Korint I 14
14
Imugseg azu flaleknen me Uz inan zaiŋ gauai mok
1Tiwomi pazep ilopanek uzi, Uz inan zaiŋ sufutanaŋpa atoz, azu imugseg flalek uzat me nami uzat matu egin anau.#Kor I 12:10, 31 2Me i azu baslon ibolime i tamolai so pidinime, tea, Anut ipaiime. Tata inan azu so iloŋ, Uzlon azu melabub ibolime. 3Ge me i imugseg azu fun flaleime i tamolai subuloaneknenoi, bebaneknen ilon ŋaleknenoi mai azu pidinime. 4Ta i balen baslon ibolime i siben satuk paniime ge azu imugseg iflaleime i eklesia subuloaneknen paniime. 5Aŋ bo daŋan baswain nadin azulon aboloi ŋabol, ge imugseg azu flalek uzat me matu ŋabol. Me i azu fun flaleime i me, me balen baslon azu ibolime, nenazi, teap ta i azu bas me fun flalep eklesia subuloaneknen paniwoi.#Num 11:29; Kor I 12:10
6Taiggaz, ŋa boboloaneknen azu ta, aloŋnen, imugseg fun flalenen, tea, peteŋaneknen azu ta so ŋepanaŋtap ŋa dodin ziminen azu baslon ŋidinaŋoi?#Kor I 12:8
7Abaŋ bas tea, dum tat, dibidob tat kokoŋ ibeniben so itasetap tata inan wek saek mai dodin iloŋoi? 8Tauz iwi gedagadmap it juoi abaŋ kibinewoi? 9Aŋ mai megin, aŋ belamilon azu tezepasip so abolmap tamolai dodin fun diloŋoi? Azu abolame me tim mon apaip tutep ilawoi.#Kor I 9:26 10Auje, tamol beladin kuzum tat tanlak dien, so taitai mon, daŋan niŋondaŋan. 11Ge ŋa azu me so ŋaloŋtap ŋa totol izinnen baswain egin, i ŋa izignen mai megin. 12Aŋ mai megin. Aŋ Uz inan zaiŋoi gauz adalelamelakoi aŋ medaeŋ subuloanawoi dadon isap adalel.#Kor I 14:1–4
13Mewoi ta i balen baslon iboltap i fun flaleknen inan zagunoi igodoi.#Kor I 12:10 14Ŋa balen baslon ŋagodmap ŋainag uz igodime, ge ŋainag kankan i niŋon so ŋaleime. 15Ge dodin? Ŋa uzlon ŋagodoi, kankanlon mai ŋagodoi; ŋa uzlon dug ŋabiwoi, kankanlon mai dug ŋabiwoi.#Ef 5:19 16Teap aŋ uzlon dadom panek azu abolmap tamol se tata i nami azu so iloŋtap me dodin nami dadom panek azuoi Malik e diboloi? 17Aŋ tat gauai Anut pez apaniame, ge tamol ta melon subuloaneknen so pani. 18Ŋa Anut mewoi pez ŋepaniŋame, ŋa aŋ daŋan ŋebeleŋanaŋge azu baslon azu ŋabolŋame. 19Ge ŋa medaeŋlon azu faif ŋainag kankanlon ŋabolpa aenta kagin peteŋanamap me balen bas inan azu 10,000 me nenazi ŋabol, tamolpain me so diloŋlakoi.
Medaeŋ Anut azuoi gazoi naup madowoi
20Taiggaz, aŋ lami gazeklon ai kinkin egin so amade mon, tea, abaŋ salanoi ai kinkin amado. Lami gazeklon aŋ gazoi anaup amado.#Ef 4:14; Fil 3:12, 15 21Kibiaiŋ gazelak, Ŋa tamol beladin ibenibenlon, fiziŋon ibenlon mai tamolpainbadim e azu ŋipidinoi, ge megin mai i ŋainag auag so diloŋoi, Ujanzen ibol.#Deut 28:49; Jes 28:11, 12 22Megin balen bas ibeniben me i ladinlon malikdime inadin bagoz tea, tea, ladinlon so maliklak inadin. Ge imugseg fun flalek azu me ladinlon so maliklak inadin tea, tea, ladinlon maliklak inadin. 23Mewoi medaeŋ daŋan detemanip beladin ibeniben azu dibolmap baswain, tea, tealakwain ta didup i so tat diboloi aŋ gedagad funaŋ?#Apos 2:13 24Ge daŋan azu fun deflalemap tealakwain ta, tea baswain ta idup medaeŋ auadin taimonpa tinin desaewoi, daŋan i debetenaewoi.#Apos 4:13 25Buben inan miŋianek beŋten ditasap i potolaop Anut isigianiwoi, Aŋ leŋamilon Anut madoime, e iboloi.#Joh 4:19; 16:8
Temaneklon bubumi lasenpa so ale mon
26Mewoi dodin, taiggaz? Aŋ atemanimap aŋ dadodado kanamdaŋan, peteŋanek azudaŋan, boboloanekdaŋan, balen basdaŋan, poalip flalenen maidaŋan. Ge me daŋan medaeŋ subuloananenoi mon anauwoi.#Kor I 11:18, 20; 12:8–10; Ef 4:12 27Tata i balen ibenlon azu diboltap i azup teap tol mon anenanen dibolpa ta inadin azu poaliwoi. 28Ge poalektamol ta so madetap i medaeŋlon to diboloi, i dadodado inan azu siben mai Anut mai ipaiwoi. 29Anut inan totol azug tol azu deflalep aenta nadin azu debetenaewoi.#Tes I 5:21; Apos 17:11 30Ge ta i matalime me bubenlon azu boboloanek ŋalelak, meginpe ta malan imaislak i to iboloi. 31Aŋ daŋan taitai azu fun aflalewoi, meginpe daŋan kagin deŋalewoi, seseŋanawoi. 32Ge flalektamol nadin uz me flalektamol paenlon demadodime.#Pet II 1:21; Bo 22:6 33Anut i kubulek inan Anut tea, tea, mazoz inan.#Rom 15:33; 16:20
Medaeŋ taneklon paingaz to diboloi
34Gungaz nadin medaeŋlon denaudime egin, megin medaeŋ daŋanlon paingaz to diboloi.#Kor I 11:3; Tim I 2:12 35I abaŋ tawoi diloŋoi ladin iboltap i segauz ablon nadin tamol sodoz pinidinoi. Pain ubouablon azu ibolnen gamun tea.#Ef 5:22; Tit 2:5; Gen 3:16 36Ne aŋ tat azu fun, aŋ mon tat ziminen totol ile?
37Ta ilon ibolmap i Anut inan profet, i Uzdaŋan ibol, meginmap i azu ŋa ŋegazeŋame, ŋan Ujanzen inan kibiaiŋ, me dab ipaniwoi.#Joh I 4:6 38Ta me dab so panimap i mai dab so paniwoi. 39Mewoi, taiggaz, azu flalek abolnen jaeŋ ifunaŋpa amado, ge ta balen baslon ibolnen so piziani mon. 40Ge abaŋ daŋan kagin gauailon mai kabe anau.#Kol 2:5
Currently Selected:
Korint I 14: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
