Matie 13

Yeso atee m'ãmboo

(13.1-52)

Mboo a ɔ̃kwɛn

(Mak 4.1-9; Luk 8.4-8)

1Tsoo olɔ, Yeso opal onse nzɔ, bvool oyebva nsɛn nku-a-nku a baã. 2Embuul ki bibi edzii ndɛ, m'emfa kyɛn ndɛ osam onse ebɛɛ, bu abvi nsɛn. Embuul éli k'ekwel. 3Ndɛ obvi bɔ ãndɔɔ bibi oliaal m'ãmboo. Ndɛ olieel bɔ bubu: «Ɔ̃kwɛn ngɔmɔ̃ opal me ndɔɔ yi akwɛn nsia. 4Me lio li ékeyiri ndɛ yɔ, yinkyɛ ebvi me pyɛ e nkuul, anywɛn ayedza yɔ. 5Nsia yinkyɛ ebvi ke mboo yi eli y'ãnkɔɔn, oŋɔ̃ nsie k'éli bibi wɛ. Yɔ emɛn tswa-a-tswa, nzal-a-ŋɛn yɔ k'ebɔɔ nsie yi eli ye dzio wɛ. 6Kɛn a ŋ'epal mwiĩ, ɛ̃swɛɛn ɛ̃dzio, myɛ̃ bu ɛ̃kɛɛ, ke ngwel wɛ myɛ̃ k'ɛ̃́li y'ɛ̃dza wɛ. 7Nsia yinkyɛ bvool ebvi onse ekwɛn bvi ãnsiɛɛn. Ekwɛn obvɛ ekwel bvool efoo ɛ̃swɛɛn omyɛ̃. 8Kɛn a nsia yinkyɛ ebvi nkal a nsie yi ngesɛ. Yɔ emɛn, bvool eburu. Lɛn eburu nsia ɔ̃nkam, lɛn ãku-ãsɛɛn, lɛn ãku-ãtyel.» 9Ndɛ bvool olweel ndiri: «Yɔɔl kwɛn wu oli y'ãtswi m'ayoo, ayoo!»

Otsɛn b'ebeyɛɛn Yeso m'ãmboo

(Mak 4.10-12; Luk 8.9-10)

10Ayio asyel tsotsoo a Ndɛ, bu afuul ndɛ bubu: «Otsɛn omã b'ebeyɛɛn yɛ ye bɔ m'ãmboo?» 11Ndɛ obveel bɔ ndiri: «Byɛ, awi byɛ nkuul yi eyɛɛ ãndɔɔ m'ãli m'elwɔɔn, m'ãtal Okwɛn o ywel. Kɛn a bɔ, bɔ k'abɔɔ nkuul oyɔ wɛ. 12Ke ngwel wɛ, wu oli y'eluɔ, àlweel ndɛ ekyam, kwɛn ndɛ abɔɔ bvi enduru. Kɛn a wu oywɛn a eluɔ, àwɛɛl ndɛ onkyam ki etsi-tsiri ki eli a ndɛ. 13Obɔ otsɛn b'eyɛɛn mɛ̃ ye bɔ m'ãmboo, ke ngwel wɛ bɔ atal, ki amwɛn pyɛ, bɔ apio tswi, ki ayoo pyɛ, ki akwaal otsɛn hɛ̃ pyɛ. 14M'emfa okyɛ, me ndɔɔ a bɔ, ŋ'ekoo ndɔɔ yi élieel ɔ̃liaal-ɛ̃kiɛɛn a Nziã Edzayi ndiri:

“Byɛ eyoo bam ngesɛ, ki ekwaal byɛ otsɛn kyam pyɛ.

Byɛ etal, ki emwɛn byɛ kyam pyɛ.

15Ke ngwel wɛ, ɔ̃kwal a yam li oyii y'olyam,

ãtswi ã bɔ ãyii embi, bɔ akuru mviil,

kwɛn bɔ abee omwɛn me mviil ã bɔ, abee oyoo m'ãtswi ã bɔ,

abee otsɛn okwaal m'ɛ̃kwal ɛ̃ bɔ,

abee ɛ̃kwal okaal, kwɛn mɛ̃ mbee hɛ̃ bɔ oboo#Edz 6.9-10.”»

16«Kɛn a byɛ, esɛ eli ola byɛ, ke ngwel wɛ mviil ã byɛ ãmwɛn bvool ãtswi ã byɛ ãyoo! 17Taa-taa bam, mɛ̃ eyɛɛn byɛ wɛn, aliaal-ɛ̃kiɛɛn a Nziã bibi ye baal ba dzu ádzii k'amwɛn m'emwɛn byɛ, kɛn a bɔ k'ámwɛn mɔ̃ wɛ! Bɔ ádzii k'ayoo m'eyoo byɛ, kɛn a bɔ k'áyoo mɔ̃ wɛ!»

Otsɛn o mboo a ɔ̃kwɛn

(Mak 4.13-20; Luk 8.11-15)

18«Oŋɔ̃ eyoo otsɛn o mboo a ɔ̃kwɛn: 19Ŋ'eyoo mbuul endɔɔ li Okwɛn, k'abɔɔ lɔ otsɛn wɛ, ŋɛn Ɔ̃taal oyi bvool ombaal nsia yi akwɛn onse ɔ̃kwal a ndɛ. Obɔ otsɛn o nsia yi ebvi me pyɛ e nkuul. 20Nsia yi ebvi onse nsie yi y'ãnkɔɔn, eli mbuul wɛn ŋ'eyoo ndɛ Endɔɔ, okiool lɔ tswa-tswa y’esɛ. 21Kɛn a ndɛ k’ayɔɔl lɔ elɔ ɛ̃dza wɛ, ndɛ okiool lɔ kɛn a me lio etsi-tsiri. Me lio li eyii emwɛn ndɛ fool wuo li ayii atuaal ndɛ mpal me ndɔɔ Endɔɔ olɔ, tswa-a-tswa oŋɔ̃ ndɛ k'abekiool lɔ wɛ. 22Nsia yi ebvi onse ɛ̃ti mi ãnsiɛɛn, eli mbuul wɛn, ŋ'eyoo ndɛ Endɔɔ, lɔ k'eburu nsia yi eyel onse ndɛ wɛ, me ndɔɔ ãtsam me ndɔɔ eluɔ bvi ɔ̃kiri, ye pfuru li epfuru opfel baal efoo lɔ. 23Mbuul wu oyɔɔ nsia yi ebvi me nsie yi ngesɛ, mbuul wɛn, ŋ'eyoo ndɛ Endɔɔ e Nziã, ndɛ obɔɔ lɔ otsɛn. Ndɛ oburu nsia: Lɛn oburu nsia ɔ̃nkam, lɛn ãku-ãsɛɛn, lɛn ã ku-ãtyel.»

Mboo a ekwɛn bviaal

24Yeso oti mboo yinkyɛ bubu: «Okwɛn o ywel oli onge mbuul wu ákwɛn ekwɛn bvi ngesɛ onse nguun a ndɛ. 25Kɛn a me lio li éli baal me twal, ɔ̃taal a ndɛ oyi, okwɛn ekwɛn bvi ebi-ebi onse bvi ngesɛ, bu ayɛn li ndyam. 26Ŋ'ekwel ekwɛn bvool eburu nsia, bviĩ bvi ebi-ebi hɛ̃ apal. 27Asal a nga-nguun ayeyɛɛn ndɛ ndiri: “Mfam, yɛ mpii nsia yi ngesɛ akwɛn onse ãnguun ã yɛ! Ke bviĩ bvi ebi-ebi kwɛn efi ?” 28Ndɛ obveel bɔ bubu: “Ɔ̃taal mbuul wu osi obobɔ.” Asal bu afuul ndɛ ndiri: “Yɛ dzii kwɛn bee eyeyeb bviĩ bvi ebi-ebi obvɛ?” 29Ndɛ obveel bɔ ndiri: “Hɛɛ̃-hɛ̃! Ke ngwel wɛ, owɛɛl onse k'eyeb byɛ bviĩ bvi ebi-ebi, byɛ hɛ̃ eyeyeb bvi ngesɛ. 30Eyɔɔl bvɛ ekwel mboo mɔ̃ tiil lio li àka nsia. Me lio olɔ, mɛ̃ èliaal baal b'àka nsia wɛn: Eyeb kɛn bviĩ bvi ebi-ebi bvool ekuru bvɛ m'ãpfoo-m'ãpfoo kwɛn oŋɔ̃ atsoo bvɛ mbaa, bvool ebvool nsia yi ngesɛ onse nzɔ a mɛ̃ yi ebekwɛɛ mɛ̃ nsia”.»

Mboo yi esia li mutaade

(Mak 4.30-32; Luk 13.18-19)

31Yeso bvool oti bɔ mboo nkyam ndiri: «Okwɛn o ywel oli onge esia li mutaade li ewel mbuul, bu akwɛn onse nguun a ndɛ. 32Lɔ eli esia li enduru otsiaal onse nsia yueel. Kɛn a lɔ emɛn, lɔ enduru eluɔ bvieel bvi akwɛn onse nguun, eyii ɔ̃ti, bvool anywɛn ayetuu ãnzɔ onse ãpɔɔ̃ ã ndɛ.»

Mboo a lebviil

(Luk 13.20-21)

33Yeso bvool oti bɔ mboo nkyam ndiri: «Okwɛn o ywel oli onge lebviil li ewel ɔ̃kaal ngɔmɔ̃, bu anzoo lɔ onse faline li boo-boo, pɔtɔ-pɔtɔ ndyam wueel bu afel.»

Emfa ki éketa Yeso ãmboo

(Mak 4.33-34)

34Yeso olieel embuul ãndɔɔ omɔ̃ mbueel m'ãmboo. K'éli ye ndɔɔ yi élieel ndɛ kyɛ yi eywɛn a mboo wɛ. 35M'emfa okyɛ, ŋ'ekoo ndɔɔ yi élieel ɔ̃liaal-ɛ̃kiɛɛn a Nziã ndiri:

«Mɛ̃ ekieel edzweel ɔ̃nywã a mɛ̃ me ndɔɔ yi eyɛɛn ye bɔ m'ãmboo,

mɛ̃ ekieel etee ãndɔɔ m'ã́li m'edziɔɔn fa obɛɛn b'ɔ̃kiri#Ãnz 78.2.»

Otsɛn o mboo a bviĩ bvi ebi-ebi

36Obobɔ, Yeso osiil embuul, bu asam onse nzɔ. Ayio a ndɛ asyel tsotsoo a ndɛ, bu alieel ndɛ ndiri: «Mewa bee otsɛn o mboo a bviĩ bvi ebi-ebi onse nguun.» 37Yeso obveel bɔ bubu: «Wu okwɛn bviĩ bvi ngesɛ, eli Muaan a mbuul. 38Nguun, eli ɔ̃kiri. Bviĩ bvi ngesɛ, eli baan b'Okwɛn. Bviĩ bvi ebi-ebi, eli baan b'Ɔ̃taal. 39Ɔ̃taal wu okwɛn bviĩ bvi ebi-ebi, eli Ɔ̃pfu. Lio li aka nsia, eli ntɔ a ɔ̃kiri. Baal b'aka nsia, eli ãnzwel. 40Emfa ngemɔ̃ ki ayeb bviĩ bvi ebi-ebi, bvool atyal bvɛ onse mbaa, akieel asa emfa kiki ke ntɔ a ɔ̃kiri. 41Muaan a mbuul akieel ayuɔɔl ãnzwel ã ndɛ. Mɔ̃ ãkieel ãmbaal onse Okwɛn o ndɛ baal bueel b'abebal baal onse obi ye baal b'abesa obi. 42Ndɛ akieel atyal bɔ onse ywɛn e mbaa. Oyɔ mboo yi elel y'odza o miin. 43Obobɔ, baal ba dzu akieel angal onge tal onse Okwɛn o Tal a bɔ. Yɔɔl kwɛn wu oli y'ãtswi m'ayoo, ayoo!»

Opfel bom'olwɔɔn y'ãnkɔɔn m'ɔ̃bvɛn

44«Okwɛn o ywel oli onge opfel bo m'odziɔɔn onse nguun. Mbuul wu omwɛn bɔ, olwɔɔn bɔ hɛ̃. M'esɛ okyɛ, ndɛ oyetiɔ eluɔ bvieel bvi eli a ndɛ, bvool osuun nguun oyɔ.»

45«Okwɛn o ywel oli bvool onge mbuul wu asa obɔɔ̃, wu abii ãnkɔɔn m'ɔ̃bvɛn m'ãbvɛ-ãbvɛ. 46Ŋ'ebɔɔ ndɛ yɔ yi atiɔ nzi bibi, ndɛ oyetiɔ eluɔ bvieel bvi eli a ndɛ, bu asuun yɔ.»

Mboo a okii

47«Okwɛn o ywel oli bvool onge okii b'atyel onse ãdza m'ɔ̃ngwa, bɔ osiin answi b'emfa bwɛn emfa. 48Ŋ'eluul bɔ, aswal adzuru bɔ k'ekwel, abvi nsɛn, m'osuaal b'answi: Ba ngesɛ, bɔ alɔ onse nkuru, b'abi-abi, bɔ ati pfɛɛ. 49Ekieel ekal emfa kiki ke ntɔ a ɔ̃kiri: Ãnzwel ãkieel ãyekab abi y'abvɛ. 50Mɔ̃ ãkieel ãtyal abi onse ywɛn e mbaa. Oyɔ mboo yi elel y'odza o miin.»

Opfel b'alili ye bo tsɔɔn

51Yeso ofuul bɔ ndiri: «Byɛ ŋ'ebɔɔ ãndɔɔ omɔ̃ mbueel otsɛn?» Bɔ abveel ndɛ ndiri: «Hɛɛ̃!» 52Ndɛ olieel bɔ ndiri: «Obɔ otsɛn bɛn, ɔ̃yiool-ãngel wueel wu oyio ãndɔɔ m'ãtal Okwɛn o ywel oli onge mfam a nzɔ wu awal onse opfel o ndɛ eluɔ bvi alili ye bvi tsɔɔn.»

Baal a Nadzalet k'akiool Yeso wɛ

(Mak 6.1-6; Luk 4.16-30)

53Ŋ'eman Yeso ãmboo omɔ̃ ota, ndɛ ombal oŋɔ̃. 54Ndɛ obvool bviil e ndɛ li Nadzalet, ke mboo yi ékwel ndɛ. Ndɛ obvi baal otee onse nzɔ a ãbuɛɛn yi oŋɔ̃, m'emfa kyɛn b'ákeyoo ndɛ ákekam bibi, bvool ákefuul ndiri: «Ndɛ ãyal ye waan li asa emvieel bvi bubu kwɛn abɔɔ? 55Ndɛ wu ke muaan a wu abesa ãbɛɛ wɛ? Ngoo a ndɛ ke Mali wɛ? Baan-ngoo a ndɛ ke Dzak, Dzedzef, Simɔ̃ ye Yude wɛ? 56Ankyel a ndɛ bueel, ke b'abekal ye bia-byɛ ŋã wɛ? Ke ndɛ mã mbueel kwɛn abɔɔ?» 57Ãndɔɔ omɔ̃ ã́kesa kwɛn bɔ k'akoo m'okiool o ndɛ wɛ. Obobɔ, Yeso olieel bɔ bubu: «Abewa Ɔ̃liaal-ɛ̃kiɛɛn a Nziã dzuun ãmboo mbueel, k'onse ola o ndyam y'onse nzɔ a ndyam wɛ.» 58Ndɛ k'asi emvieel bibi ke Nadzalet wɛ, me ndɔɔ yɛn baal a bviil olɔ áywɛn a okiool.

Currently Selected:

Matie 13: ngz

Highlight

Copy

Compare