Apostel Sai 9
9
Ujanzen Saulus iwagi, idaŋselag i gob nadin apostel inau
1Saulus Ujanzen inan meglaumoi sezauag itoz, azu buzukbuzuk, ju azu ibolime. I waliŋgaten izinnen ileg,#Apos 8:3 2Damaskusnen ilanen Juda medaeŋoi leta paniwoi igod, aon tata tamol pain mai me kagin faunoi dibolpa ilmap nimadin ipaup Jerusalemnen idauziwoi menen.
3Ilemeg mug Damaskus siziz panimeg didlakge buntaimon sul idug tilianig sepetade.#Kor I 15:8 4I tanlak ibal idug auan iloŋmeg ipai, Saul, Saul! O dodinge ŋa ŋiliag uzagume? 5I sedazeg ibol, Ujazen, o itai? Me i ibol, Ŋa Jesus o i ŋale uziumelak.#Apos 5:39 6Ge umaispa panulon udu, men ta o unaunen me ipaowoi. 7Tamol i Saulus maig dilelak auan mon diloŋ, niŋon bo so denasi; mewoi tinidin tititi ibolge ditiuz. 8Saulus tanlakge imaisge inan malan po ibolge abaŋ so inasi. I niman diabig Damaskusnen duduzig didu. 9Nal tolge i malan itauge made, anaŋ so janiime, naz so imiliime.#Joh 9:39
Ananiaslon Jesus Saulus ikibine, iflani
10Damaskusnen meglaum ta made, i nean Ananias. I malan nitun jazeklon Ujanzen i ipai, Ananias! I ibol, Ujazen, ŋa ie. 11Ujanzen i ipai, Umaispa dal nean Tiduk melon ulap, aon Judas inan ablak udusap Tarsuswain nean Saulus iwoi sodoz unau, uloŋ i godoanimeg madoime.#Apos 21:39 12I malan nitun jazeklon tamol ta nean Ananias izinnen isonen naon nasilak, i inan niman fonlak inau, i abaŋ nasiwoilakoi. 13Ananias auan jabig ibol, Ujazen, kuzum dibolmeg ŋaloŋ, tamol me Jerusalemnen oina gungaz meladin saelak. 14Elaknen mai waliŋgatengaz denaulak ise, daŋan i oina neawoi diboldime iŋalpa ipauwoi.#Kor I 1:2 15Ujanzen ipai, Ula, uloŋ, me i ŋa sibeg dadog ŋawoi ŋipilianilak, inag bubegged, i ŋainag neag ŋalep ilap gobgaz, kiŋgaz Israelgaz mai noadinnen iboloi.#Rom 1:5; Apos 25:13; 27:24 16I ŋainag neagoi alannauk funfunlon itoznen me ŋa ŋepeteŋaniwoi.#Kor II 11:23, 29; Apos 9:23, 29
17Mug Ananias imaisge ileg, ab Saulus madoime, melak iduseg niman fonlak inaug ibol, Saul, taig waza, Ujanzen o dallak usemeg nasilak, Jesus, me i ŋa noagge ŋase, o mala faun po iboloi, Auanuzgun o fofokoi. 18Mug inan malan faun po ibol, abaŋ nasiime. 19I imaisge inau panig flani; i anaŋ jani gauaige tinin gegaun. I Damaskusnen meglaum mai nal tata demade.
Damaskusnen Saulus malanmalan azu ibol, alan mai inau
20Demademeg pasak imaisge Juda medaeŋlon Jesusoi azu ibol, i Anut Ai. 21I azu me diloŋmeg me daŋan gauz dizutge dibol, Ai e so tatge me i Jerusalemnen, me Kristusoi diboldimelak, iŋal uzge itozlak, mewoi i ente mai iselak, mai ipaupa, waliŋgaten izinnen idauzip dilawoi? e dibol.#Apos 8:1; 9:1, 14; 26:10 22Ge Saulus ilon segatig i Jesus sigiani, i Kristus; azu melon i Judagaz Damaskusnen gauz ibezeteŋana, bubudin ikubuli.#Apos 18:28
23I megin saen ta madelag alouge Juda Damaskusnen detemani, dikibiaige Saulus dufunip imatoi dibol.#Apos 23:12–29 24Tata Saulus depaig iloŋ. Au, ad zen tidom zen nadin panu dalauan ditizinadime, i dufunip imatoi menen. 25Meginge inan meglaum tidom i sazeglon dunuleg mad muzinnen dibinig idu.#Kor II 11:32, 33
Saulus Jerusalemnen apostel maig demade
26I Jerusalemnen itaseg meglaum men maip detemaniwoi ibolge, ge i daŋan iwoi dizezdime, i meglaum inaulak me ladinlon so maliklak mewoi.#Gal 1:17–19 27Meginmeg Barnabas mon iŋaleg maig demade, i iduzig apostel zidinnen dile. Dallak Ujanzen inasilak, i azu ipailak, Damaskusnen mai buben jaugjaug Jesus fun blanig azu pidinlak, mewoi i sai pinidin.#Apos 9:20 28Meginge i maig detemani, i mai Jerusalemnen ditozse ditozle, buben so izez, daŋan Jesus inan fun iflalemeg azu pidin. 29I Judagaz me Grik fatulonge diselak mai dikibiaige Jesusoi azu tezepasig ipidin; ge i deŋaleg duzig dufunip imatoi dibol. 30Taingaz me diloŋge Kaisareanen duduzig dile, menge Tarsusnen denaug ile.#Apos 11:25; Gal 1:21
Medaeŋ mazozdaŋan subuloani, kuzum inau mai
31Medaeŋ mug Judea, Galilea, Samaria fatulon mai mazozdaŋan imade. I ilon subuloani gauai, dŋan Ujanzenoi dizutmeg mon ditoz. Auanuzgun inan stemanek sinanlon medaeŋ mai kuzum inaug ile.#Kor I 14:3
Petrus Eneas ikibine
32Petrus itozse itozlemeg nal ta Lida panulon gungaz zidinnen itase. 33Men tamol ta made, i nean Eneas, i mug umaz eit tinin miliaudaŋan ienlak. 34Petrus me ipai, Eneas, Jesus Kristus o tini kibinep panoime, umaispa, sibe oina badim kibine! Mug imaisge tinin gauai.#Mat 10:8 35Lidanen Saronnen maig demade, me daŋan i denasig i mai didaŋseg Ujanzen daŋe depani.
Petrus Tabea fuŋunig imais
36Jope panulon Jesus inan dagompain ta made, i nean Tabea. I itoz gauai, lo iwag mon made. 37Saen melon inaug i maiai funig imat. I sesanun deflanig galuŋ falalak denaug ien. 38Panu Jope me Lida sizizlon ienimelakoi meglaum diloŋtag Petrus men madoime, i tamol azugen denaug digodpa depaiwoi, so imoi mon, gauai isowoi. 39Petrus imaisge i maig dile. Itaselag duduzig galuŋlon didu. Painbob daŋan diseg ditameg nadin kelos nai mai me Dorkas maig demademeg inaulak depeteŋani. 40Ge Petrus daŋan sulusulag didulag i dagun sebenaig idug godoani. Ibinig sesanun izinnen idaŋseg ipai, Tabita, umais! Mug malan itadge Petrus inasimeg imatal.#Mar 5:40, 41; Mat 10:8 41Petrus i niman panig jabig imais. I gungaz painbobgaz mai wigidinge bas peteŋana.#Apos 9:32 42Abaŋ me Jope panulon daŋan diloŋge kuzum newoi Ujanzen ladinlon malik.#Apos 19:17 43Petrus saen kin melaen Jope panulon tamol ta nean Simon, dazuk siliŋon kibinekkamaŋ, izinnen made.#Apos 10:6
Currently Selected:
Apostel Sai 9: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
