Apostel Sai 8
8
EKLESIA SAMARIA SIRIA MAI, GOBLON FUN INAU, 8–12
Jerusalem medaeŋ diŋal duz, petetale
1Stefanus dufunig imatlakoi Saulus ilon gamun funi. Saen melon agez Jerusalem medaeŋ gauz mok diŋal duz, mewoi medaeŋgaz daŋan petetaleg Judea fatu Samaria fatu maig sekeleanig diau, apostel mon demade.#Apos 7:58; 11:19 2Anut inan dagomgaz i Stefanus denau, iwoi tiŋia gauz idu.#Mat 14:12 3Ge Saulus medaeŋ pitiŋiniwoi ibolge, buzukbuzuk ab zazeg itoz iduseg tamol mai pain mai iŋalge ipinidin, sebaneklon funata.#Apos 9:1; 22:4
Lotamol Filipus Samarianen
4Petetalelak me ditozse ditozleg azu dibol.#Apos 9:32; 11:19 5Meginge Filipus Samaria panu talon ileg Kristus fun blanimeg made.#Apos 6:5 6Tamolpain men Filipus inan auan diloŋge gauai deŋale. Maŋau inauime denasimeg bubudin taimon egin azu dab depani. 7Kuzum i bugadaŋange me gauz dibobmeg disifililia; aenta kuzum tinin miliaudaŋan, nien laleg mai, i faun tinidin bas ditozdime.#Mar 16:17 8Panu me daŋan judin gauz isaime.#Joh 4:40–42
Kiaitamol Simon
9Tamol ta nean Simon, i panu melon get mademeg kiai inau; Samariagaz inan maŋauoi meladin kebazan, i ibol i tamol iben, ujan. 10Daŋan mok, ujanujan mai kamokamo mai iwoi dibol, Tamol e Anut tiwondaŋan, Ujan teblanitame me. 11I saen melaen inan maŋaulon tamolpain meladin kebazan pinidinlakoi, mewoi mon daŋan iwoi megin dibol. 12Ge alouge i Filipus inan azu Anut kiŋdom inan totol gamunoi, Jesus Kristusoi mai ibolmeg ladinlon malikge tamol pain mai denau depanig diseg i flanawoi dibolge i flana.#Mat 28:19 13Au, Simon mai ilonlon malik. I mai flaniwoi ibolge iflani; lag i sansan Filipus maig ditoz. I abaŋ maŋau Filipus nimanlon inaug idug nasimeg izut deladal.
Petrus Johanes mai Samarianen uzat denau
14Apostel Jerusalemnen diloŋmeg Samaria mai Anut azu ŋalelak i Petrus Johanes mai denauge dile.#Apos 3:1 15I dilemeg ditaseg iwoi dogodoani, i Auanuzgun deŋalewoi menen. 16Tatata i get so deŋalelak, tea, Kristus Jesus neanlon mon get flanalak. 17Meginge i nimadin fodinlak denaumeg Auanuzgun deŋale.#Tim I 4:14
Petrus i Simon peneŋani
18Simon nasimeg apostel nimadin fodinlak denaumeg Auanuzgun deŋaledime i apostel gaŋmalan pinidinoi ibolge 19pidin, Aŋ maŋau ŋa mai panagŋan, meginpe ŋa ta fonlak nimag ŋenaupa i Auanuzgun iŋalewoi. 20Ge Petrus i ipai, Oina gaŋmalan o mai padal mon alawoi, o Anut inan zaiŋ gaŋmalanlon udadoi ubolumelakoi!#Mat 10:8 21Blani panek e oina ba teab, inan fuzan mai oina teab mok! O Anut naonnen bube tiduk teabe.#Kan 78:37 22Mewoi o tulufunop udaŋsawoi, bube salan funig utozume me biniwoi; Anut naonnen ugodpa oina bube salanoi kumelak me pazep iduwoi tat. 23Ŋa ŋenaso, o bube kisipan gigiendaŋan, so talilak melon paug utozume.#Jes 58:6 24Mug Simon auan jabig ibol, Aŋ Ujanzen mai ŋawoi agodpa abaŋ abollak menen tata so funagoi.
25Apostel azugen Ujanzen inan azu sigianilag inan auan mai dibollag Jerusalemnen dimulge dilemeg dallak Samaria panu aenta mai totol gamun dipidin.#Joh 4:35
Mummumwain ta kagin malik bezanig itoz
26Meginge Ujanzen inan eŋel Filipus ipai, Umaispa jauan baŋenlon dal Jerusalemnenge Gasanen fatuudaulon iduime, melon ulap dal wabip mado. 27I imaisge ile. Nasi, mug tamol mummum ta Afrika fatu Aitiop menwain tinin paseklak ilaime. Tinin paseklak i kwin Kandake inan jesnenkamaŋ, inan nimanlon mon i inan jes daŋan inaulak ien. I Jerusalemnen godoaniwoi iselak.#Kan 68:32 28Faun imulge inannen ilawoi isemeg inan bobolak matalge profet Jesaia inan gazek isutimeg ilaime. 29Mug Uzgun Filipus ipai, Upas usop bobo izinnen ula. 30Me Filipus palu isemeg iloŋ i profet Jesaia auan sutiime. I ipai, O sutiume me kin uloŋume? 31I ibol, Ŋa dodin ŋenaup ŋaloŋoi, ta kin fun so paiag ŋaloŋ. I Filipus igod izinnen bobolak idusap maip kin demataloi. 32Azu sutilak niŋon egin: I belelek egin deŋaleg saeknen abenlon duduzig dile; i malol mon belelek nanun me tinin depasidime egin, megin i mai auan kati ibolmeg mon made.#Jes 53:7, 8 33I tanlak zaeg imul itozlaklonge, inan alan nauknen paenlonge wozai ŋalelak; it mon inan daz sutap iloŋoi tat? i tanlakge belemanig pasilakoi.
34Mug tinin paseklak auan biseg ipai, Ne ubolpe, itoi profet megin ibollak? Siben iwoi tat, tea, tawoi tat? 35Meginge Filipus auan bufateg azu sutilak funfun inaug ibolge daiag iseg, Jesus inan totol gamun mai fun flale id pasi.#Mat 5:2
36Dal duzig dilemeg naz ta izinnen ditase. Jesnentamol ibol, Nasi, naz ienime, ua, it flanagnen pizianagoi?#Apos 10:47 37Filipus auan jabig ipai, O bubedaŋan ilolon maliktap meginoi. I auanlon pasi ŋaleg ibol, Ŋa iloglon malik, Jesus Kristus i Anut Ai.#Mat 16:16 38I ibolge bobo men dibinig ien, auzun, Filipus tinin paseklak mai tapas nazlon didug Filipus iflani. 39I dublak diduseg Ujanzen inan Uz Filipus inaug mitian iau, jesnenkamaŋ i faun so inasi. Ge me i zigemeg mon inan dal uzig ile.#Kiŋ I 18:12; Tes I 4:17 40Filipus mug Asdodnen denasi. I itozse itozleg patunpasinen totoloi azu ibol. Megin ilemeg Kaisareanen itase.#Apos 21:8, 9
Currently Selected:
Apostel Sai 8: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
