Timoteus I 3
3
Tizinek nadin uzat medaeŋlon
1Me azu malik, ta i tizinekgaten uzatoi jaeŋ ifunimap i uzat gauaioi imatime.#Apos 20:28 2Mewoi tizinekgatenoi peneŋ so mok ienoi, i pain taimon inan tamol madowoi, i wedeŋanip itozoi, kankan kibinep kagindaŋan kabe madowoi, lo disodime i kibiniawoi, i peteŋanekkamaŋ maiwoi.#Tit 1:6, 7 3I aiu tetamek teab, wagaitamol tea, i mazoztamol, so izoiime, gaŋmalanoi jaeŋ so funiwoi. 4I siben inangaz gauai idauziwoi, inan nanungaz abaŋ daŋanlon i dagom depaniwoi.#Sam I 2:12 5Ta inangaz idauzinen so iloŋ i dodin Anut inan medaeŋgaz dab pinidinoi. 6Gaten i malan faun teaboi, i ŋagas itoztap i Satan ina betenaeklon ibal iduwoilakoi. 7Ge ta mai muzingaz mai iwoi tamol gauai e diboloi, teatap i peneŋlon Satan inan siŋlon ibal iduwoi.#Tim I 5:10; Kor I 5:12, 13; Kor II 8:21
Dinek nadin uzat medaeŋlon
8Dinekgaz megin mon, so detefalokoi. I beladin dagen teaboi, wain gauz so dimoloi, gaŋmalan subuŋan ŋalekoi so dimatoi.#Fil 1:1; Apos 6:3 9I ladinlon maliknen inan niŋon gazo beŋten so taloŋ me kakad teap buben ikoklon diabiwoi.#Tim I 1:19 10Ge i mai get ikibiana, meginpe iwoi peneŋanek teamap i dinek uzat denauwoi. 11Paingaz mai megin mon, so detefalokoi, tamolai muzikmuzik azu sekauk so diboloi, tea, wedeŋanekdaŋan, abaŋ daŋanlon bubudin malikdaŋan ditozoi.#Tit 2:3 12Dinekgaz i pain taitaidaŋan demadowoi; nunudingaz maig demadodime me getadin gauai denauwoi.#Tim I 3:2 13Me dinek uzat gauai denaudime i sutange demadodimelakoi, Kristus Jesus ladinlon maliknenlon disilili maidime.
Anut bas inan eklesia
14Kitek ta maip ŋa o izinen ŋalawoi ŋabol, ge abaŋ ewoi ŋegaze ŋepanoŋame. 15Me ŋa ŋupupuzetap o uloŋoi o Anut inan medaeŋlon dodin utozoi, me Anut bas inan eklesia, azu malik inan bagtamol fod mai.#Tim II 2:20; Ef 2:19–22 16Malik, Anut inan kagin inan niŋon me melabublon ien: I tininlon beŋten itase, i Uzlon taoz inaulak, eŋelgaz i denasi, gobgaz zidinnen i fun deflale, tanlak iwoi ladinlon maliklak, i kubelkubellon ibiselak.#Joh 1:14; 16:10; Rom 1:4; Mar 16:19; Tes II 2:7
Currently Selected:
Timoteus I 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
