Apostel Sai 7
7
Stefanus inan seŋanekazu, funtemadingaz saen
1Mug waliŋgaten ibol, i dibollak megin tat unau?#Gen 11:31; 15:7 2Ge i ibol, Taiggaz, tamaggaz, dab anau! Inad mam Abraham get Harannen so ilelag Mesopotamianen mon mademeg Anut kubeldaŋan i naonnen itaseg 3ipai, Umaispa ina panu binip ula, ina taitauagaz daŋan ubinpa, fatu ta ŋa o ŋepeteŋanop men ulawoi.#Gen 12:1 4Meginge i Kaldea fatulonge itaseg Harannen ileg made. Inan taman imatlag i menge duzig ile, fatu elon, aŋ gazo amadoame inau.#Gen 11:32 5Fatu enen kitek ta fuzan so pani, ge i blani pani, inan daz gazop iŋalewoi. Saen melon bo i ai tea.#Gen 13:15 6Ge Anut egin ibol, inan daz panutewain egin panu baslon imadowoi, men i begabeg egin itozoi denaup depaniwoi, umaz 400 pinipinip mon itozoi gegaun depaniwoi.#Gen 15:13, 14; Ekso 12:40 7Tamolpain me inan begabeg i ditozdime me ŋa ŋebetenaewoi. Anut ibol, Aloupa i bezazou diauwoi, elak ŋa dogodoanagpa dagom depanagoi. 8Meginlakoi i temanek mai inau, inan bagoz me muluŋ. Meginge Abraham iwon Isak inau. Me nal eit itozlag iŋaleg bagoz me ai tininlon inau. Isak inan ai me Jakob. Jakob inan ai twelf me id fudtamadgaz.#Gen 17:10
9Ge i Josefoi segazadin isag Egiptanen didad ile, ge Anut i maig demade.#Gen 37:28; 39:1, 2, 21 10Alan nauknen daŋanlonge i bise ŋalelak, Egipta kiŋ Farao naonnen ikibine gauai, ilon kaginkagin mai ipani. Meginge Farao i bise ŋaleg Egipta fatuoi, inan aboi mai gaten inau.#Gen 41:38–45; Kan 105:21
11Meginlag Egipta Kanaan mai pitol alannauk mai ujan ijab, inad tamadgaz mai anaŋ tea. 12Ge Jakob Egiptanen anaŋ ienime iloŋtag inad tamadgaz malanmalan inaug dile.#Gen 42:2 13Faun inau mugge dileg melon Josef inan taingaz noadinnen boboloanig idu, i diloŋ; meginge Farao mai Josef inan daz iloŋ.#Gen 45:3, 16 14Meginlag Josef inan taingaz inauge dimul, inan taman Jakob taintauangaz mai me temanig 75 mon didauzip diduwoi ibol.#Gen 45:9–11 15Meginge Jakob Egiptanen ile. Men i imat, inad tamadgaz mai.#Gen 46:1; 49:33 16I diŋalge diseg Sikemnen fedafodaben get Abraham Sikemnen Hemor nanungaz nadin idadlak melon denau.#Gen 23:16, 17; 50:13; Jos 24:32
Moses inan saen
17Blani panek saen, mewoi get Abraham ipailak, sizizlonmeg daz itezepaleg Egiptanen kuzumpanu denau.#Ekso 1:8 18Megin tezepalemeg kiŋ faun imaisge i Josef kin so iloŋ. 19I inad daz dal fenafunlon inau salan, tamadgaz ipinge kibiai pinidinge ibol, i nadin nunudin faunfaun denaulak disiziniap so basoi.#Ekso 1:22
20Saen melon tinan Moses inau. I Anut naonnen ai gizaudlakoi i me fulei tol taman ablon futui.#Ekso 2:2; Heb 11:23 21Alouge nazlon detanig Farao aipain ibise ŋaleg inan ai mok egin iduzi.#Ekso 2:10 22Moses Egipta nadin maŋaumaŋaulon itubge itoz. Meginge i azulon abaŋabaŋ inaumeg melon mai tezepasig gegaunge inaug itoz.
23I umaz 40 itozlag inan taingaz, me Israel nanungaz, ilon isouge iloi ibol.#Ekso 2:11 24Meginge i nasi, ta i dufuni alan. Megin imaisge Egiptawain naon ipanig ifunig imat.#Ekso 2:12 25I ilon ibol inan taingaz melon diloŋoi Anut i inan nimanlon putudin pasiwoi, ge i so diloŋ. 26Nal ta zidinnen ilemeg inasig azugen nug dupusaidime. I bebanameg pidin, i mazoz demadowoi, ibol, Tamol, aŋ timigaz, ait aŋ nug alan noaŋame!#Ekso 2:13 27Me i inan muduban funiime imaisge Moses bitig ipai, It mon o fomalak nama gaten betenaekkamaŋ mai nuolak?#Ekso 2:14 28O ŋa maip funag ŋamatoi, noz Egiptawain funig imatlak egin? 29Moses azu mewoi iau, fatu Midianlon baswain made, men inan iwon inan ai azugen inau.#Ekso 2:15; 18:3, 4
30Umaz 40 binilag Anut inan eŋel did Sinai inan fatuudaulon faiag nanameg inan jabalenlon itase.#Ekso 3:2; Deut 33:16 31Moses abaŋ megin nasimeg izut deladal, Iziknen ipazmeg deleŋani gauaioi ibolge Ujanzen auan iwog ipai, 32Ŋa ina tamagaz nadin Anut, Abraham inan Anut, Isak inan Anut, Jakob inan Anut. Meginge Moses tinin terere ibolge abaŋ nasiwoi malan piziani.#Ekso 3:6 33Ge Ujanzen i ipai, Oina nieaten upaspa, aben o utiuzume me tan gun! 34Inag tamolpainbadim Egiptanen alan denaug demadodimelak ŋaillak, desagaidimelak ŋaloŋlak, mewoi ŋa ŋadulak i ŋipiziadinoi; segauz usop ŋa o ŋunuop Egiptanen ulawoi.
35Moses ŋan me, me i get demeselanilakge depai, It mon o fomalak nama gaten betenaekkamaŋ mai nuolak? Ŋan me Anut eŋel nimanlon me faiaglon nasilak inaug i Israel inan Ujanzen mai patunpaseknen mai inauwoi.#Ekso 2:14 36I me idauzig iŋal, maŋaumaŋau Egiptalon, Masdazanlon fatuudaulon mai anaŋ 40 daŋanlon inau idu.#Ekso 7:3, 10; 14:21 37Moses ŋan me i Israel nanungaz pidinlak, Profet ta ŋa egin Anut nami timigazlon inaup ibisawoi, inan auan me dab apaniwoi.#Deut 18:15 38Ŋan i me i fatuudaunen medaeŋlon eŋel mai me Sinailak i maig kibiailak, inad tamadgaz maig liluŋlon sebateknen madelak. Ŋan i mai azu basnen ipailak, id panadoi.#Ekso 19:3 39Ge inan auan tamadgaz so dagom depaniwoi dibolge dupututi; dubulip Egiptanen dimuloi bubudinlon dibolmeg, 40dimaisge Aron depai, O tibud naup penamape, i malan dimugpa dilap duzumawoi; am so aloŋlak Moses i Egiptanenge duzadlak, abaŋte tat nauime, domten tat madoime!#Ekso 32:1, 23 41Saen melon i bulmakau mazoz deteŋanig ja denaug mazoztibud depani; nadin nimadinlon deteŋanilak mewoi i zigia.#Ekso 32:4, 6 42Meginge Anut i ibinge sebadin noadinnen ditoz, did inan patui biadin depalu, profetgaz nadin buklon get degazelak egin: Israelbadim, aŋ fatuudaulon umaz 40 melon janauklon dazuk, abaŋ aenta tat apanaglak?#Amos 5:25–27 43Tea, aŋ tibud Molok inan tazas abezaulak, nami tibud Repan inan patui teŋanek mai, mazoz me, me aŋ ogodoaniwoi anaulak me. Mewoi ŋa aŋ ŋetanaŋpa Babilon akilon ŋisiziniaŋoi.
Temaneknen tazas saen, tempel saen mai
44Inad tamadgaz fatuudaulon mai temaneknen tazasdaŋan. Mewoi get Anut Moses mai kibiailak; kibiai pinidinlak, naolalek imaislak egin, megin teŋaniwoi ibolge denau.#Ekso 25:40 45Tazas me alouge inad tamadgaz, me i pinidinlak, Josua nimanlon deŋaleg dise, fatu elon denau. En saen melon gobgaz demade; ge Anut me inad tamadgaz noadinnenge ikudua. Dawid itaseg megin mon ien.#Jos 3:14; 18:1 46Ŋan me Anut kanim ŋaleg toanimeg igod, i Jakob inan madokab sasewoi ibol.#Sam II 7:2; Kan 132:5 47Ge Solomon ab me saselak.#Kiŋ I 6:1 48Ge Ujanzen tempel nimanlon desasedime melon so imadoime. Mewoi profet mai ibol,#Jes 66:1, 2 49Did i inag kubelpezatiu, tan me inag niegnen kalik, ait mon aŋ ŋawoi ab sasewoi abol? Tea, domten mon ŋainag wonoŋabeg ienime? Megin Ujanzen ibolime, 50Inag nimag abaŋ dadon isag so tat inau?
Seŋanekazu wadan. Tamolpain meladin isae
51Wagaibibian aŋ, bubumi foadaŋan, tiliŋami meteteŋanek atoz! Aŋ dedeŋanek Auanuzgun liwon abiame, nami temamigaz denaulak, megin aŋ mai.#Ekso 32:9; Lew 26:41 52Profet it mon nami temamigaz so deŋale duzilak? I me mai difug dimatlak, i tamol taoz ewoi get azu dibollak. Ŋan aŋ mai me inan blaneknen, funek imatnen amadoame!#Sai II 36:16; Mat 23:31 53Aŋ bo eŋel auadinlon kibiaiŋ aŋallak, ge aŋ so mok uzi paniamelak.#Ekso 20; Gal 3:19; Heb 2:2
Seŋaneknen mateŋlon imat pasi
54I megin diloŋmeg nadin bubudinlon azu me ju isaeg pambelae egin inau, buzun kekazunlak liwodin giri ibol.#Apos 5:33 55Stefanus Auanuzgun ifofokge didlak itadge Anut inan kubelkubel inasi, Jesus Anut tiwon waŋlon itiuzime nasimeg iwog,#Luk 22:69 56Aloŋ, ŋa did dalauan fueg ien, Tamolai Anut tiwon waŋlon itiuzmeg ŋenasiŋame.#Mat 26:64 57I mug muduf zen denaug nadin tiliŋadin dubutuni, dezezabeg diseg debetetanig deŋaleg panu wadanlon didu, 58men patlon dufunig imat pasi. Sigianekai nadin jamel dipasge aifaun ta nien funlon denau, ai me Saulus.#Apos 22:20 59Meginge i dimaisge Stefanus patlon dufuni; ge i godoanimeg ibol, Ujazen Jesus, ŋainag uz duzi panag!#Kan 31:6; Luk 23:46 60I dagun sebenaig idug gauz iwogime, Ujazen, nadin aupasek so naup ien mon! I megin ibollag imat pasi.#Luk 23:34
Currently Selected:
Apostel Sai 7: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
