Korint I 13
13
Ilopanek wou aenta daŋan beleŋana
1Ŋa tamolai mai eŋel mai nadin balenlon ŋabolmap, ge ŋa ilopanek teatap ŋa kokoŋ liŋan, tea, giliŋilaŋ liŋanime egin mon. 2Ŋa profet egin imugseg azu flalenen tiwondaŋanpe, abaŋabaŋ miŋianig diendime me ŋaloŋnendaŋan mai, ŋa ilonlon maliknen tezepasekdaŋanlon did sebazanen ŋaloŋpe, ge ilopanek teatap ŋa se lasen mok mon.#Mat 7:22; 17:20 3Ŋa ŋainag abaŋ daŋan waizgaz ŋufutuap ilap, Ŋainag tinig segauz maziwoi ŋabolpe, ge ilopanek teatap ŋa naon so ŋeŋaleŋame.#Mat 6:2
4Ilopanek me nasinasi monime, i lodaŋan, ilopanek me jenain so isuiime, auan so fezafuz, igas tea. 5I kagin tiduk tealak melon so itozime, siben inan kankanoi gik so inauime, pasak buzun so isa, so magu, aupasekoi ta so meselaniime.#Fil 2:4, 21 6Ilopanek me abaŋ taoz tea mewoi so zigeime, tea, abaŋ malikoi zigeime.#Rom 12:9; Met 10:12 7Ilopanek abaŋ daŋan joazeime, abaŋ daŋan ilonlon malikime, abaŋ daŋanoi suzuazouime, abaŋ daŋanlon segatig madoime.#Rom 15:1
8Ilopanek gaid so biniime. Profet nadin azu imugseg flalenen me gazop biniwoi, balen azu ibeniben dibolnen me biniwoi, abaŋ taloŋnen mai biniwoi.#Pet I 4:8 9Inad taloŋnen me so tezepasilak, inad azu imugseg tabolnen me boiboi mon. 10Ge abaŋ dadon isa moklak me isemap abaŋ boiboilak me biniwoi. 11Ŋa nanun kitekmeg ŋa nanun kitek egin azu ŋabol, nanun kitek egin abaŋ dab ŋepanilak, nanun kitek egin kankanlak. Ge gazo ŋa tamollak ŋa nanun kitek inan kagin ŋibinilak. 12Gazomnen id dodaliŋlon tedemadomlon egin tenasitame, ge gazop nug dadedadewoi. Gazomnen ŋa boi taitai mon ŋaloŋŋame, ge gazop ŋa tezepasip ŋaloŋoi, i ŋa tezepasagge iloŋlak egin.#Kor II 5:7; Jak 1:23 13Ge gazomnen ilonlon maliknen, suzuazouknen ilopanek mai diendime, abaŋ tolgen me. Ilopanek bo aenta nenazag ujan.#Tes I 1:3; Joh I 4:16
Currently Selected:
Korint I 13: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
