Korint II 12
12
Paulus malan nitun jaze, ge izaeg imul itoz
1Ŋa ŋufuzoz mokoi. Melon subuloanadnen bo tea, ge Ujanzen inan malan nitun jazek, inan boboloanekoi mai kin ŋaboloi. 2Ŋa Kristuslon tamol ta ŋaloŋŋame me, me umaz 14 mug binilak, i tininlon tat made, tea, i tinin bini tat, me ŋa so ŋaloŋ, Anut iloŋime, i did tollon ibiselak. 3Tamol ŋan me ŋaloŋ, i Paradislon biselak, tininlon tat, tinin bini tat, ŋa so ŋalon, 4i mai azu gun iben mok iloŋ me tamol ta ibolnen tea.#Luk 23:43; Bo 2:7 5Tamol mewoi ŋufuzozoi, ge ŋa sibegoi so ŋufuzozoi, tea, ŋa miliaulakoi mewoi mon.#Kor II 11:30 6Ŋa ŋufuzozoi ŋejatemap ŋa gedagadwain egin so ŋenauwoi, azu ŋabolŋame me azu malik. Ge gauz ŋabolnen ŋamoi, meginpe tata abaŋ ŋalon denasilak, azu ŋalon diloŋlak me beleŋanip ŋawoi kankan iben ta so deŋalewoi.#Kor II 10:8; 11:16
7Boboloanek zen panaglakoi mewoi ŋa sibeg ŋigitiagoi tiniglon dal funatek izoz ta ienime, ŋan Satan inan totol me nimanlon funagoi, ŋa sibeg gauz so ŋigitiagoilakoi.#Hiob 2:6 8Ewoi ŋa Ujanzen ŋogodoani tolgen, me ŋa binagoi. 9Ge i paiaglak, O inag kanimdaŋan madoume me owoi iduse, tiwon me miliaulon dadon isaimelakoi. Mewoi jaug isap inag miliauwoi ŋufuzozoi, meginpe Kristus inan tiwon foglak ienoi.#Luk 1:35 10Mewoilakoi Kristusoi miliaulon, peneŋaneklon, alan nauklon, ŋalek uzeklon, bubuzeklon mai ŋa tinig ŋibinig ŋemadoŋame, ŋa miliaumap ŋa gegaug ŋemadoŋame.#Fil 4:13
Korintgaz Paulusoi taoz so debetenaelak
11Ŋa ŋenau gedagad, ge aŋ seseŋanagge megin ŋenaulak, aŋ aneg aduwoi ge aŋ so adulak. Apostel sutan me ŋa so debeleŋanagdime, me ŋa bo laseg mon.#Kor II 11:5; Gal 6:3 12Apostel mok inan bagoz me aŋ leŋamilon nasinasinenlon inaulak, bagozlon, kubelmaŋaulon, tiwon inan nauknauklon mai.#Rom 15:19 13Abaŋtelon aŋ medaeŋ aenta egin so kibiniaŋ gauailak, me ŋa sibeg muzuan ta so ŋepanaŋlak melon tat? Abaŋ tiduk so ŋenaulak lami padalpe.#Kor II 11:9
Paulus Korintnen ilawoi peneŋ ta ibiti
14Nasi, waiŋ tol ŋabip ziminen ŋalawoi ŋenauŋame. Ŋa aŋ muzuan so ŋepanaŋoi. Ŋa nami abaŋabaŋoi so ŋedalelŋame, tea, aŋ ŋebezanaŋŋame. Nasi, nunudingaz nadin tinadin temadingazoi jes abaŋ sagen so denauwoi, tea, tinan tamangaz i nunudingazoi denauwoi.#Kor II 13:1 15Ŋa ilog gauailon nami nutumioi uzat ŋenaup tinig ŋesebaziwoi. Ŋa ilog gauz ŋepanaŋmap aŋ mewoi lami kin mon apanagoi tat?#Fil 2:17 16Es megin, ŋa muzuan ta bo so ŋepanaŋlak, ge ŋa sekauk ŋenaug se wozaiklon ŋiŋiliaŋlak abolame. 17Inag totol ziminen ŋenauge dilelak i‐lon ŋa bulases ŋenau tat? 18Titus ilawoi ŋeseseŋanilak, taig ta mai ŋenaug i maig dile. Titus i ziminen bulases inau? Am uz taimonlon so atozlak tat? Niema ban taimon so apaze tat?#Kor II 8:6, 16–18
Paulus i Ujanzen inan betenaekoi wolaul inauime
19Aŋ gaid lami ibol tat am sebamawoi noaminen pizianek azu abolame? Anut naonnen Kristuslon am abolame, ge kadoigaz, azu daŋan aŋ subuloanaŋoi abolame. 20Ŋa ŋazezge ŋabol ŋa ŋalemap ŋa ŋukumeŋame egin aŋ so ŋenasaŋoi. Ŋa mai aŋ akumeame egin so anasagoi tat, abaŋ ta tat ŋenasiwoi, nug paikpaik, jenain isuik, buzun, bulases, uf, kumuzek, igasnen kubulek mai.#Kor II 10:2; Kor I 4:6 21Ŋa ŋazez, faunte ŋalemap ŋainag Anut aŋ malakmalaklon ibiag ŋaduwoi, meginpe ŋa kuzum me audipaslak ge nadin nunoi, jaitoi, tazeŋ loaŋloaŋoi mai so tulufunag didaŋselak iwoi bubeg itawoi.#Kor II 2:1; 13:2
Currently Selected:
Korint II 12: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
