Genesis 30
30
1Rahel i ai ta so inaug Jakob paniime me iloŋge i tainoi jenain isuig itoz. I Jakob ipai, Ai ta panagpe, teap ŋa ŋamatoi. 2Jakob Raheloi buzun isag ibol, Ŋa Anut i me oina tini inan fabul pizianilak i naon ŋaŋalge ŋemadoŋame? 3Meginge i ibol, Ŋainag painbegabeg Bilha ie, i maip atoz, meginpe ŋa galiglak ai inaup i‐lon ŋa mai nanugdaŋanoi. 4Meginge i inan painbegabeg Bilha pain dinek egin ipanig Jakob i maig ditoz. 5Bilha i aidaŋange i aitamol ta inaug Jakob pani. 6Meginge Rahel ibol, Anut i inag azu talilak, inag auag mai iloŋlakge aitamol ta panaglak; mewoi i inan nean Dan iblani. 7Rahel inan painbegabeg Bilha faun te aidaŋange aitamol mizimu ta mai inaug Jakob pani. 8Meginge Rahel ibol, Bulekbulek gegaunlon taig mai bulebulelakge ŋa seŋanaglak; mewoi inan ai nean Naftali blani.
9Lea i mug ai ta so inauime iloŋge i inan painbegabeg ŋaleg pain dinek egin Jakob pani. 10Meginge Lea inan painbegabeg Silpa aitamol ta inaug Jakob pani. 11Lea ibol, O seŋanek gauai, gauai mok! Mewoi ai inan nean Gad iblani. 12Lea inan painbegabeg aitamol mizimu ta inaug Jakob pani. 13Lea ibol, Ŋa jaug isa! Paingaz diboloi kibiniagge ŋemadoŋame; mewoi i nean Aser iblani.
14Whit inan melaun saenlon Ruben itozmeg i dumain#30:14 dumain me biab ta me paingaz suzuainenoi deŋaledime ta umlon ŋaleg iseg tinan Lea pani. Meginge Rahel Lea ipai, Oina dumain ta panagpe ŋagod. 15Ge i ipai, O ŋainag iwog wiziaglak me abaŋ se tat? Gazo nanugai inan dumain mai wiziagoi? Rahel ibol, Oina dumain naon i gazomnen oina ablak madowoi. 16Jakob juzalon umlonge isemeg Lea i mai naon tazetazewoi ileg ipai, O izignen uduwoi, ŋa inag nanugai inan dumainlon o ŋadadlak. Mewoi i tidom melon i maig demade. 17Anut Lea dab panig i aidaŋange ai faif me itaseg Jakob pani. 18Lea ibol, Anut i naon panag, ŋa inag iwog painbegabeg ŋepanilakoi, mewoi inan nean Isakar iblani. 19Lea faun te aidaŋange ai siks me itaseg Jakob pani. 20Meginge Lea ibol, Anut i inag ŋalekŋalek naon gauai panaglak; gazo ŋainag iwog biŋag bisawoi, ŋa nanunai siks ŋenaug i ŋepanilak. Mewoi i nean Sebulun iblani. 21Alouge i aipain ta inaug inan nean Dina iblani. 22Meginge Anut Raheloi ilon isouge auan dab panig tinin ifue. 23I aidaŋange ai ta inaug ibol, Anut i ŋainag mamai pasilak. 24I inan nean Josef blanig ibol, Ujanzen ai ta mai batep panagŋan.
Jakob Laban mai uzat naonoi dikibiai
25Rahel i Josef inaulakge Jakob Laban ipai, Noagpa panu e ŋibinip mezaugpanulon ŋalawoi. 26Inag iwog aikamo mai me naon ŋa o izinen uzat ŋenaulak me panagpe binagpa ŋala, uzat ŋa o bia ŋepalulak me uloŋ. 27Ge Laban i ipai, O ubolpa ŋa kin ŋaboloi, ŋa kiai nauklon ŋaloŋ Ujanzen olon ŋa kibiniaglakoi. 28Oina uzat naon ubolpa ŋa ŋepanowoi. 29Jakob ibol, Ŋa o izinen uzat ŋenaulak me o sibe uloŋ, oina bulmakau ŋitizinameg me dodin tat. 30Ŋa so ŋasemeg me taitai mon, uzig me kuzumge ile. Uzat tazeŋ aben daŋanlon ŋadaŋse ŋadaŋlemeg ŋenaulak, mewoi Ujanzen kibiniolak. Ge gazo saŋeptap samuggazoi uzat kin ŋenauwoi? 31I ibol, Abaŋte ŋepanowoi? Jakob ibol, O abaŋ ta so panagoi, o abaŋ e ŋawoi unauwoitap ŋa oina dazuk pifoldaŋan ŋufutuap ŋitizina maiwoi. 32Binagpa ŋa gazomnen oina pifol daŋan ilonnen ŋatozpa belelek balabala konkondaŋan me mai, belelek nanun mummum daŋan, gout balabala konkondaŋan me daŋan mai ŋapaspa me ŋainag uzat naonoi. 33Meginpe o aloupa o inag uzat naon kibianiwoi usetap ŋa sekauk so ŋenaulak me uloŋoi. Tata gout ilonnen balabala tea, konkon mai tea, belelek nanun mummum menen ta nasitap ponau naon e taboloi. 34Laban ibol, Gauai, o ubollak megin. 35Nal melon Laban gout dauai bala zaek melaendaŋan, konkondaŋan mai, gout paiat balabala, konkondaŋan mai, tata tinidin kin kebazan me daŋan mai ipasge inan ai pinidin, i ditizina. 36Geg kin ujan, dal me ad tri inan tazeŋ, i siben inan panu Jakob inan panu mai liluŋlon geg inau. Jakob i Laban inan pifol aenta futua.
37Meginge Jakob poplar ja menen ta mai inan zaen faunfaun me ŋaleg, siliŋon bulutekbulutek igaleg aenta ilon kebazan me beŋten itase. 38Zaen me i bulutig galelak me pifol noadinnen naz inan taweilon inau. 39Pifol i naz dimiliwoi disodime melon inau. Pifol i milekoi disemeg melak manag diabidime, pifol i zaen naonnen nug depelelelai. Meginge pifol i dusuzuaige nunudin me bala zaek melaendaŋan, balabala, konkondaŋan mai ditase. 40Jakob i belelek nanun me tezepaleg, inan belelek me inaug i Laban inan pifol ilonnen bala zaek melaendaŋan, mummum mai, me didiŋiawoi. I siben inan me ibennen inau, me Laban inan mai nug so depelelaiwoi. 41Pifol inan belelek zugudindaŋan me manag diabidime. Jakob ja bulutekbulutek galelak me naz inan taweilon idiz, i ja me liluŋlon depelelaiwoi i meladinlon inau. 42Zugudin gauai tealak iwoi ja menen so inau. Meginge kin bodoklak me Laban inan, zugudindaŋan me Jakob inan. 43Meginge tamol me filian gauzdaŋan, i pifol ujandaŋan, painbegabeg aibegabeg mai, kamel, doŋki maidaŋan.
Currently Selected:
Genesis 30: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
