gun deblani.#Ekso 26:33 4Abaŋ zuŋan gamun inan mazeknen wiwa, temaneknen kunup mai me aenaen tinin daŋan goldlon bugatilak, me ilonnen nabud goldlon kibinelak manadaŋan, Aron inan tok ilublak, temaneknen pat mai didizilak.#Ekso 16:33; Num 17:25; Ekso 25:16, 21 5Me fonlak kubelkubel inan kerubim kanimpezatiu dostoani, ge mewoi gazo e tezepasip tabolnen tea.#Ekso 25:18; 26:34; Rom 3:25
6Abaŋ e megin kibine binig waliŋ sansan lealai inan galuŋ muzinnen nadin uzat denauwoi diduladime.#Num 18:3, 4 7Ge galuŋ talon waliŋgaten mon idulaime, umaz taimonlon nal taimon mon. I daz teamap se so idulaime, i sibenoi, tamolai nadin zegaikoi mai ja inauime.#Lew 16:2, 14, 15 8Melon Auanuzgun beŋten inau, lealai inan galuŋ naonnen ienmeg galuŋ gun mok gun inan dalauan so pasilak.#Heb 10:19 9(Me saen mewoi faŋanfaŋan) Kagin melon lo inan ja, janauk aenta mai denaudime melon ubou nasekwain inan kakad kunuteknen bini moknen tea.#Heb 10:1, 2 10Janauk me anaŋ janeknen, mileknen, inan flaneknen funfun mai me tinin inan kibiaiŋ mon, me inaulak kagin taoz itasap eginmap.#Lew 11:2; 15:18; Num 19:13
Idinad waliŋgaten get bageunen madelak
11Ge Kristus abaŋ gauai loantapnen inan waliŋgaten itasemeg i lealai ujan ta me sososo ibollak, nimanlon mai so inaulak, tea, i get itase, tan abaŋ inaumeglon tea.#Heb 6:20; 10:1 12I galuŋ gun mok gunlon idule taimonlak inau pasig bini. I gout dauai bulmakau nanun mai nadin daz so iŋale, tea, i siben inan daz iŋaleg patunpasek dedeŋaneknen inaulak. 13Gout dauai bulmakau dauai mai nadin dazlon, bulmakau paiat inan sagaflon mai tamolai bubudin bibianilak me stiliap tinidin kibinemap,#Lew 16:3; 14:15; Num 19:9 14Kristus inan daz i abaŋ me beleŋanalak siben Uz dedeŋaneknenlon bibianek tealon mai ja inaulak, i malik nami nauknauk niŋon tealak menen kakad inan kunutek bitimap Anut bas bian apaluwoi.#Pet I 1:18, 19; Joh I 1:7; Bo 1:5
Temaneknen faun me Jesus inan mateŋlon niŋon inau
15Mewoi i temanek faun inan liluŋwain inau, meginpe i wigidinlak i fuzan dedeŋaneknen blani pinidinlak me deŋalewoi, mateŋ ta idulak i me temanek malanmalan paenlon demadelak me nadin doloaneklon ipaslak.#Heb 3:1; 12:24; Tim I 2:5 16Ta i fuzan panekoi nean inaulak inan mateŋ me gauai dikibianip diloŋoi. 17Fuzan ŋalek mateŋlon mon niŋon inauime, i me fuzan ŋalek nean inaulak i bas mademap niŋon so inauime. 18Mewoi Anut temaneknen matu mai daz tealon so inaulak 19Moses kibiaiŋ inan azu daŋan tamolpain daŋan pidin binig i bulmakau nanun gout dauai mai nadin daz ŋaleg naz, belelek fufulun dazan, hisop zaen mailon buk tamolpain daŋan mai stilia, ibol,#Ekso 24:3; Lew 14:4 20E me temaneknen inan daz mewoi Anut ibollak.#Ekso 24:6–8; Mat 26:28 21Megin mon i lealai, ubou nasek inan tabiz abaŋ mai dazlon stilia. 22Au, kibiaiŋlon abaŋ daŋan egin dazlon ikok inaulak, daz iduknen tealon aupasek pasinen tea.#Lew 8:15, 19; Ef 1:7
Kristus i inan janauk taimonlon aupasek pasi
23Meginge didnen abaŋ inan ŋelaŋal mai kagin elon mon ikok inaunen dal ien, ge didnen abaŋ inan janauk me kibiaiŋ inan nenazi.#Heb 8:5 24Kristus i gun mok gun inan ŋelaŋal ta, nimadinlon denaulak melon so idule, tea, i idoi gazo Anut naonnen itasawoi did moklak iduse.#Joh I 2:1; Heb 9:11, 12 25I get ja denaulak egin siben panek so sufule, waliŋgaten umaz daŋan daz me inan tealak mai galuŋ gun mok gunlon idulaime egin. 26Megin inaupe i tan funlonpa fun inaup alan inaunen me sufulemap gazo e. Ge i inaulak me megin, i saen wadanlon itase taimon, siben janauk egin panimeg aupasek ipasilak.#Kor I 10:11; Gal 4:4 27Tamolpain dimat pasi taimonoi nal inaulak ienime uzip betenaeknal iduwoi egin,#Gen 3:19 28megin Kristus mai kuzumpanu nadin aupasekoi siben tinin ja inaulak. I faun iso mugoi, aupasekoi tea, tea, me i malan denaudime me putudin pasiwoi mewoi.#Heb 10:10; 12:14; Tim II 4:8
Currently Selected:
Hebrea 9: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
