Galatia 1
1
Tabei panek
1Ŋa Paulus, apostel ta, tamol so dibollak, tamollon mai wagiŋ so iŋale, tea, Jesus Kristuslon, Anut Mamlon mai me i mateŋlonge fuŋunilak.#Gal 1:11, 12 2Taiggaz daŋan i ŋa mai amadoame, me Galatia medaeŋ aŋ apaiaŋ, 3Anut Mam, inad Ujanzen Jesus Kristus mai inan kanim mazoz mai aŋ panaŋoi.#Rom 1:7 4Me i siben saen salan gazomnen elonpa pisiad ŋiliadoi i inad aupasekoi siben panadlak, Anut Mam ibollakoi.#Gal 2:20; Tim I 2:6; Tit 2:14; Joh I 5:19 5I dedeŋanipdedeŋanip kubeldaŋanoi. Malik!
GALATIA MEDAEŊGAZ DESAZIZLAK, 1:6–10
6Ŋa ŋazut, aŋ i me Kristus inan kanimlon wigiaŋlak pasak ibinig totol gamun ta adaŋeame. 7Totol gamun ta bo so ienime, ge aenta demadodime i denaup aŋ adeladaloi, i Kristus inan totol gamun dopololoaniwoi denaudime.#Apos 15:1, 24 8Ge am sebama tat, eŋel didnenge tat totol gamun iben ta peteŋanaŋmap, am get so apeteŋanaŋlak, me i meselanek.#Kor I 16:22; Kor II 11:4 9Am get abollak megin faun ŋabol mug, ta totol gamun iben ta peteŋanaŋmap, get aŋalelak egin tea, me i meselanek.
10Ŋa gazomnen auaglon tamol azu numuzan ŋipidinŋame tat, tea, Anut tat azu numuzan ŋepaiŋame? Tea, ŋa tamol meladin ŋeŋalewoi ŋenauŋame? Ŋa tamol meladin ŋeŋalewoipe ŋa Kristus inan begabeg teape.#Tes I 2:4
PAULUS TOTOL GAMUN BOBOLOANEKLON MON ŊALELAK, 1:11—2:21
Jesus siben Paulus peteŋanek azu panilak
11Taiggaz, aŋ me aloŋoi ŋabol, totol gamun ŋa ŋisigianiŋame me tamol inan azu tea. 12Ŋa me tamol izinnen so ŋeŋalelak, tamol ta mai so peteŋanaglak, tea, Jesus Kristus i boboloani panaglak. 13Ŋainag tazeŋ Juda kaginlon aŋ aloŋlak, ŋa Anut inan eklesia ŋeŋale ŋuzimeg gik ŋenauge ŋipitiŋiniwoi ŋabol.#Apos 9:21; 26:4–20 14Inag tamolai leŋadinlon ŋa Juda kaginlon inag wozoubi aenta ŋenenazag ŋasalak, ŋa inag malag fufulungaz nadin kagin azuoi wagai gauz ŋenau.#Apos 22:3 15Ge i me nen so noagmeg mug gun noaglak, inan kanimlon wigiaglak,#Rom 1:1; Jer 1:5 16i ŋa gob ilonlon i ŋisigianiwoi i inan Ai boboloanig peteŋanagoi ibolge ŋa tinig inag daz mai kin sodoz so ŋepani.#Mat 11:27; 16:17 17Jerusalemnen i me ŋa dimugseg apostel demadelak me zidinnen mai so ŋale, tea, ŋa Arabianen ŋale. Alouge faun Damaskusnen ŋamul.
Paulus, Jerusalemnen, Sirianen Kilikianen mai dile
18Uzig umaz tolgen binig ŋa Jerusalemnen Kefas izinnen lo ŋaleg nal fiftin i maig amade.#Apos 9:26 19Ge ŋa apostel ta so ŋenasi, Jakobus, Ujanzen inan tain, i mon.#Mat 13:55 20Azu ŋa ŋegaze ŋepanaŋŋame me Anut naonnen ŋa sekauk so ŋenauŋame. 21Uzig ŋa Siria fatulon Kilikianen mai ŋale.#Apos 9:30 22Saen melon mai Kristus inan medaeŋgaz Judealon get naog so denasilak.#Tes I 2:14 23I se dibolmeg mon diloŋlak, I me get ŋiliad uzadlak i gazo ilonlon maliknen me get pitiŋiniwoi inaulak me sigianiime.#Apos 9:21 24I ŋawoi Anut biŋan dibise.
Currently Selected:
Galatia 1: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
