Genesis 35
35
Anut Jakob Betelnen baz pani
1Anut Jakob ipai, Umaispa Betelnen ulap mado. Melak Anut me o Esauoi uwaumeg o izinen itaselak me inan wiwa tali. 2Meginge Jakob inan samungaz, aenta daŋan me i maig demadodime me mai ipidin, Tibud bas nadin mazoz leŋamilon diendime me apaspa alap asugpa jamel faun ta ipila. 3Meginpe tamais Betelnen talap, melak Anut me ŋa alan ŋenaug nal melon auag jabig aben daŋanlon ŋa maig atozlak, me inan wiwa melak ŋetaliwoi. 4Meginge i tibud bas nadin mazoz me i zidinnen dienlak me daŋan ŋok tiliŋadinlon diendime me mai Jakob depanig i ito Sekem izinnen ienime me paenlon pap pani.
5I tazeŋ diabig dilemeg Anut inaug panu me tilianag diendime me daŋan fodinlak zoazuknen idu, meginge i Jakob inan ai so duzge dile. 6Jakob, tamolai i maig dilelak me Lusnen ditase, me Betel, me Kanaan fatulon ien. 7Melak i wiwa ta talig aben me El‐betel iblani, i inan tainoi iaumeg Anut siben i izinnen boboloanig idulakoi. 8Debora, Rebeka inan ulatpain, imatge ito ta funlon Betel paenlon denau. Meginge nean Allon‐bakut, tiŋia inan ito e deblani.
9Jakob Paddan‐aramnenge isemeg Anut faun mug izinnen itaseg baz pani. 10Meginge Anut i ipai, Oina nea Jakob, faun te oina nea Jakob so deblaniwoi, tea, oina nea Israel deblaniwoi. Mewoi inan nean Israel deblani. 11Anut i ipai, Ŋa Anut tiwogdaŋan; o fabuldaŋan utozmap kuzumoi; panu badim fatufatu badim mai olonpa ditasawoi. Kiŋ ta mai olonpa dimaisoi. 12Ŋa Abraham Isak mai tan ŋipinidinlak me o ŋepanowoi, o uzop oina begazagaz ŋipinidinoi. 13Meginge Anut i maig dikibiailag aben melonge itaseg ile. 14Jakob i mai dikibiailak aben melon patlon bagoz ta inau; fonlak mileknen naz inan janauk iwali, gazeŋ mai fonlak iwali. 15Meginge Jakob Anut maig dikibiailak aben me Betel iblani.
Rahel imat
16Meginge i tazeŋ diabig Betelnenge dile. Efrat, me Betlehem, dal kin sisiz depanimeg Rahel i tinin gauz izozge ai duziwoi saen idu. 17I tinin gauz izozge ulatpain i ipai, So uzez mon, gazo o ai ta unauwoi. 18Inan nitun idu iaumeg, inan ai nean Benoni#35:18 alannauk inan ai blani, ge inan taman Benjamin#35:18 niman waŋ inan ai iblani. 19Rahel megin imatge i Efrat inan dallak denau. 20Inan fedafodlak Jakob bagoz ta inau; me Rahel inan fedafod inan bagoz, me gazomnen mai ienime. 21Israel ipaz ileg inan tazas Eder inan kaboŋ akilon inau.
Jakob inan nanungaz
22Israel fatu melon mademeg Ruben ileg Bilha, taman inan paindinek, maig dienlak; me Israel iloŋ. Jakob inan ai me twelw. 23Lea inan ai me Ruben, Jakob inan ai matu, Simeon, Lewi, Juda, Isakar Sebulun mai. 24Rahel inan ai me Josef Benjamin mai. 25Bilha, Rahel inan painbegabeg, inan ai me Dan Naftali mai. 26Silpa, Lea inan painbegabeg, inan ai me Gad Aser mai. Me Jakob inan ai me Paddan‐aramnen didauzig depanilak.
Isak imat
27Jakob inan taman Isak izinnen Mamrenen, Kiriat‐arbanen ise, me Hebron mai dibol. Get Abraham Isak mai men demadelak. 28Isak inan umaz mug won hundert eiti. 29Isak imatoi jaeŋ funig imatge inan temalengaz mai temana, i dinou, inan nal iduse, inan ai Esau Jakob mai i denau.
Currently Selected:
Genesis 35: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
