Genesis 29
29
Jakob Rahel Lea maiwoi Laban bian palu
1Meginge Jakob imaisge tazeŋ jabig tamolpain ad baŋenlon demadodime me nadin fatulon itase. 2Malan ileg fatu talon naz sazek ta nasi, au, belelek pifol tolgen babenlon dien. Naz sazek melon belelek pifoldaŋan naz dipinidin. Pat naz sazek auan fonlak me ujan. 3Belelek pifoldaŋan detemani binip tizinekgaz i naz auanlonpa pat dililip belelek naz dipinidindime. Binip i faun mug pat naz auanlak denau.
4Jakob ipidin, Ŋainag taig, aŋ domtenge ase? I dibol, Am Haran ai. 5I ipidin, Aŋ Nahor inan ai Laban aloŋ? I dibol, Am i aloŋ. 6I ibol, I gauai madoime? I dibol, I gauai madoime, nasi, inan aipain Rahel belelek idauzig isoime. 7I ibol, Nasi ad latnen ienime, dazuk az ilonnen demadonen saen so iduse; belelek naz pinidinpa adauzip anaŋ dianiŋan. 8Ge i dibol, Am anaunen tea, belelek pifoldaŋan detemanip naz auanlak pat me pasip meginmap belelek naz ipinidinoi.
9I ai me mai dikibiaimeg Rahel inan taman inan belelek idauzig ise, i tizinaimelakoi. 10Jakob i tinan inan liun Laban inan aipain Rahel, tinan inan liun inan belelek mai ilge, Jakob ileg pat naz auanlak me pasig, tinan inan liun Laban inan belelek naz pinidin. 11Binig Jakob Rahel musuk panig beŋten ita. 12Jakob i Rahel inan taman inan temalen, me ipaig ibol, I Rebeka inan ai. Rahel palu ileg taman ipai.
13Laban inan liun inan ai Jakoboi azu iloŋge, i mai naon tazetazewoi palug ile. I segageg musuk ipani. I duzig inan ablak inau. Jakob i abaŋ daŋan Laban sai pani. 14Laban i ipai, Malik, o ŋainag dog mudag mai! I mai fulei taimon se demade.
15Alouge Laban Jakob ipai, Waiag e ŋabolmap o uzatoi naon kin so ŋepanowoi tat? Paiagpe abaŋte naon ŋepanowoi? 16Laban inan aipain azugen demadodime, matu me Lea, mizimu me Rahel. 17Lea inan malan jafuf, Rahel bo naon tinin mai gamundaŋan. 18Jakob i Raheloi imat. I ibol, Ŋa oina aipain mizimu Raheloi umaz sewen bia ŋepaluwoi. 19Laban ibol, Aitoige i tamol ta ŋepaniwoi, ŋa o ŋepanomap me gauai; ŋa maip temado. 20Mewoi Jakob umaz sewen Raheloi uzat inau. Jakob Raheloi gauz imatlakoi inan saen uzatnen me dab so pani, pasak bini e ibol.
21Meginge Jakob i Laban ipai, Ŋainag iwog panagpe ŋa maip amadowoi, ŋainag saen tabollak mug itaut. 22Meginge Laban panu me inan tamol daŋan temanag tuz ta inau. 23Juzalon i inan aipain Lea ŋaleg Jakob pani; i me maig demade. 24Laban inan painbegabeg Silpa inan aipain Lea ipanig i bian paluwoi. 25Bomon mon Jakob iloŋ pain me Lea. Jakob i Laban ipai, O ŋawoi dodin unaulak? Ŋa Raheloi izinen uzat ŋenaulak. O dodinge se wiziaglak? 26Laban ibol, Pain mizimu get tamol ŋalenen amnama fatulon kagin megin tea. 27Wik e maip madop ta mai apanowoi, umaz sewen te uzat naon. 28Jakob i megin inau, inan wik binig Laban inan aipain Rahel iwonoi ipani. 29Laban inan painbegabeg Bilha nanunpain Rahel pani, i bian paluwoi. 30Meginge Jakob i Rahel maig demade, i Raheloi kin gauz imat, Leaoi egin tea. I faunte umaz sewen Laban izinnen uzat inau.
Jakob nanungaz ditase
31Ujanzen iloŋge Lea kin meselanig itoz i tinin kibineg ai ta pani. Rahel i inig itozime. 32Lea aidaŋange aitamol ta inau, i nean Ruben iblani. Ujanzen i nainag alan dab panilakoi, malik gazo inag iwog ŋawoi imatoi. 33I faun te aidaŋange aitamol inaug ibol, Bitagge ŋemadoŋame me Ujanzen iloŋge i aitamol e mai panaglak; i inan nean Simeon blani. 34I faun te aidaŋange aitamol ta inaug ibol, Saen gazo e inag iwog ŋa mai betezemanagoi, ŋa aitamol tolgen ŋenau ŋepanilakoi, mewoi inan nean Lewi blani. 35I faun aidaŋange aitamol ta inaug ibol, Saen elon ŋa Ujanzen pez ŋepaniwoi; mewoi i nean Juda blani. Meginge i faun ai ta so inau.
Currently Selected:
Genesis 29: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
