Timoteus II 2
2
TIMOTEUS SEGATIP MADONEN TANSAEK AZU TA
Timoteus dodin uzatlon itozoi
1Mewoi o, inag nanug, kanim me Kristus Jesuslon ienime melon gegaup mado. 2Abaŋ o izignen sigianek kuzum noadinnen uloŋlak me tamol bubudin malikdaŋan pinidin, i mai aenta depeteŋananen diloŋoi. 3O aenta mai Kristus Jesus inan jubi gauai egin alan naup mado!#Tim II 1:8; 4:5 4Tamol ju uzat inauime me madoknen abaŋlon so sebaniime, i ibol gaten i uzat panilak me gamun funiwoi. 5Ta i bulebulemap ge kagin taozlon so inauime i biŋan inan lilit so depaniwoi.#Tim II 4:8 6Tamol um uzat muzuan funiime i malan niŋon iŋaloi tabol.#Kor I 9:7 7Ŋa ŋabolŋame mewoi kankan, Ujanzen abaŋ daŋan uloŋnen panowoilakoi.
Kristus inan imaisnen ilod ŋaleime
8Ilo isou Jesus Kristus i fuŋunig imaislak, i Dawid inan daz, ŋainag totol gamun ibolime egin.#Kor I 15:4, 20; Sam II 7:12 9Melon ŋa alan ŋenauŋame, ŋuzaŋuzdaŋan, aupasekbibian kilian, ge Anut inan azu so sebanilak.#Ef 3:1, 13 10Mewoi ŋa pilianekgazoi abaŋ daŋanlon segatagmeg ŋemadoŋame, i mai Kristus Jesuslon patunpaseknen, uzip dedeŋaneknen kubel mai deŋalewoi.#Filemon 1:12–14; Kol 1:24 11Me azu malik: Id i maip tamatmap id i maip bas temadowoi.#Kor II 4:11 12Id segatip temademap id i maip gaten tenaup temadowoi; id i temeselanimap i mai id meselanadoi.#Mat 10:33 13Id bubud malik teamap i buben malikdaŋan madoime, i sibenoi sekauk inaunen tea.#Rom 3:2, 3; Num 23:19
Azuoi so dizoioi
14Abaŋ ewoi ladin isounen pinidin, Ujanzen malanlon gauai bebana, i azuoi so dizoioi. Me abaŋ niŋon tea, i me diloŋdime ladin mon ikubuliime.#Tim I 6:4; Tit 3:9 15Ai kibianig iduselak egin jaeŋjaeŋ unaup Anut naonnen utoz, Uzattamol mamai tea, azu malik tiduk flaleime egin.#Tim I 4:6; Tit 2:7, 8 16Ge azu se malapiziŋinek me saziz pani, i me kagin salan, Anut inan tealak me sebateime.#Tim I 4:7; 6:20 17Inadin azu dai salan egin janip tezepalep ujanoi. Menen me Himenaeus Filetus mai.#Tim I 1:20 18I azu malikoi dezegailak, i dibol tiziau get idulak. I taitai nadin ladinlon maliknen dubulidime.
Kris medaeŋ inan fod gegaun
19Ge me Anut inan fod gegaun ienime. I bagoz medaŋan, Ujanzen inangaz iloŋime; ta mai, Daŋan i Ujanzen nean deblanidime i abaŋ taoz tea me dibiniwoi.#Jes 26:13; Joh 10:14
Ablon bod fun azuazu dien
20Ab ujanlon dazuk goldlon silwerlon dikibinelak mon so ienime, tea, jalon ganallon mai, ta leŋalaŋ inan, ta uzat ta inan.#Kor I 3:12 21Ta i abaŋ salasala sibenlon gezeŋanimap i uzat gauai inan dazuk, siben gun inaulak, ujanzen dininen iduse, uzat gauai daŋan inaunenoi buben ienime.#Tim II 3:17
Kristus inan dinek inan tazeŋ
22Ge ai faun nadin bubudin imaisnen me ubinpa wau, ge abaŋ taoz, ilolon maliknen, ilopanek mazoz mai uzi, aenta i bubudin ikokdaŋanlon Ujanzen dewagidime me maip taimonoi.#Tim I 6:11; Mat 5:8 23Ge kibiaik gedagad maŋau tealak mai me ubit, o uloŋume me siai fun.#Tim I 4:7 24Anut inan begabeg i so izoioi, tea, i daŋan zidinnen lolon itozoi, peteŋanek gauai egin, tinin saek azu segauz joazewoi.#Tit 1:7; 3:2; Mat 12:19 25Binek iduklon liwon jabekgaz dal ipeteŋanawoi. Anut i santap tulufunek idaŋsanen ipinidinoi tat, i mai azu malik diloŋoi.#Heb 10:26; Apos 11:18 26Meginpe i get Satan inan auan duziwoi sebanalak faun te kagindaŋanpa inan dob dibiniwoi.#Luk 5:10
Currently Selected:
Timoteus II 2: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
