Timoteus I 4
4
MIZPANEK INAN SAEN IDUMAP TIMOTEUS SEGATEKDAŊAN MADOWOI
Peteŋanek sekauk dimaisoi
1Ge Uz i beŋten ibolime, saen alounenlon aenta ilonlon maliknen dibiniwoi, sewozaiknen uz buga sladin nadin peteŋanek azu mai dab dipinidinoi.#Joh 16:13; Tim II 3:1; Pet II 3:3; Juda 18; Joh I 2:18 2Me azu sepalektamol nadin malabiabnenlon kakad inan kunutek dab so depanidime. 3I betezemaneknen dipizianidime, anaŋ aenta mai me Anut inaug tamolai me ladinlon malik, azu malik diloŋ mai kalel paneklon deŋalewoi ibol, me so dianiwoi dibol.#Gen 9:3; Kor I 10:30, 31 4Abaŋ daŋan Anut inaulak me gauailakoi id pez paneklon teŋalemap id temeselaninen tea.#Gen 1:31; Apos 10:15 5Anut inan azulon gadiŋlon mai gun inaulakoi.
Timoteus uzat tezepasip inauwoi
6I kibiai e taidgaz peteŋanamap o Kristus Jesus inan dinek gauaioi, ilonlon maliknen azu kagin mai duzog uzi panig utozlak menen. 7Ge dedado se niŋon tealak me dab so pani mon. Anut kilianoi tenanou naup utoz.#Tim I 1:4; 6:20; Tim II 2:16, 23; Tit 1:14; 3:9 8Tinin duzinen me kin gauailak, ge Anut kiliannen me abaŋ daŋanoi gauai, me bas gazo loantapnen inan mai blani panilak. 9Azu e malik, me ilonlon malikoi iduse mok.#Tim I 1:15 10Mewoi uzat wagai tenautame, bulebule maitame, id inad susuazouknenoi Anut bas tenau tepanilakoi me tamolpain daŋan nadin Patudpaseknen, i ladinlon malikdime inadin mok.#Tim I 2:3, 4
11Abaŋabaŋ e kibiai pinidinpa peteŋana mai. 12O ai faunlak mewoi ta o so zezeŋano mon, tea, ladinlon malikdime inadin noalalek mado, azulon, tazeŋlon, ilopaneklon, ilolon maliknenlon, bube ikoklon mai.#Tit 2:15 13Ŋa o izinen ŋalemap eginmap o medaeŋlon suteknen, azu fun flaleknen peteŋanek uzat mai dab pani. 14Suzuzum odaŋanlak, gatengaz nimadin o folak denaumeg azu flaleklon o depanolak me o so sali mon.#Tim I 5:22; Apos 6:6; 8:17 15Abaŋ e dab pani, melon jaeŋ funop mado, meginpe daŋan oina subuloanonen denasiwoi.#Tim II 3:13 16O sibe dado dab panip, oina peteŋaneknen me mai, me sansan unau; O megin unaumap o sibe patu pasiwoi, tamolai i oina azu diloŋdime me mai putudin pasiwoi.#Rom 11:14
Currently Selected:
Timoteus I 4: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
