Timoteus II 3
3
WADANLONPA SAEN SALAN IDUWOI
Tamol audipaspa ditozoi
1Ge me uloŋ, nal wadanlon saen salan iduwoi.#Tim I 4:1 2Tamol sebadinoi mon dimatoi, gaŋmalanoi dimatoi, dufuzozoi, tinidin denau imugoi, azu salan diboloi, tinadin temadin dagom so dipinidinoi, Anut pez so depaniwoi, gun teap ditozoi,#Rom 1:29 3lo tea, siai pasinen dimoi, ufnaukwain, bubudinlon pizianek teaboi, duguze, kagin gauai zezeŋanek, 4kadoi blanekwain, nadin nauknauk susula, ŋagas ditozoi, zigiekoi dimatoi, ge Anutoi tea.#Fil 3:19 5Anut dagom paneknen me malajabek mon ditozoi, ge inan tiwon me demeselaniwoi. Me o nao pasip utoz.#Mat 7:15, 21; Rom 2:20; Tit 1:16 6Menen aenta ab tatalak dipisiak didusadime, buben imaisnen inan aupasek funfunlon toanalak pain menen ta desebanadime.#Mat 23:14; Tit 1:11 7Sansan azu deŋaledime, ge azu malik diloŋnen lo tea.#Tim I 2:4; 4:3 8Janes Jambres mai Moses liwon diabilak egin, megin e mai azu malik liwon diabidime. Tamol me nadin kankan debenenailak, ladinlon maliknenoi so didusadime.#Ekso 7:11, 22 9Ge inadin uzat gauz so daiawoi, inadin gedagad daŋan me noadinnen beŋten ienoi, tamol azugen me nadin egin.
Paulus i naolalek
10Ge o inag peteŋanek azu uzi panilak, inag tazeŋ, inag uzat ŋenaulak, inag iloglon maliknen, inag ilog nasinasinen mon, inag ilopanek, inag so ibolnen, 11inag ŋiliag uzagnen, inag alan nauknen, abaŋ me Antiokianen, Ikonianen, Listranen izignen didulak, ŋalek uzek ŋa toanaglak me uloŋ. Ge me daŋanlon Ujanzen i pisiaglak.#Apos 13:50; 14:5, 19; Kan 34:20 12Daŋan me Kristus Jesuslon Anut inan kagin niŋonlon ditozoi ladin ibolime, i alan denaup demado mokoi.#Mat 16:24; Apos 14:22 13Ge tamol sladin sekaukgaz mai sewozaik desebatep ilap kagin salan moklon didulawoi. I sewozaikwain, ge aenta i mai se diwizidindime.#Tim I 4:1
Anut inan azu dab depaniwoi
14Ge abaŋ o uloŋge ŋalelak ilolon malik mailak me it izinnen ŋalelak ilo isoup melon mado.#Tim II 2:2 15O ai kiteklonge gazek gun uloŋlak, me o patupaseknen fun ilolon maliknen Kristus Jesuslon peteŋanonen iloŋ.#Joh 5:39; Kan 119:99 16Gazek daŋan me Anut Uz inan iweklon itaselak, me pateŋanekoi, tulufunek paninen, dal tiduklak naunen, taoz inan kaginlon duzeknenoi mai iduselak.#Pet II 1:19–21 17Anut inan tamol idusap madowoilakoi, i uzat gauai daŋan inaunenoi dadon isawoi.#Tim I 6:11
Currently Selected:
Timoteus II 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
