Genesis 37
37
Josef inan taingaz mai
1Jakob i taman inan lo fatu Kanaannen made. 2E me Jakob inan samungaz nadin sai. Josef i umaz sewentin itozlag i taingaz mai dazuk ditizinameg demade. Ai me inan taman inan pain Bilha Silpa mai nadin ai maig ditoz. I denau alanlak me temadin ipai. 3Israel i Josefoi gauz imat, ai aentawoi egin tea, Jakob besabesge tinan duzilakoi. I kout ta bala gizaud melaen nimandaŋan iwaeg pani. 4Taingaz i temadin Josefoi imatlak, taingazoi egin tea me dab depanig i dumuguni, i lo azu depainen so diloŋ.
5Saen melon Josef ienmin. I taingaz sai pinidinge i dumuguni gauai mok. 6I pidin, lenmin e ŋa ŋaenminlak me dab apani. 7Anasi, id umlon baza gaten tetebazeg, ŋainag tabaz me itiuzge ien, nami daŋan diseg inag me ditilianig naonnen detakok depasi. 8Taingaz i depai, O malik amnama ujanzen unaup am daŋan o dagom apanowoi? Meginge i inan ienminoi, inan azuoi mai gauz mok dumuguni. 9Alouge i faun te ienmin. I inan taingaz sai pinidinge ibol, Anasi, ŋa faun te ŋaenminlak, ad, fulei patui elewen mai ŋa naognen detakok. 10I taman taingaz mai sai pinidinge inan taman bebanig ipai, Uenminumelak me abaŋte? Ŋa, tina taigaz daŋan malik o mon naonen tanlak abal aduwoi ubolume? 11Inan taingaz iwoi jenain disui, taman i azu me ilonlon inaug dab pani.
Josef Egiptanen didad ile
12Saen melon taingaz temadin inan dazuk Sekem sisizlon dufutuawoi dile. 13Israel i Josef ipai, Taigaz so tat Sekemnen dazuk dufutadime? Usop ŋa o ŋunuop i zidinnen ulawoi. I ipai, Ŋa ie. 14Meginge i ipai, Gazo ulap uwilpe, taigaz dazuk mai gauai demadodime tat, faun umulpa paiag. Meginge i Hebron inan fatu zoaneklonge inaug i Sekemnen itase. 15I udaulon itozse itozlemeg tamol ta i inasi, sedazeg ibol, abaŋtewoi laŋaiume? 16I ibol, Ŋa taiggaz ŋebezanaŋame. Paiagpe, i domten tat dazuk dufutuadime? 17Tamol me ibol, I fatu e dibinig dile, Id Dotannen talawoi dibolmeg ŋaloŋ. Mewoi Josef inan taingaz uzge Dotannen il. 18Kin makaiu egin denasig, i zidinnen so idumeg i dufunip imatoi nug dikibiai. 19I nug paipai, Ai o, ienmintamol me mug isoime. 20Asop tufunip imatpa lof talon tetani; meginpe dazuk duguze jani e taboloi, ienmin dodin inauwoi me tenasiwoi. 21Ge Ruben azu me iloŋge i nimadinlonge tetazi ŋaleg ibol, Id so tufunip imat mon. 22Ruben ipidin, Daz so idu mon; se fatuudaulon loflon mon atani, nimami so asoup ufuni mon. I nimadinlonpa gaten pasip taman izinnen inaup imuloi. 23Josef inan taingaz zidinnen itaseg i inan kout melaen niman melaendaŋan me depasig, 24deŋaleg lof talon detani. Lof me naz kaza ibol, naz melon so ien.
25Meginge i dematalge anaŋ diani. Meladin dibiseg i Ismaelwain wozoudaŋan Gileadnenge disemeg dil. Nadin kamel japatan funfun mozgazeŋ mai debezaug Egiptanen diladime. 26Meginge Juda taingaz pidin, ibol, Id taid tufunip inan daz timiŋianitap abaŋte naon teŋalewoi? 27Asop Ismaelgaz disodimelak id maip tadadpe idinad nimad so salanoi, i inad taidged daz taimon. Inan taingaz auan duzi depani. 28Meginge Midian inan dadeŋtamol digegge dilemeg i Josef loflon dibiseg deŋaleg Ismaelgaz maig silwer boi twentilon didad. I Josef deŋaleg duduzig maig Egiptanen dile.
29Ruben lof izinnen imulge Josef loflon so madoime me iloŋge i inan jamel jabig besesalig 30taingaz zidinnen ileg ipidin, Ai ŋan tea e; ŋa domten ŋalap ŋemadowoi? 31Meginge i Josef inan kout deŋaleg gout ta dufunig kout me dazlon dubui. 32Kout melaen niman melaendaŋan me denaug temadin izinnen ileg dibol, Am me anasilak, deleŋanipe me oina ai inan kout tat, tea tat. 33I kout me iloŋ. I ibol, Me ŋainag ai inan kout; dazuk duguze i janilak; malik Josef tetazi tat. 34Meginge Jakob inan jamel besesali, jamel memasendaŋan ta talinlak pilag inan aiwoi nal kuzum ita. 35Inan ai aipain mai daŋan dimaisge ilon deŋalewoi denau; i bo denau lo tea. I ibol, Ŋa tiŋialon mon Seollon ai izinnen ŋaduwoi. Taman megin iwoi ita. 36Saen melon Midiangaz i Josef Egiptanen Potifar Farao inan gatentamol ta maig didadlak.
Currently Selected:
Genesis 37: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
