Apostel Sai 10
10
Kornelius Kaisareanen, malan nitun jazelak
1Tamol ta nean Kornelius, i opasgaten, inan daup mai me nean Italia daup deblani, Kaisareanen demadodime.#Mat 8:5 2I tamol dagom, inan iwon nanungaz mai demadodime, i daŋan Anutoi dizutdime. I lo iwag mai, tamolpain inan abaŋ kuzum lo pinidin. I dedeŋanek Anut mai godoanimeg mon made.#Luk 7:5 3Meginge santag admeg admetelaen tollon malan nitun jazemeg eŋel inan ablon iduleg nean iblanig, Kornelius, ibol. 4I eŋel lalemeg izutge ibol, Ujazen, ait a? Eŋel ipaig ibol, Oina gadiŋ lo uwalak mai Anut izinnen iduselak, dab ipani. 5Totol tata Jopenen unaupa dilap Simon, me nean subuŋan Petrus deblanidime, duduzip disowoi. 6I Simon ta, me dazuk siliŋon kibinekkamaŋ, inan ab latnen ienime melon lo iseg madoime; i o abaŋte unauwoi ipaowoi.#Apos 9:43 7Eŋel i Kornelius maig dikibiai binilag i inan ab dinek azugen wigidinge inan dauplon opas dagom ta mai wagi. 8Abaŋ eŋel ipailak me sai pinidinge inaug Jopenen dile.
Petrus malan nitun jaze
9Boŋanip egin e dal duzimeg panu siziz depanimeg Petrus ad mati eginlon ab latnen godoaniwoi iduse. 10Meginge pitol funimeg anaŋ kin janiwoi pidin. Dikibineg demademeg Petrus malan ilonnenlon abaŋ inasi. 11Did auan fueg ienmeg inasi, tabiz ujan ta jamel ujan egin dodin palgen isoslak latnenge tanlak bini idumeg inasi.#Apos 11:5–17 12Ilonlon dazuk funfun, guzi ma mai il. 13Auan ta idug ipai, Petrus, umaispa, abaŋ ta saep wani. 14Ge Petrus ibol, Tea, Ujazen, aban salan foadaŋan mai ŋa get so ŋanilak.#Hesek 4:14; Lew 11 15Auan faun ta ipai mug, Abaŋ Anut ikok inaulak me salan, foa e so ubol mon!#Mat 15:11; Mar 7:15, 19 16Megin tolgen inaulag tabiz ujan faun dezaeg did ilonnen imul ile.
17Petrus abaŋ inasilak, mewoi ilon deladalge kankanmeg, abaŋ me niŋon dodin tat ibolge, ai me Kornelius inaulak, Simon inan aboi sodoz denaumeg diseg ab dalauan naonnen ditiuzdime. 18I diwogge dibol, Ab e Simon, Petrus mai deblanidime, madoime tat?
19Petrus abaŋ nasilak mewoi kankanmeg Uz ilon funig ipaig ibol, Uloŋ, tamol tolgen debezanodime; 20umaispa udulap i maip ala, so ilose ilole mon, ŋa ŋenaug dise. 21Petrus ablakge tapas tamol zidinnen idug pidin, Aŋ abezaniame me ŋa. Aitoi ase?#Joh 18:8 22I dibol, Opasgaten Kornelius, i tamol taoz dagom mai, Juda tamolpain daŋan iwoi dibol i gauai, i eŋel gun inan auanlon Anut inan kibiai iloŋlak, o wigiop inan ablak udusawoi, oina aua iloŋoi. 23Mug Petrus didusawoi pidinge i maig demade. Boŋanip egin imaisge maig dile. Jope medaeŋ taingaz taitai maig dile.#Apos 11:12
Petrus Kornelius inan ablak
24Nal uzig melon i Kaisarealon didule. Kornelius iwoi meladin inaug made. I mug inan taintauangaz, badimgaz mai wigidinlak, disowoi ibolge diseg i maig demade. 25Petrus ablak idusawoi inaumeg Kornelius tapasge idug mai naon tazetazeg, nien funlon ibal idug Petrus godoani. 26Ge Petrus jabi ibiseg ipai, Umaispa, ŋa o mai tamol kilian,#Apos 14:15; Bo 19:10 27I mai dikibiaimeg galuŋlon didule. Melon kuzum detemanig demademeg il. 28I pidin, ibol, Aŋ aloŋame, amnama kibiaiŋ am Judagaz gob ablak adusap maip amadowoi pizianamaime. Ge Anut ŋa peteŋanaglak, ŋa tamolai tawoi so ŋaboloi i foa. 29Mewoi ŋa so pizianagge ŋasowoi abolge ŋase. Mewoi ŋisidiziaŋŋame, Aŋ aitoi wigiaglak, ŋasowoi abollak?
30Kornelius ibol, Ŋa nal palgen binig ŋudig ŋemademeg nal gazo itase. Nal malanmalan megin ŋenaumeg ŋemade, admetelaen tollon buntaimon tamol ta jamel nunutekdaŋan naognen itiuz, ipaiagge ibol, 31Kornelius, oina gadiŋ Anut iloŋ, lo uwak mai dab ipanilak. 32O mug totol Jopenen unaup dilap, i Simon me Petrus mai deblanidime paip isowoi. I Simon ta me dazuk siliŋon kibinekkamaŋ inan ablak modoime, ab me laŋten ienime. I isop o maip ikibiaip azu ipaowoi. 33Gazo mok egin totol o izinen ŋenaug dile. O uselakoi gauai unaulak. Am mug daŋan en Anut naonnen atemanilak, oina aualon am aloŋoi, Anut abaŋte azu mon ipaolak, o uboloi.
Petrus auan pidin
34Meginge Petrus auan bufatemeg ibol, Ŋa mug niŋonlon ŋaloŋ. Anut Israel e, gob e so ibolime, tea,#Sam I 16:7; Rom 2:11 35tamolai fatu daŋanlon ta inasimap me iwoi izutime, abaŋ talekoi ibolge inauime, mewoi i ilon gamun funiime.#Joh 9:31; 10:16; Kan 107:20 36I Israel nanungaz inan totol pidinlak, Jesus Kristuslon mazozoi zidinnen azu inaug idulak. Ŋan i daŋan nadin Ujanzen.#Mat 28:18 37Aŋ azu me aloŋame, me Johanes inan flanek saenlonge Galileanenge itaseg iseg Judea fatu daŋan mai ifofok pasi.#Mat 4:12–17 38Anut i Jesus, Nasaretwain, Uzgunlon tiwonlon mai buzugusilak itozse itozlemeg lo idumeg maŋau inaulak, tinidin me buga ipaug demadelak kibinia pinidinlak, me Anut i mailakoi newoi.#Jes 61:1; Mat 3:16; Luk 4:18 39Abaŋ maŋaumaŋau daŋan i Juda fatulon, Jerusalemnen mai inaulak, me am daŋan sigianektamol amadoame. Ŋan me i deŋaleg jalak dezaig imat pasi.#Gal 3:13 40Ge Anut ŋan me taen azug geglonge faun fuŋunig bas imais.#Kor I 15:4–7 41Ge tamolai daŋan noadinnen i so inaug denasilak, tea, sigianektamol me Anut get pilianalak, me mon, ŋan me am. I mateŋlonge imaislag alounen am i mai anaŋ anilak, tuz imililak.#Joh 14:22; 15:27 42I am kibiai penamalak ibol, am tamolpain azu pidinpa i sigianiwoi: Anut i inaulak, i bas ditoz me mateŋlon me mai nadin betenaekgaten madowoi.#Apos 17:31; Rom 14:9, 10 43Profet daŋan mai i disigianig dibol: me i ladinlon malikmap, inan neanlon aupasek pazep idunen deŋalewoi.#Jes 53:5, 6; Jer 31:34; Hesek 34:16; Dan 9:24
Auanuzgun idu. Petrus iflana
44Petrus azu megin ibolmeg, daŋan azu diloŋmeg i fodinlak Auanuzgun idu. 45Judawain Jesus ladinlon maliklak, me Petrus maig diselak, denasitag gob fodinlak mai Auanuzgun wali idulak, bezeteŋanag gauz dizut. 46I mai diloŋ, gob mai beladin faunlon azu dibol, Anut kalel depani. Meginge Petrus ibol,#Apos 2:4; Mar 16:17 47It mon naz pizianip me so flanawoi, me mug id kiliad Auanuzgun deŋalelak?#Mat 3:11 48I kibiai pinidin, Jesus Kristus neanlon deflanawoi ibol. I digodlak nal taitai maip demadowoi dibolge maig demade.#Joh 4:40; Kor I 1:17
Currently Selected:
Apostel Sai 10: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
