Korint I 15
15
DIMATLAK NADIN TIZIAUNEN, 15
Kristus malik imaislak
1Taiggaz, ŋa totol gamun ziminen ŋisigianilak me faun te ŋepaiaŋpa lami isouwoi, me aŋ get aŋalelak, melon segatig amadoame,#Kor I 16:13; Kor II 1:24 2melon aŋ putumi pasilak. Ge azu me abi gegaunmap mon, aŋ lamilon maliknen so bedanilak, meginmap mon.
3Nasi, ŋa ŋeŋalelak abaŋ me niŋon mok egin ŋepanaŋlak, ŋan Kristus gazek uzig idinad aupasekoi imat pasilak.#Jes 53:8, 9 4I denaulak, i mai nal tollon gazek uzig ifuŋunilak.#Kan 16:10; Hosea 6:2 5I mai Kefas izinnen itase, alouge ai twelf zidinnen.#Luk 24:34 6Alouge i taiggaz 500 nenazig zidinnen itase taimon, menen aenta gazomnen demadodime, ge aenta dimatlak.#Joh 21:15 7Me uzig Jakobus izinnen itase, alouge apostel daŋan zidinnen.#Luk 24:50 8Ge wadanlon ŋa ai gazogmeg guz duzilak egin ŋa izignen mai itase.#Kor I 9:1 9Ŋa apostel leŋadinlon mitin mon, apostel blanagoi mai so ŋadusaŋame, ŋa Anut inan eklesia ŋaŋal ŋauzlakoi.#Ef 3:8; Tim I 1:15; Mat 5:19 10Ge Anut inan kanimlon ŋa gazomnen egin ŋemadoŋame, inan kanim iŋaleg panaglak me se so ŋebedani. Tea, ŋa aenta daŋan ŋebeleŋanag uzat wagai ŋenau. Ŋa bo tea, tea, Anut inan kanim i ŋa mailak ŋan me.#Kor II 11:5, 23 11Ge ŋa tat, i tat, am megin azu aflaleame, megin aŋ mai lamilon maliklak.
Kristus imaislak me krisgaz nadin suzuazouknen fod
12Ge Kristus mateŋlon fuŋunilak isigianimeg dodin mon aŋ leŋamilon taitai dibol mateŋlon tamol fuŋuneknen dal tea?#Mat 22:23; Apos 4:2 13Ge me mateŋlon fuŋuninen teatap Kristus mai so fuŋunig imaislak. 14Kristus bo so fuŋunig imaislak, meginpe amnama sigianek uzat me se, nami lamilon maliknen me mai se. 15I dimatlak me malik so fuŋunawoitap am Anutoi azu se asepaleame, am abol Anut Jesus ifuŋunilak, ge i so fuŋunilak.#Apos 1:22; 5:32 16Dimatlak me so fuŋunatap Kristus mai so fuŋunilak.#Kor I 6:14 17Ge Kristus so fuŋunipe me nami lamilon maliknen me se, aŋ gazo mai nami aupaseklon amadoame.#Kor I 15:14 18Meginpe me i Kristuslon dimatlak me depadal dilelak. 19Id saen elon tanlak mon Kristusoi tusuzuazoumap tamolai daŋan ilonlon id gadod.
Kristus imaislak me fuŋuneknen nitun
20Ge Kristus mateŋlonge fuŋunilak, i dimatlak menen i matu.#Kor I 11:30; Kol 1:18 21Tamollon mateŋ idulak egin, megin tamollon mateŋlonge fuŋuneknen mai itase.#Gen 3:17–19; Rom 5:12, 18 22Adamlon daŋan dimatlak egin, megin daŋan Kristuslon bas inauwoi. 23Ge dadodado nadin wozoulon, Kristus i matu, i isemap uzip Kristus inangaz mai.#Tes I 4:16; Bo 20:5 24Meginmap wadan funatiwoi. Saen melon i kiŋdom Anut Mam ipaniwoi, i get kibiaipanek daŋan, gatennauk daŋan duzek fun mai nadin uzat daŋan pitiŋinap teaboi.#Dan 2:44 25I gaten mado mokoi, i get inan agez daŋan inan nien paenlon inaumap eginmap.#Kan 110:1; Mat 22:44 26Agez wadanlon ipasiwoi me mateŋ.#Bo 20:14; 21 27Anut i abaŋ daŋan inan nien paenlon inaulakoi. Ge, gazek ibol, Abaŋ daŋan i paenlon inaulak, id mug taloŋ, i siben me paenlon so madoime.#Kan 8:7 28Abaŋ daŋan i paenlon inau binip, saen melon Ai siben mai i paenlon get abaŋ daŋan inaug dienlak, Anut paenlon idulawoi, meginpe Anut i tamolpain daŋan nadin getadin madowoi.#Kol 3:11
Kris fuŋuneknenoi flanalak
29Azu me niŋon teatap tamolai dodin dimatlak sinadinlon flanek deŋalewoi? Dimatlak me so mok fuŋunamap aitoige iwoi ladin isouge flanek deŋaledime? 30Dodinge ŋa sansan abaŋ salan funagoi egin ŋemadoŋame.#Rom 8:36 31Malik, taiggaz, ŋa aŋoi ilog jaugdaŋan Kristus Jesus idinad Ujanzenlon ŋeŋalelak melon ŋabol, ŋa nal daŋan ŋamatŋame.#Kor II 4:10, 11 32Ŋa tamol se egin mon Efesusnen dazuk wagai maig azoilak me, ŋa abaŋte naon ŋeŋalewoi? Dimatlak me so dimaistap id anaŋ taniwoi, naz timiliwoi, boŋanip tamatoilakoi.#Jes 22:13 33Se so diwiziaŋ mon, badimgaz sladin i kagin gauai dukubulidime. 34Faunte malik nami kankanlon kagindaŋan amadop au so apas mon. Leŋamilon aenta Anut so diloŋdime, me nami mamaioi ŋabolŋame.#Rom 13:11; Ef 5:14; Kor I 6:5; Apos 26:8
Niŋon me fabul egin tea
35Ge ta iboloi. Dimatlak dodin fuŋunawoi? I tinidin dodin disodime? 36Gedagad o, fabul o sezaneume me so imatmap i so basoi.#Joh 12:24 37O fabul sezaneume me tinin loantapnen so kilian, tea, me fabul patun niŋon mon, rais, whit tat, tea baza ta tat. 38Ge Anut ilon ibollak egin tinin ipaniime, fabul dadodado inan tinin mok ipaniime.#Gen 1:11; Kor I 12:18 39Tinidin daŋan me fun taimon tea, tea, fun ta me tamolpain nadin, ta me dazuk nadin, ta ma nadin, me ta ij nadin. 40Didnen tinidin dien, tan abaŋ tinidin mai dien, ge didnen inan me kubel iben ta, tannen inan me kubel ta. 41Kubel ta me ad inan, ta me fulei inan, ta me patui nadin, patui nadin kubel ibenibenlak.
42Dimatlak nadin dimaisnen megin mon. Paelak me mezeteŋaniime, fuŋuniime me so mezeteŋaniime. 43Biŋan tealon paelak, biŋandaŋan fuŋuniime. Zagun teameg paelak, tiwondaŋan fuŋuniime.#Fil 3:20, 21 44Tannen tininlon paelak, Uz inan tininlon fuŋuniime. Tannen tinin ienmap Uz inan tinin mai ienime.
Adam matu Adam mizimu mai zugudin ibeniben
45Megin gazelak, Tamol matu Adam i nitun basdaŋan itase, ge Adam mizimu bas paneknen Uzdaŋan itase.#Gen 2:7; Kor II 3:17 46Ge Uzdaŋan i tanlak matu tea, tea, tinindaŋan me imug, Uzdaŋan me i uzilak. 47Tamol matu i tannenge, tanwain, tamol mizimu i didnenge. 48Tanwain inaulak egin, megin mon tanwain mai denaudime; did inan egin, megin mon didwain daŋan mai. 49Id tanwain walislon tatozlak egin, megin id didwain inan walislon mai temadowoi.#Gen 5:3
Tan tinin abenlon tinin kubel teŋalewoi
50Ŋan e ŋabolŋame, taiggaz, tinin daz mai me Anut inan kiŋdom fuzan ŋalenen so iloŋ, mezeteŋanek inan abaŋ me mezeteŋaninen so iloŋlak me mai so ŋalewoi.#Kor I 6:13 51Nasi, abaŋ toanilak ta ŋepaiaŋŋame. Id daŋan so taen tepadaloi, ge id daŋan buladsawoi.#Tes I 4:15, 17 52Me buntaimon malan tezemazumlon, dum wadan iweklon. Dum iboboi, meginpe dimatlak me mezeteŋanek tealon fuŋunawoi, id mai buladsawoi.#Mat 24:31; Tes I 4:16 53Mezeteŋanek inan tinin me mezeteŋanek tealak inan inulawoi, tinin me imatime me dedeŋanip bas madonen inulawoi.#Kor II 5:4
54Mezeteŋanek inan me mezeteŋaneknen tealak inan inulemap tinin imatnen me dedeŋaneknen bas inan inulemap, meginpe azu gazelak me niŋon inauwoi: Seŋaneknen i mateŋ teŋalilak. 55O mateŋ, oina seŋanek ŋan? O mateŋ, oina duz domten?#Jes 25:8; Hosea 13:14 56Mateŋ inan duz me aupasek, ge aupasek inan tiwon me kibiaiŋ.#Rom 7:13; 6:14 57Ge Anut pez panipged, i idinad Ujanzen Jesus Kristuslon seŋaneknen panadime.
58Mewoi taiggaz wezami, aŋ segataŋpa, to abolpa amado, sansan Ujanzen inan uzatlon du abolpa, aŋ aloŋame nami uzat wagai Ujanzenlon se teaboi.#Sai II 15:7; Bo 14:13; Kol 1:23
Currently Selected:
Korint I 15: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
