Matie 12

Yeso olieel me ndɔɔ a saba

(Mak 2.23-28; Luk 6.1-5)

1M'ãtsoo omɔ̃, Yeso ákebwel onse nguun a bele, éli me tsoo li saba. Ayio a ndɛ ayoo nzal. Bɔ abvi nsia e bele oka, bvool abvi yɔ odza. 2Afalisaye amwɛn obobɔ, alieel ndɛ bubu: «Tal, ayio a yɛ abesa ãndɔɔ m'eluo ãngel baal osa me tsoo e saba.» 3Kɛn a ndɛ obveel bɔ bubu: «Byɛ k'etsiɔ m'ési David wɛ? Tsoo ngelemɔ̃, ndɛ ye b'áli ye ndɛ ayoo nzal. 4Ndɛ osam onse Nzɔ a Nziã, bu adzi amampa b'áwi Nziã ãkab, ndɛ ye b'áli ye ndɛ, okyam ŋɛn ãngel ã Moyize ãliaal ndiri ekal ndɛ, ekal b'áli ye ndɛ, k'akoo k'adza amampa obɔ wɛ, b'adza bɔ kɛn angaa-a-Nziã. 5Byɛ kɛn etsiɔ hɛ̃ wɛ kwɛn onse Ngel, me tsoo e saba, angaa-a-Nziã b'abesal onse Nzɔ a Nziã abefel ngel a saba? Onkyam ŋɛn bɔ asi obobɔ, bɔ k'ali y'obi oŋɔ̃ wɛ. 6Mɛ̃ eyɛɛn byɛ wɛn, eli ye mbuul ŋã wu onduru Nzɔ a Nziã bvɛɛ! 7Okɛɛn byɛ al'ebɔɔ otsɛn o ndɔɔ yi: “Ki nzii mɛ̃ k'esio mɛ̃ baal nyiĩ, k'ãkab wɛ”,#Odz 6.6 kɛn byɛ k'ekeewa ansoo ba mbyel wɛ. 8Ke ngwel wɛ, Muaan a mbuul oli Mfam a tsoo e saba.»

Mbuul wu ékwi kuɔɔl

(Mak 3.1-6; Luk 6.6-11)

9Yeso ombal oŋɔ̃, bu ayɛn onse nzɔ a ãbuɛɛn a bɔ. 10Oŋɔ̃, éli ye mbuul ngɔmɔ̃ wu ékwi kuɔɔl. Obobɔ, afuul Yeso ndiri: «Me tsoo li saba, akoo k'aboo mbuul?» Bɔ afuul obobɔ, me ndɔɔ yi abii elyal ki afɛn ndɛ. 11Yeso obveel bɔ ndiri: «Nã onse byɛ wɛn okɛɛn ndɛ oli y'emɛ̃mɛɛ̃ kɛn a ngemɔ̃, ŋɛn kyɛ ebvi onse ywɛn me tsoo li saba, ndɛ k'ayesiin kyɛ, me ndɔɔ yi apaal kyɛ onse okɔ wɛ? 12Mbuul k'anduru emɛmɛɛ̃ m'ɔ̃bvɛn wɛ! Obɔ otsɛn bɛn, me tsoo li saba, akoo k'asa obvɛ.» 13Obobɔ, Yeso olieel mbuul wu ékwi kuɔɔl ondɛ ndiri: «Naan kuɔɔl e yɛ!» Ndɛ onaan kyɛ, kyɛ bu ebvaan onge kimɔ̃. 14Afalisaye apal ayekuru mfoo me ndɔɔ yi abii ãyal m'abam Yeso.

Ɔ̃sal wu esueel Nziã

15Ŋ'ebɔɔ Yeso nsia oyɔ, ndɛ odzuru nzuru osyel lala ye mboo oyɔ. Ɔ̃bɔbɔ a baal aluɛɛn a ndɛ. Ndɛ oboo anga-ãluu bueel. 16Kɛn a ndɛ owi bɔ ãnkunkwa bam kokɔ ndiri: «Ebee baal oliaal ndiri mɛ̃ nã ndi.» 17Oŋɔ̃ ŋ’ekoo ndɔɔ yi élieel ɔ̃liaal-ɛ̃kiɛɛn a Nziã Edzayi ndiri:

18«Tal ɔ̃sal a mɛ̃ wu nsueel mɛ̃,

mbuul a mɛ̃ wu ɔ̃tio, wu ndi mɛ̃ y’esɛ me ndɛ.

Mɛ̃ èndɔɔl Ɔ̃fel a mɛ̃ nkal a ndɛ,

bvool ndɛ àtee ãndɔɔ mã dzu ola baal b'ɛ̃kiri ɛ̃kyam.

19Ndɛ k'àbii ɛ̃tsuun wɛ, ndɛ k’àbiool wɛ,

bvool mbuul k'àyoo nkii a ndɛ m'abal-bal wɛ.

20Ndɛ k'àbuɔɔl ɔ̃mbɛɛl wu amaayiɔɔn wɛ,

bvool k'àdzeel mbunda wu oyii adzam wɛ

tiil ye k'esa ndɛ kwɛn ãndɔɔ mã dzu ãbvel mpɛn.

21M’emfa okyɛ, ɛ̃kiri mvieel ɛ̃kieel ɛ̃ta kaã ɛ̃ myɛ̃ me nkuũ a ndɛ#Edz 42.1-4.»

Yeso atswɛɛl ɛ̃fel mi ɛ̃bi-ɛ̃bi m'Ɔ̃fel a Nziã

(Mak 3.22-30; Luk 11.14-23)

22Obobɔ, abiri Yeso mbuul ngɔmɔ̃ wu ékwi mviil bvool áli nkɛn, me ndɔɔ yɛn ndɛ áli y’ɔ̃fel wu ɔ̃bi-ɔ̃bi. Yeso oboo ndɛ, obobɔ ndɛ obvi oyɛɛn bvool obvi omwɛn. 23Embuul ki éli oŋɔ̃ ekam bibi, bvool eyɛɛn bubu: «Mbuul wu ke Muaan a David wɛ?» 24Ŋ'eyoo Afalisaye obobɔ, bɔ ayɛɛn ndiri: «Mbuul wu atswɛɛl ɛ̃fel mi ɛ̃bi-ɛ̃bi kɛn a me mpɛn a Beledzebul wu mfam a myɛ̃!» 25Kɛn onge bɛn Yeso ákeyɛɛ ãtsam ã bɔ, ndɛ olieel bɔ ndiri: «Okɛɛn baal b'okwɛn ngɔmɔ̃ adzwaan bam-a-bam, okwɛn obɔ osiɛɛn k'obva, bvool bviil lueel wuo nzɔ yɛn baal adzwaan bam-a-bam, bviil wuo nzɔ oyɔ k'ekoo k'esiɛɛn wɛ. 26Okɛɛn Ɔ̃pfu atswɛɛl Ɔ̃pfu, ndɛ ŋ'akab nzuru ndyam-a-ndyam. M’emfa okyɛ, okwɛn o ndɛ otɛɛn bwɛn-a-bwɛn? 27Emfa kiki, okɛɛn mpɛn yi etswɛɛl mɛ̃ ɛ̃fel mi ɛ̃bi-ɛ̃bi yi ewa Beledzebule mɛ̃, ke baan a byɛ, bɔ myɛ̃ me mpɛn a nã abetswɛɛl? Obɔ otsɛn bɛn bɔ bam àsuo kwɛn byɛ k'eli y'ɔ̃dzoo wɛ. 28Kɛn okɛɛn mɛ̃ etswɛɛl ɛ̃fel mi ɛ̃bi-ɛ̃bi m'Ɔ̃fel a Nziã, ŋ'esuo kwɛn Okwɛn o Nziã oyi ola byɛ. 29Emfa emã kyɛn mbuul okoo k'asam onse nzɔ a nga-mpɛn bvool owɛɛl eluɔ e ndɛ, okɛɛn ndɛ tsɔɔn k'akuru nga-mpɛn ondɛ ebwal wɛ? Ndɛ akuru ndɛ ebwal, ke mbee oŋɔ̃, ndɛ fu akuaal opfel o nzɔ a ndɛ. 30Mbuul wɛn k'ali ye mɛ̃ wɛ, ɔ̃taal a mɛ̃ ali. Mbuul hɛ̃ wɛn k'abvool baal ye mɛ̃ wɛ, wu atsal. 31Obɔ otsɛn bɛn, mɛ̃ eyɛɛn byɛ wɛn, obi bueel y'osiaan bueel, akieel adzeel bɔ. Kɛn osiaan b’Ɔ̃fel wu Ɔ̃nsensal, k'akieel adzeel bɔ wɛ. 32Mbuul wu ayɛɛn obi-obi me mɛ̃ wu Muaan a mbuul, akieel adzeel ndɛ. Kɛn a wu asiaan Ɔ̃fel wu Ɔ̃nsensal, k'akieel adzeel ndɛ wɛ, ekal me lio li, ekal me lio li ekieel eya.»

Abeyɛɛ ɔ̃ti me nsia e ndɛ

(Luk 6.43-45)

33«Okɛɛn ɔ̃ti oli ngesɛ, nsia e ndɛ hɛ̃ èkal ngesɛ. Okɛɛn ɔ̃ti oli y'oluu, nsia e ndɛ hɛ̃ èkal mbi-mbi. Ke ngwel wɛ, abeyɛɛ ɔ̃ti me nsia e ndɛ. 34Byɛ yam li ebi-ebi eli onge ampel! Byɛ baal b'abi-abi, emfa emã kyɛn byɛ ekoo k'eyɛɛn ãndɔɔ mã ngesɛ? Ke ngwel wɛ, ɔ̃nywã a mbuul apaal ãndɔɔ m'ãluul tɔ onse ɔ̃kwal a ndɛ. 35Mbuul wa ngesɛ abepaal eluɔ bvi ngesɛ onse nkab a ndɛ yi mvɛ. Mbuul wu ɔ̃bi-ɔ̃bi hɛ̃ abepaal eluɔ bvi ebi-ebi onse nkab a ndɛ yi mbi. 36Mɛ̃ eyɛɛn byɛ bubu: Me tsoo li ekieel etsiil Nziã ãndɔɔ ã baal, baal kieel ayeyɛɛn m'ãndɔɔ mɛn otsɛn pyɛ m'élieel-élieel bɔ. 37Ke ngwel wɛ, m'ãyɛɛn ã yɛ, yɛ akieel apal ɔ̃nkikyam, m'ãyɛɛn ã yɛ hɛ̃, yɛ akieel abva.»

Emvieel ki Yonas

(Mak 8.11-12; Luk 11.29-32)

38Obobɔ, ayiool b'ãngel y'Afalisaye ke kwɛ alieel Yeso ndiri: «Ɔ̃tee, bee edzii k'emwɛn emvieel ki efa ola yɛ.» 39Ndɛ obveel bɔ ndiri: «Baal b'alio li ali baal b'abi-abi bvool k'akuru nzuru me Nziã wɛ, bɔ abii emvieel, k'eli y'emvieel ekyam ki asuo bɔ wɛ, emvieel ki asuo bɔ kɛn a ki Yonas#Dzn 1. 40Taa-taa bam, emfa ngemɔ̃ kyɛn Yonas ásii apipi atyel y'atsia atyel onse mwiĩ a nswi wu ɔ̃nɛn, emfa kiki hɛ̃, Muaan a mbuul akieel asii apipi atyel y'atsia atyel onse nsie. 41Me tsoo li ekieel etsiil Nziã ãndɔɔ ã baal, baal ba Ninibve akieel atɛɛn me ndɔɔ yi awa baal ba lio li etumbu, ke ngwel wɛ bɔ ákaal ɛ̃kwal ke mbee ãtee ã Yonas. Etal, ŋã eli ye wu onduru Yonas. 42Me tsoo li ekieel etsiil Nziã ãndɔɔ ã baal, ɔ̃kwɛn wu ɔ̃kaal wu ɔ̃kiri wu etswi ki nsɛn akieel atɛɛn, me ndɔɔ yi awa baal ba lio li etumbu, ke ngwel wɛ ndɛ áfi lala me ndɔɔ yi ayeyoo ãndɔɔ m'ékeyɛɛn Salomɔ̃#1Ak 10.1-10 y'ɔ̃nyia wueel. Etal, ŋã eli ye wu onduru Salomɔ̃!»

Obvool b'ɔ̃fel wu ɔ̃bi-ɔ̃bi

(Luk 11.24-26)

43«Ŋɛn ɔ̃fel wu ɔ̃bi-ɔ̃bi opal onse mbuul, ndɛ ayi ayebii mboo yi awuun onse ɔ̃baan wa kɛɛ-kɛɛ, kɛn a ndɛ k'abɔɔ yɔ wɛ. 44Obobɔ, ndɛ ayɛɛn ndyam-a-ndyam ndiri: “Mɛ̃ èbvool ke onse nzɔ yi epal mɛ̃ onse yɔ tsɔɔn.” Ŋ'ebvool ndɛ, ndɛ oyebɔɔ yɔ amaakuɔɔn, bvool amaafaal eluɔ ngesɛ-ngesɛ. 45Obobɔ, ndɛ akɔɔl ayebii ɛ̃fel ɛ̃kyam nsiaan mi ɛ̃nduru ndɛ obi. Ndɛ abiri myɛ̃, ɛ̃yesam onse nzɔ oyɔ. Elaã e mbuul ondɛ enduru li eli tsɔɔn me fool.»

Ngoo ye baan-ngoo a Yeso

(Mak 3.31-35; Luk 8.19-21)

46Me lio li ékeyɛɛn Yeso kɛn y'embuul, tal ngoo ye baan-ngoo a ndɛ b'áli ke nzi ákedzii k'ayɛɛn ye ndɛ. Kɛn a bɔ k'akoo k'amwɛɛn ye ndɛ wɛ, me ndɔɔ embuul. 47Mbuul bu ayɛɛn ndɛ ndiri: «Ngoo ye baan-ngoo a yɛ ali okwel-a-nzi, bɔ adzii k'ayɛɛn ye yɛ.» 48Kɛn a Yeso obveel mbuul wu ákeyɛɛn ye ndɛ ndiri: «Ngoo a mɛ̃ nã? Baan-ngoo a mɛ̃ anã?» 49Obobɔ, nde onaan kuɔɔl ola ayio a ndɛ, bu alieel ndiri: «Tal ngoo a mɛ̃ ye baan-ngoo a mɛ̃! 50Ke ngwel wɛ, mbuul wu asa b'edzii Tal a mɛ̃ wu oli ke ywel, ondɛ muaan-ngoo a mɛ̃, nkyel a mɛ̃, ngoo a mɛ̃.»

Currently Selected:

Matie 12: ngz

Highlight

Copy

Compare