Genesis 34
34
Dina inan bazas bedanekoi liungaz naon denau
1Saen elon Dina Lea inan nanunpain i duzig Jakob panilak, i fatu me inan paingaz zidinnen lo ile. 2Hamor Hiwitwain, fatu me inan tamolujan, inan ai Sekem i nasig gegaunlon i jabig maig dien. 3I Jakob inan nanunpain Dinaoi buben jateg i iwoi imatge azu gamun ipai. 4Mewoi Sekem inan taman Hamor ipaig ibol, Aipain me ŋale panagpa iwog inauwoi. 5Sekem i Dinaoi inau salanlak me Jakob iloŋ; inan ai bo bulmakau abedinlon demade. Mewoi Jakob to ibolge madeg i disemeg eginmeg. 6Hamor Sekem inan taman i Jakob mai dikibiaioi izinnen ile. 7Jakob inan ai abaŋ mewoi diloŋge i dazuk abedinlonge dise. Tamol i ladin bebazeg buzudin gauz mok isa. Sekem i Israeloi kagin salan ta inaug Jakob inan aipain maig dienlak, abaŋ megin inaunen tealakoi.
8Ge Hamor i mai dikibiage ibol, Ŋainag ai Sekem inan buben nami aipainoi jaeŋ funi, ŋa ŋogodoanaŋ, segauz panipged i maip betezemanawoi. 9Am maip betezemanek tenauwoi; nami nunumipain am penamap, sebamioi nama aipain aŋal. 10Aŋ am maip temadowoi, fatu me aŋoi fuep ienoi. Melon aŋ amadop dadeŋ anaup filiaminenoi. 11Sekem Dina inan taman inan liungaz mai ipidin, Aŋ anaup ziminen kanim ŋeŋalep abaŋtewoi tat aboltap me ŋenaup ŋepanaŋoi. 12Pain naon zaiŋ segauz abaŋ kuzumoi aboloi, ŋa aŋ abolame megin ŋepanaŋoi. Aipain me mon apanagpa i ŋainag iwog inaup amadowoi.
13Jakob inan ai i Sekem inan taman Hamor mai se diwizidin, nadin ludin Dina inaug bazas bedanilakoi. 14I dipidin, Am abaŋ e anaunen tea, nama luma tamol ta i muluŋ so peteŋanilak me apaninen so aloŋ, am mewoi mamai ujan aŋalewoilakoi. 15Taimon e anautap mon am nami azu uzi apaniwoi, aŋnami aitamol daŋan muluŋ peteŋanamap mon am megin anauwoi. 16Meginpe am nama nunumapain aŋ apanaŋpa, nami nunumipain am aŋalpa am aŋ maip temadop id tamolpain badim taimon tenauwoi. 17Ge aŋ nama azu dab so apanitap am nama aipain aŋalep panu ibinip alawoi.
18Nadin azu me Hamor inan ai Sekem mai gamun ifu. 19Tamol faun i pasak abaŋ e inau, i Jakob inan aipainoi ilon gamunime. I inan samungaz ilonnen aenta beleŋanag biŋandaŋan. 20Meginge Hamor inan ai Sekem mai nadin panu inan dalauanlon ditaseg nadin panu inan tamol dipidin, dibol, 21Tamol e tizadged, abinpa fatu elon demadop dadeŋ denaup ditozoi, anasi, tan me iwoi iduse. Id inadin aipain betezemaneklon taŋalmap, i idinad aipain tipinidinpa i diŋaloi. 22Kagin taimon bo tenaumap mon tamol me id maip temadowoi, tamolpain badim taimon tenaunen: ai tamol daŋan muluŋ peteŋanawoi, i muluŋ denasilak egin. 23Inadin bulmakau, nadin filiadin dazuk daŋan mai inad teaboi tat? I maip ilod taimon montap i id maip temadowoi. 24Panu mewain tamolai daŋan dalauanlonge didudime i Hamor inan ai Sekem mai auadin dab depani, i muluŋ denasi.
25Nal tollon tinidin izozge Jakob inan ai azugen, Simeon Lewi mai, Dina inan liungaz nadin badiz diŋalge melabublon panu melon dileg tamol daŋan difu. 26I Hamor inan ai Sekem mai badizlon difug Dina Sekem inan ablon deŋaleg duduzig dile. 27Jakob inan ai, tamol difulak me zidinnen didug nadin panulon abaŋ diŋal, inadin ludin inan bazas bedanilakoi megin denau. 28I nadin belelek, bulmakau, doŋki abaŋ panulon umlon diendime me diŋal. 29Nadin filiadin, nadin aikamo, nadin pain, abaŋ nadin ablon diendime me daŋan diŋalge nadin e dibol. 30Meginge Jakob Simeon Lewi mai ipidin, Aŋ abaŋ muzuan azaeg foglak idu, aŋ anaug ŋa fatu e inan tamolpain leŋadinlon biŋag zuŋandaŋan, Kanaanwain Perissitwain mai ilonnen. Ŋa tamol taitai mon, i detemanip didiŋiagtap dufunagpa ŋepadaloi, ŋa inag samug badimgaz mai. 31Ge i dibol, I amnama luma pain loaŋloaŋ e dibolpa maip dienoi?
Currently Selected:
Genesis 34: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
