मती 9

लकवा रोग वनीः के बुगी कराव

(मरकुस 2:1–12; लूका 5:17–26)

1ईसु मियाः डोंगा रे देच्‍चेनाय अरो समुदर एते परोम रुवाड़ केते अपन चट्टी रे हेच्‍चेनाय। 2इमिताः थोड़गन होर, लकवा रोगी वनीः मिहोर मनवा के परकोम रे गितीच केते उनी ठिनुः अगुवेदेयाकु। ईसु ता उनकु रआ बिसवास नेलएताय अरो लकवा रोगी मनवा के मेताःदेयाय, “ढिड़ दोहोयमी, ए होपोन हेरेल, आम रआ पाप छमाना!”

3इमिताः गी धरम पोथी सिखाविकु, अकु-अकु रआ मोन रे सोंचाः हेलावेनाकु, “नोंय मनवा अपन सबद एते परमेसर के निन्दा वेदेयाय।”

4उनकु रआ नुवां बिचार सारी केते ईसु ता मेताःकुवाय, “अपे मोन रे बुरा बिचार चिलिमेन अगुइ कनापे? 5सेबा चिलिकाः हेनाःआं? नुवां गागाम चि ‘आम रआ पाप छमाना’ चहे नुवां गागाम चि ‘तिंगुः अरो सेन बेरायमी?’ 6मुदा अपे सारी केपे चि मनवा रिई होपोन तेः हेरेल केहों ओते रे पाप छमा रआ हक हेनाःआं।” तोब ईसु ता लकवा रोगी एते कइल मनवा के मेताःदेयाय, “तिंगुःमी, अपन परकोम रिमकेते ओड़ाः सेन जोनमी।”

7उनी लकवा रिई रोगी मनवा ता बिरिततेनाय अरो अपन ओड़ाः तोराया। 8नुवां नेल केते मनवाकु बेचोट बोरो वनाकु अरो उनकु परमेसर रआ बड़ाय कराव हेलावेनाकु, जे ता मनवां के नुंकन हक एम एकावादेयाय।

मती के होहो

(मरकुस 2:13–17; लूका 5:27–32)

9ईसु जोब ओन्डो एते सिनुः केनाय दो उनी ता मालगुजारी ओड़ाः रे परकोम रे दुरुप कोकोय वते मिहोर मनवा के नेलेःदेयाय। उनी रआ लुतूम मती तहिकेना। ईसु ता उनी के गामवादेयाय,

“इञ रआ तयोम हिजुःमी।” नियां रे मती बिरीत एनाय अरो ईसु रआ तयोम सेसेन हेलावेनाय।

10 # लूका 15:1,2 नुंका ना चि जोब ईसु अपन चेला लोः मती रआ ओड़ाः रे जोजोम कथिर दुरुपेनाय दो ओन्डो बेचोट मालगुजारी अगु वनकु अरो पापी हेच केते उनी लोः जोजोम हेलावेनाकु। 11दो फरीसिकु ता उना नेल केते ईसु रेन चेलाकु एते कुली हेलावेनाकु, “अपे रिई गुरु मालगुजारी अगु वनकु अरो पापिकु लोः चिलिमेन जोम कनाय?”

12नुवां अयुम केते ईसु उनकु के मेताःकुवाय, “बुगिन होरकु कथिर बङा मुदा रोगिकु के बइध रआ दरकार होयुः काना। 13#मती 12:7; होसे 6:6इनाते अपे सिनुःपे अरो सोमझाव वोःपे चि परमेसर रआ बचन रआ ओरोथ चिलिकाः हेके, ‘इञ बलिदान काइञ चहाः काना, मुदा दया चहाः कनिञ।’ इञ धरमिकु के बङा, मुदा पापिकु के होहो हेच्‍चेकानिञ।”

उपास रआ सवाल

(मरकुस 2:18–22; लूका 5:33–39)

14अरो बतिसमा एएम वनीः जोहन रेन चेला ईसु ठिनुः तोराकुवा अरो उनी के कुली एदेयाकु, “आले अरो फरीसी बेचोट उपास कनाले मुदा आमरेन चेलाकु चिलिमेन उपास काकु दोहोय काना?”

15ईसु ता उनकु के गामवाःकुवाय, “चिलि बाराती, जोब तक बोरबाबु उनकु लोः हेनाःइचा, सोक मनावियाकु? मुदा उना हिलोः हिजुःआ जोब बोरबाबु के उनकु एते ओचोःइयाय। इमिताः उनकु दुख ओ:ओकु अरो उपास दोहोयाकु।

16“जहय मरी किचरीः रे नवां किचरीः एते काकु टिपोन काना, चिलिमेनचि उना टिपोन वनाः सुकराव केते मरी किचरीः ता ओड़ेच इयाय अरो किचरीः रआ ओरुः अरो बड़हाव वोःओ। 17नवां अंगुर रास मरी भुतकी रे काकु पेड़ेच काना चिलिमेनचि नुंका कराव एते हारता रआ भुतकी पड़ाः कोःकाना अरो अंगुर रास गिड़ी थहला कोःकाना। अरो हारता रआ भुतकी हों नास कोःकाना। इनाते होर नवां अंगुर रास, नवां हारता रआ भुतकी रे पेड़ेच कनाकु जेकर एते अंगुर रास अरो हारता रआ भुतकी बनार गी बेढ़ियां तहीः काना।”

गोच कुरी अरो हासु वनीः एरा

(मरकुस 5:21–43; लूका 8:40–56)

18ईसु उनी के नुवां गानाम गामवाय केनाय रिगी मिहोर अधिकारी हेच्‍चेनाय। उनी ता उनी डोंडोत केते मेताःदेयाय, “इञ रिई होपोन एरा निमीः-निमीः गोच एकानाय, देलांङ आम सेन केते उनी रे ती दोहोय रेदोम उनी अरो जुवेत बिरीताय।”

19ईसु अरो अपन चेला उनी लोः तयोम एनाकु।

20इना घरीक मिहोर एरा जे बारो बरीस एते मयम अतुः रआ रोग तहिकेना, उनी तयनोम सोझ एते हेचकेते ईसु रआ जिलिंग सोनोः रआ मुडू तेः जोटेतेताय, 21चिलिमेनचि उनी अपन मोन रे गाम एकेनाय, “अगर इञ उनी रआ सोनोः ताय हों होनङ, जोटेत कारेदोञ बुगी कोःओञ।”

22ईसु ता उनी एरा के नेल रुवड़ केते गामवादेयाय, “होपोन एरा ढिड़ दोहोयमी। आम रआ बिसवास ता आम के बुगी वेःमाय।” अरो उनी एरा इमिताः गी बुगिननेनाय 23जोब ईसु अधिकारी रआ ओड़ाः तेबाःएनाय, दो दुख रआ बजा साड़ी वते अरो होर के इयाम वते नेलेःकुवाय 24अरो गामवाःकुवाय, “सेनजोनपे! कुरी होपोन काय गोच एकानाय, मुदा गितीच एकानाय!” इमिताः होर ता ईसु के लंदा वदेयाकु। 25भीड़ के टांड़ी उडुङ काःकुवाय। तोब ईसु ता भीतरी बोलो केते कुरी होपोन ता रआ ती साप्पेताय अरो उनी बिरीत तिंगु वेनाय। 26नियां गानाम रआ चरचा उना पोरदेस रआ कोना-कोना रे फयलावेना।

बार होर अंधरा के बुगी वेःकिनाय

27ईसु ओन्डो एते लहा सेसेन हेलावेनाय दो बार होर अंधरा वनकिन ता उनी के होहो वते गामवादेयाकिन, “ए दाऊद रिई होपोन हेरेल अलिञ रे दयायमी।” इनका गाम वते तयोम-तयोम सेसेन हेलावेनाकिन।

28जोब ईसु ओड़ाः तेबाःएनाय दो उनकिन अंधरा ईसु ठिनुः हेच्‍चेनाकिन। ईसु ता उनकिन के कुलिवेःकिनाय। “चिलि अबेन के बिसवास हेनाःआं, चि इञ नुवां कराव दड़ी वाःइञ?”

उनकिन ता गामवादेयाकिन, “हें परभु!”

29तोब ईसु ता उनकिन रआ मेत जोटेत केते गामवाःकिनाय, “जे लेका अबेन बिसवास एताबेन, इनका गी अबेन बनार रे होय जोनका।” 30अरो उनकिन अंधरा ता नेनेल हेलावेनाकिन अरो ईसु ता उनकिन के चेताव केते मेताःकिनाय चि चेम्पोर तहीःबेन! नुवां गानाम जहय के ओलोबेन उदुःवाकुवा।

31मुदा ओड़ाः एते उडुङ वते गी सुबिन दिसुम रे ईसु रआ लुतूम फयलाव कताकिन।

मिहोर कोंदा के बुगी कराव

32जोब उनकु टांड़ी सिनुः केनाकु दो होर मिहोर कोंदा जेकर रे मुवां रावाकु तहिकेनाकु। उनी के ईसु ठिनुः अगुएदेयाकु। 33आर ईसु मुवां रावाकु के उडुङ वेःकुवाय अरो उनी कोंदा गापाम हेलावेनाय आर होर चकरीत एनाकु अरो गापाम हेलावेनाकु चि “इसराइल रे आले नुंकन चकरीत कामि केहयो काले नेल लाःआ।”

34 # मती 10:25; 12:24; मर 3:22; लूका 11:15 मुदा फरीसिकु गापाम हेलावेनाकु, “उनी दो मुवां रावाकु रिई सरदार रआ देंगा ते मुवां रावाकु के उडुङ कुकानाय।”

बेनहियार हुडिञ गियाकु

35 # मती 4:23; मर 1:39; लूका 4:44 ईसु सुबिन गलील पोरदेस अरो हातु-हातु रे सेन-सेन केते उनकु रआ बिनती ओड़ाः रे सिख एमवाते राइज रआ बुगिन खभेर परचार वते, होरकु के सुबिन रकम रआ रोगी अरो कोमजोरकु के बुगी कुकनकेनाय। 36#लेखा 27:17; 1 राजा 22:17; 2 इति 18:16; हेज 34:5; मर 6:34भीड़ के नेल केते ईसु ता उनकु रे सोगावेनाय, चिलिमेनचि उनकु बिन गोरखीवन रेन भेड़िकु लेका सताव वन अरो बेसाहारा तहिकेनाकु। 37#लूका 10:2अरो ईसु ता अपन चेलाकु के गामवाःकुवाय, “जरोम खेती दो बेचोट हेनाःआं, मुदा इइर वनकु बेनहियार हुडिञ गियाकु। 38इनाते खेत रिई मुवार के गोहराव वेयपे चि उनी अपन खेती इइर कथिर बेनहियार के कुल ककुवाय।”

Currently Selected:

मती 9: BIY

Highlight

Compare

Copy