Petrus II 2
2
PETEŊANEK SEKAUK DODIN DENAUDIME? 2
Krisgaz peteŋanek sekaukoi dab denauwoi
1Get tamolpain leŋadinlon profet sekauk demade, aŋ ilonlon mai peteŋanek sekauk demadowoi, me kukumkukum padalnen azu sekauk deŋalep disowoi, nadin Ujanzen me i idadlak iwoi dekakezoi, pedaleŋ pasak fodinlak dezaep iduwoi.#Mat 24:11; Tim I 4:1 2Kuzum inadin buben funek kagin duziwoi, dal malikoi azu salan diboloi. 3Nadin bulases kaginlon i azu sekauklon se diwiziaŋoi. Iwoi betenaek nauknennal o get mon se so ienlak, inadin padalnen so idozime. 4Anut i eŋelgaz me i audipaslak ilon so pinidinlak, tea, Hadeslon ibetetanag mafuz tinanlon itizinap demadowoi, betenaek inan nallon eginmap. 5I tealakgaz getnen mai so tuzugusa, tea, ge nadin fatulon siz izaemeg Noa i taoz inan sigianek, 7 ta mai getadin pasilak.#Pet II 3:6; Gen 8:18 6I Sodom Gomora panu ibulseg sagaf inaulak, i meladin teaboi meselanalag i me, me saen gazogime Anut mai so ditozoi inadin naolalek inaulak.#Gen 19:25 7I Lot me taozlak salanbibiangaz nadin pezebedanekoi tiwon izozlak tetazi ŋalelak. 8(Tamol taoz i leŋadinlon mademeg nadin nauknauk kagin tealak inasi iloŋ mailak me nal daŋanlon inan buben pitiŋini),#Hesek 9:4 9Mewoi Ujanzen i dagomgaz kibianeklon tataz iŋalnen iloŋime. Ge me i taoz tealak me naon pinidinmaplap betenaek nal idumap eginmap.#Kor I 10:13; Bo 3:10 10Ŋan me mok me i nun panek inan buben imaisnen duzig ditozdime, gatengaz mai fiziŋodin dusunidime.#Juda 7, 8, 16
Peteŋanek sekauk nadin kagin salan
Bak pazekwain, sebadin noadinnen ditozdime, i tamol gauai biŋadindaŋan dizadin dewaiwoi so dizez. 11Ge eŋel i nauknauklon tiwodinlon mai bak pazekgaz denenazag i biŋantamoloi Anut naonnen peneneŋanek azu so diboldime.#Juda 9 12Ge i me dazuk ladin tea egin, i nadin jatek uzig diabnen difup dimatnen, abaŋ i so diloŋdime mewoi azu diboldime, i i mai pedaleŋ taimonlon depadaloi,#Juda 10; Kan 49:13 13kagin taoz tealak inan naon deŋaledime, adlon anaŋ tetameklon zigiaime. I bibianek benenaik mai, nadin malaiseklon zigiaime, i aŋ mai iliŋanmeg anaŋ atetameame.#Juda 12 14I jait mon meladin ifofok, aupaseklon tinidin jaeŋ gauz funiime. I tamolai ladin bodoklak iwoi maŋaiz denaudime. Bubudin bulases maŋaudaŋange ditozdime. I ai meselanek! 15Dal tiduk me dibinig dedeladalge ditoz, i Bileam, Beor inan ai, inan dal duzig aupasek inan naonoi dimat.#Num 22:7; Bo 2:14 16Ge Bileam aupasekoi bebanilak, doŋki azu so ibolime i mug tamol auanlon ibolge profet inan gedagad ibiti.#Num 22:28
I nadin tamolbi bininiap desebanadime
17E me naz bubuaik mamas, kisikas me tim ujan fazeg ilaime; iwoi mafuz tinan bageunen dizig ienime.#Juda 12, 13 18I digasge auadin ujanlon azu lasen zen dibolge i tinin inan malaisek, buben funek inan tazeŋlon tamol me noz mok tealakgaz nadin zegaiklon tuzugusalak me etedin desaedime.#Juda 16 19I paseklon demadowoi blani dipinidinmeg i sebadin pedaleŋ inan begabeg demadodime. Abaŋte tat inaug tamol i paenlon madoimelak, ŋan me sebanek paniime.#Joh 8:34; Rom 6:16
Buben feanekgaz nadin wadan salan
20I inad Ujanzen Patudpaseknen Jesus Kristus diloŋmeg tan inan nunlon tuzugusalak, ge faun te melon sebanap seŋanek bedani maimap, meginpe wadan gazo me wadan getnen beleŋani.#Mat 12:45 21I dal taoz diloŋlak, ge kibiaiŋ gun ipinidinlak me faun miz depanilak me gauai tea. I get so diloŋpeges me gauaipe.#Luk 12:47, 48 22Azu tibun naon taimon egin ienime, Gaun inan luek faun te janiime. Ta mai, Boz flanilak faun te naloglon tilibulime.#Met 26:11
Currently Selected:
Petrus II 2: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
