Petrus II 3
3
TAMOL AENTA DIBOL JESUS SO ISOWOI, 3
Wadan saenlon Ujanzen imul isowoi
1Bubeggaz, e mug gazek azugen ŋa aŋ ŋepanaŋlak. Gazek azug elon ŋa aŋnami kankan taoz ŋufuŋuni, lami isounenoi.#Pet II 1:13 2Aŋ azu profetgaz gun get dibollak, Ujanzen Patudpaseknen inan kibiaiŋ apostellon aloŋlak me mai lami isouwoi.#Juda 17 3Aŋ e imugsap aloŋ nal wadanlon dizan waikgaz disop dizan dewaiwoi, nadin bubudin imaisnen duzi depaniwou.#Tim I 4:1 4I diboloi, Isonen blani panaŋlak me ŋan? Sesgaz dimatlak melonge abaŋ daŋan get funlon naulak egin mon gazo e mai diendime.#Jes 5:19; Hesek 12:22; Mat 24:48 5I azu e so diloŋdiloŋ denau, Anut azulon did wagam ienlak, tan maslonge ibiseg maslon egin itase.#Mat 24:38; Gen 1:6, 9; Kan 24:2 6Melon tealakgaz get demademeg mas dezemanag depadallak.#Pet II 2:5; Gen 7:21 7Ge did tan mai gazo ienime me azu melon mon jaoi sagen inaulak, bageunen dizig ienime, betenaek ujan idumap tamolai Anut dagom so depanilak me pitiŋinamap eginmap.#Pet II 3:10
Ujanzen tamolaioi pasak so isoime
8Ge abaŋ taimon se mon so aloŋoi, bubeggaz, Ujanzen izinnen nal taimon me umaz 1000 egin, umaz 1000 me nal taimon egin.#Kan 90:4 9Ujanzen inan blani panekoi muzuan so funiime tamol muzuan mok funiimelak egin, tea, i aŋoi ilon nasinasi mon madoime. Ta padaloi ilon so ibolimelakoi, daŋan dadon isap tulufunap didaŋsawoi.#Tim I 2:4
Ujanzen inan nal ponauwain inan isonen egin
10Ge Ujanzen inan nal me ponauwain egin isowoi. Saen melon did liŋan zenlon bini pasiwoi, abaŋabaŋ mai jalon padalpa teaboi, tan, uzat abaŋ melon denaudime me nana pasiwoi.#Tes I 5:2; Mat 24:29, 35; Bo 20:11
11Abaŋ daŋan megin biniwoi mewoi aŋ dodinpa gun Anut kilian anaup atozoi. 12Anut malan anaup tinimi anua maiwoi, did nanap biniwoi, abaŋabaŋ mai wonanan zenpa buliwoimap.#Jes 34:4 13Ge id inan blani panekoi did faun tan faun mai meladin tenautame, melon kagin taoz ienoi.#Jes 65:17; 60:22; Bo 21:1, 27
Abaŋ e anasimap segataŋpa amado
14Mewoi, bubeggaz, abaŋ e malan anaumap aŋ bibianek benenaik mai teap mazozlon inasaŋoi jaeŋ funaŋ.#Kor I 1:7, 8 15Ujanzen inan dabdab inaunen me putumipaseknen e abol. Paulus, inad bubed, mai inan maŋau ipanilak uzig aŋ gazek enen ipanaŋlak.#Rom 2:4; Bo 2:21 16Inan gazek daŋanlon abaŋ ewoi ibollak. Melon aban ta bo tezepasi taloŋnen kin muzuan diendime, ladin bekanilak bubudin dagendaŋan me sebadin padalnenoi azu dukubulidime, gazek aentawoi mai denaudime egin. 17Mewoi, bubeggaz, aŋ e imugseg aloŋlak, dab anau, kibiaiŋ tealakgaz nadin zegaiklon aŋ ibennen duzaŋmap aŋ sebami nami segatek sazuzoi.#Mar 13:5, 9, 33 18Ge aŋ idinad Ujanzen Patudpaseknen Jesus Kristus inan kanimlon aloŋnenlon mai atuboi. I kubeldaŋan imado, gazo e ilap dedeŋaneknen nallon Malik.#Juda 25
Currently Selected:
Petrus II 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
