Matie 11

Ayio b'etam Dzaã Batis ola Yeso

(Luk 7.18-35)

1Ŋ'eman Yeso k'atam ayio a ndɛ kuun ye buaal ãndɔɔ omɔ̃ osa, ndɛ ombal oŋɔ̃, bu ayɛn oyiool y'otee m'ãbviil ã bɔ. 2Ŋ'esa oŋɔ̃, Dzaã onse bwal, oyoo nsia a ɛ̃sal ɛ̃ Mãsia. Obobɔ, ndɛ oyuɔɔl ayio a ndɛ ayefuul ndɛ ndiri: 3«Yɛ Mãsia wu àya, wuo bee ekiaal mbuul ɔ̃kyam?» 4Yeso obveel bɔ bubu: «Eyeyɛɛn Dzaã ãndɔɔ m'emwɛn byɛ ye m'eyoo byɛ: 5B'ékwi mviil ayii amwɛn ngesɛ, b'adzuu tetɔɔ̃ abvi odzuu ngesɛ, ba y'ãluu me leba ayii tsɛtsɛ, ankɛn ayii ayoo, b'ákwi ayii asiool, aywal hɛ̃ ayii ayoo Nsia yi Ngesɛ#Edz 29.18-19; 35.5-6; 61.1-2. 6Esɛ ola mbuul wɛn k'ayɔɔl okiool o ndɛ me ndɔɔ a mɛ̃ wɛ!»

7Ŋ'ekɔɔl ayio a Dzaã, Yeso obvi oyɛɛn ye baal b'áli oŋɔ̃ me ndɔɔ a ndɛ wu Dzaã. Ndɛ ofuul bɔ ndiri: «Ki eyetal byɛ nkal ɔ̃baan wa kɛɛ-kɛɛ emã? Ɔ̃mbɛɛl wa tyob-tyob wu enziool mfel? 8Byɛ nã eyetal? Mbuul ngɔmɔ̃ wu olaal ekɔ bvi ɔ̃bvɛn? Hɛɛ̃-hɛ̃! Ke ngwel wɛ, baal b'abelaal ekɔ bvi ɔ̃bvɛn, bɔ abekal onse ãnzɔ m'akwɛn! 9K'obobɔ, wu eyetal byɛ nã? Ɔ̃liaal-ɛ̃kiɛɛn a Nziã? Hɛɛ̃, taa-taa! Mɛ̃ eyɛɛn byɛ wɛn, ndɛ bam onduru ɔ̃liaal-ɛ̃kiɛɛn a Nziã! 10Ke ngwel wɛ, Dzaã oli mbuul wɛn ákel onse Ɔ̃nkaan a Nziã me ndɔɔ a ndɛ ndiri:

“Tal, mɛ̃ èyuɔɔl ntam a mɛ̃ atsɔɔn nkwel a yɛ,

me ndɔɔ yi ayɛɛl ɔ̃siɔɔn ke nkwel a yɛ#Mal 3.1.”

11Taa-taa bam, mɛ̃ eyɛɛn byɛ wɛn, onse baal bam bueel b'áburu m'oburu, k'eli ye mbuul wu ánduru Dzaã wɛ. Kɛn a onse Okwɛn o Nziã, mbuul wu obvool mbee wu ondruru ndɛ. 12Bɛɛn me lio li Dzaã Batis tiil nonɔ̃ ŋã, Okwɛn o ywel oyii ndɔɔ a mpɛn, anga-mpɛn baal b'awɛɛl bɔ. 13Ke ngwel wɛ, tiil lio li Dzaã, aliaal-ɛ̃kiɛɛn a Nziã bueel ye ngel a Moyize álieel ãndɔɔ m'ã́fi ola Nziã. 14Okɛɛn byɛ edzii k'ekiool b'eyɛɛn mɛ̃, Dzaã oli Eli wu ákeya ondɛ. 15Yɔɔl kwɛn wu oli y'ãtswi m'ayoo, ayoo!

16Obobɔ, mɛ̃ baal ba nonɔ̃ ba y'anã emvɛɛl bɔ? Bɔ ali onge baan b'abvi nsɛn ke taan, abiool bakyɛ ndiri: 17“Bee efel byɛ nsiɛɛn, byɛ k'ekɛn wɛ! Bee eyam byɛ ãnziĩ m'ãwua, byɛ hɛ̃ k'elel wɛ!” 18Ke ngwel wɛ, Dzaã oyi, ndɛ k'ákedza wɛ, ndɛ k'ákenywã wɛ, bɔ atɔ m'oliaal ndiri: “Ndɛ oli y'ɔ̃fel wu ɔ̃bi-ɔ̃bi!” 19Muaan a mbuul oyi, adza, anywã, bɔ bvool atɔ m'oliaal ndiri: “Etal ngaburu wu! Ndɛ ɔ̃sal kɛn odza y'onywã! Ndɛ oli ndoo a atwal-mpal y'ãnga-ãbi!” Kɛn ãyal ã Nziã ãmɔɔn m'ɛ̃sal ɛ̃ ndɛ.»

Ãbviil m'ãbee Yeso okiool

(Mat 10.15; Luk 10.12-15)

20Obobɔ, Yeso obvi ãmbyel mã kokɔ owa m'ãbviil m'ési ndɛ emwã bibi onse mɔ̃. Ke ngwel wɛ, baal a mɔ̃ k'ákaal ɛ̃kwal ɛ̃ bɔ wɛ. 21Ndɛ olieel ndiri: «Ãwua ola yɛ, yɛ wu bviil li Koladzin! Ãwua ola yɛ, yɛ wu bviil li Betesayida! Ke ngwel wɛ, emwã bvi esi Nziã ola byɛ, okɛɛn ndɛ asi bvɛ ke bviil li Tiil ye li Sidɔ̃, kɛn baal b'okɔ ol'akaalaal angɔrɔ, bvool akaakel efuru me nzuru, me ndɔɔ yi asuo kwɛn bɔ akaal ɛ̃kwal#Edz 23.1-18; Ezk 26; Dzo 4.4-8; Amo 1.9-10! 22Obɔ otsɛn bɛn, mɛ̃ eyɛɛn byɛ wɛn, me tsoo li ekieel etsiil Nziã ãndɔɔ ã baal, fool li baal ba Tiil ye ba Sidɔ̃ ekieel ekal nkuaal-a-nkuaal a li byɛ. 23Me b'otal yɛ, yɛ wu bviil li Kapelanahum, yɛ atsam wɛn àndɛɛl yɛ tiil ke ywel? Mfya, Nziã akieel akweel yɛ tiil k'ola o b'ákwi-ákwi. Ke ngwel wɛ, emwã bvi esi Nziã ola yɛ, okɛɛn ndɛ asi bvɛ ke Sodom, kɛn bviil olɔ ol'eli tiil nonɔ̃ ŋã#Obɛ 19.24-28. 24Obɔ otsɛn bɛn, mɛ̃ eyɛɛn byɛ wɛn, me tsoo li ekieel etsiil Nziã ãndɔɔ ã baal, fool li baal ba Sodom ekieel ekal nkuaal-a-nkuaal a li yɛ.»

Eya ola mɛ̃ kwɛn byɛ ebɔɔ owuun

(Luk 10.21-22)

25Me lio olɔ, Yeso abvuru oyɛɛn, olieel ndiri: «Taal, Mfam a ywel ye nsie, mɛ̃ mveel yɛ ãtuɛɛn, ke ngwel wɛ yɛ alwɔɔn ãndɔɔ mã ol'anga-ãyal y'anga-ɛ̃nkaan. Kɛn a yɛ suo mɔ̃ ola baal b'ali onge baan b'abwee. 26Taa-taa Taal, yɛ ádzii bam kwɛn ekal obobɔ. 27Tal a mɛ̃ owi mɛ̃ eluɔ bvam bvieel. Mbuul si ngɔmɔ̃ k'ayɛɛ Muaan wɛ, okɛɛn ke Taal wɛ, mbuul hɛ̃ si ngɔmɔ̃ k'ayɛɛ Taal wɛ, okɛɛn ke Muaan wɛ, ye mbuul wɛn Muaan odzii k'asuo ndɛ Taal.

28Eya ola mɛ̃, byɛ bam bueel b'emeefa ɛ̃wuun m'olyam b'ãpfuũ, obobɔ mɛ̃ ndyam esa kwɛn byɛ ewuun. 29Ebiri pfuũ e mɛ̃, bvool eyɔɔl kwɛn mɛ̃ ngyiool byɛ! Ke ngwel wɛ, mɛ̃ ndi mbuul wu ɔ̃kwal ngesɛ bvool ke ndi y'ondɛɛl o nzuru wɛ. M'emfa okyɛ, byɛ èbɔɔ owuun. 30Ke ngwel wɛ, pfuũ li endɔɔl mɛ̃ nkal a byɛ, k'eli ye mpal m'obiri wɛ, ki ewa mɛ̃ byɛ obiri hɛ̃ eli yɛɛ.»

Currently Selected:

Matie 11: ngz

Highlight

Copy

Compare