Korint II 13
13
Paulus azu fun bezaniwoi, tininnenlak i naon ŋalewoi
1E me mug saen tolp ŋa aŋ ziminen ŋalawoi. Azu inan fun daŋan sigianek azup tol auadinlon beŋten itasawoi.#Deut 19:15; Mat 18:16; Tim I 5:19 2Ŋa i me get audipaslak aenta mai ŋipidinlak, gazo mai aon so ŋemademeg get waiŋ azulon ŋipidinlak egin ŋipidinŋame, ŋa faun ŋalemap i getadin so ŋepasiwoi. 3Kristus i ŋalon ibolime tat me inan niŋon anasiwoi abollak. Kristus i aŋoi bodok tea, tea, i leŋamilon tiwondaŋan.#Rom 15:18 4I bodok eginmeg jakebazeklak dezailak, ge Anut tiwonlon i bas madoime. Am i egin bodok mon, ge aŋoi am i mai Anut tiwonlon bas amadowoi.#Fil 2:7, 8
Sibed bitiniadoi
5Aŋ sebami ibitiniaŋpa, aŋ lamilon maliknenlon segataŋame tat, sebami kibianaŋpa anasi. Aŋ so aloŋ tat Jesus Kristus aŋ lamilon madoime? Au, aŋ kibianeklon so adusetap so aloŋoi.#Kor I 11:28 6Am so anau abedanilak me aloŋoi ŋusuzuazouŋame. 7Ge am Anut agodoaniame, aŋ abaŋ salan ta so anauwoi. Am kibianeklon mug aduselak egin so atasap atozoi, tea, aŋ abaŋ gauai anauwoilakoi, am bo anau abedanilak egin amadowoi. 8Am azu malik adaŋenen tea, tea, anen adunen mon.#Apos 4:20; Kor I 13:6 9Am bodok, ge aŋ gugumimap am lama gauaiime: aŋ lami zatamoi agodame. 10Ŋa azu e aŋ maig so temademeg ŋegazeŋame, meginpe ŋa ŋalemap ŋa gaten nauknen kibiai Ujanzen panaglak melon so ŋenauwoi, i me sasekoi panaglak, uzat pitiŋinekoi tea.#Kor II 10:4; 8:11
Wadan funatek
11Wadanlonpa, taiggaz, lami gauaipa amado. Aŋ kibiniaŋpa tiduk atoz, tansaek azu so biti mon, bubumi taimonpa mazozlon atoz, meginpe ilopanek mazoz mai inan Anut aŋ maip amadowoi.#Fil 2:2; 4:4; Rom 15:33 12Musuk gunlon nug pez panipani.#Kor I 16:20 13Gungaz daŋan aŋ tabei depanaŋdime.
14Ujanzen Jesus Kristus inan kanim, Anut inan ilopanek, Auanuzgun inan peleŋanek mai aŋ daŋan maiwoi.
Currently Selected:
Korint II 13: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
