मती 8

कोढ़ रोगी वनीः के बुगी एदेयाय

(मरकुस 1:40–45; लूका 5:12–16)

1ईसु जोब टोंगरी एते लतार अरगुवेनाय, दो बेचोट मनवा उनी रआ तयोम एनाकु। 2इमिन रे मिहोर कोढ़ रोगी वनीः ईसु ठिनुः हेच्‍चेनाय अरो उनी रआ हेनात डोंडोत केते गाम्‍मेताय, “परभु, जदि आम चहाः रेदोम इञ के बुगिन कराव दड़िवाञाम।”

3नियां रे ईसु ता अपन ती बड़हाव केते कोढ़ रोगी के जोटेत केते मेताःदेयाय, “इञ चहाः कनिञ बुगिन कोःमी!” अरो एनेन गी कोढ़ रोगी वनीः रआ कोढ़ रोग बुगिन एना। 4#लेवी 14:1–32अरो ईसु ता उनी के गामवादेयाय, “नेलमी! नुवां रआ बबेत रे जहय केहों ओलोम उदुःवाकुवा, मुदा जाजक ठिनुः सेन केते अपन के नेल इरीःमी अरो मूसा रआ अदेस रआ मोताबिक भेंट रकापेम ताकि होरकु के आम रआ बुगिनोः रआ गोवाही होयुःका।”

मिहोर सूबेदार रआ बिसवास

(लूका 7:1–10; जोहन 4:43–54)

5अरो जोब ईसु कफरनहूम चट्टी तेबाःएनाय, मिहोर पलटानकु रिई मुध ता हेच्‍चेनाय, अरो उनी एते देंगा कथिर गोहराव केते गाम्‍मेताय 6“परभु, इञ रिई मिहोर धंगोर ओड़ाः रे हासु एकानाय, उनी के लकवा मइर एकाःदेयाय, उनी बेचोट दुख वोः कनाय।”

7तोब ईसु ता पलटानकु रिई मुध के गामवादेयाय, “इञ हेच केते उनी के बुगी काइञ।”

8पलटानकु रिई मुध ता जबाब एमाःदेयाय, “परभु इञ नुवां लाइख बनुःइञा चि आम इञ रआ ओड़ाः हिजुःआम। इनाते सिरीफ हुकूम एमुःमी अरो मीः सबद गामकाम चि इञ रिई धंगोर बुगिन कोःकाय। 9इञ हों हाकिम रआ अधिन रे हेनाञा, अरो इञ रआ अधिन रे सिपाही तहीः कनाकु, जोब इञ मिहोर के गामवायकानिञ, ‘सिनुःमी!’ दो उनी सिनुःकनाय, अरो एटाः एते, ‘हिजुःमी मेताय कनिञ!’ दो उनी हिजुःकानाय, अरो अपन बन्धुवा एते, ‘नुवां कामिइमी मेताय कनिञ!’ दो उनी उना कराव कनाय।”

10जोब ईसु ता नुवां ओनाव केते चकरीत एनाय, अरो उनी ता आच तयोम हिजुः वनकु के मेताःकुवाय, “इञ अपे के सच मेता पेकानिञ, इसराइल रेहों इञ जहय रेहों इमिनुः बेरयार बिसवास काइञ नाम लेःकुवा। 11#लूका 13:29इञ अपे के मेता पेकानिञ, बेचोट होरकु पुरुब अरो पछिम एते हेच केते अबराहम, इसहाक, अरो जाकूब लोः सोवाराग राइज रआ भोज रे समिलोःओकु। 12#मती 22:13; 25:30; लूका 13:28मुदा राइज रेन परजाकु के टांड़ी लुबाः रे लेबदा ककुवाय, ओन्डो उनकु होर इयाम्‍माकु अरो कलपाव ओ:ओकु।” 13जोब ईसु उनी पलटानकु रिई मुध के मेताःदेयाय, “सिनुःमी, आम कथिर इनकागी होयुःका, जेलेका आम रआ बिसवास हेनाःआं।”

अरो इमिताः गी उनी पलटानकु रिई मुध, रिई धंगोर ता बुगिनाय।

बरने-बरन हासु-दुकु वनकु के बुगी वेःकुवाय

(मरकुस 1:29–34; लूका 4:38–41)

14ईसु जोब पतरस रआ ओड़ाः तेबाःएनाय, दो पतरस रिई हनहरतेः के रुवा एते तोहबोर पेटया रे गितीच नेलेःदेयाय। 15एते ईसु ता उनी के अपन ती एते जोटेत एदेयाय; अरो उनी रआ रुवा अरगुना, अरो उनी बिरितेनाय, अरो ईसु के सेवा-सुसार हेलावेनाय।

16जोब अयुपेना, दो उनी ठिनुः बेचोट एते नुंकन होर के अगुवेःकुवाकु, जेकर रे मुवां रावा तहिकेनाकु। अपन मियाः हुकूम तिगी ईसु मुवां रावाकु के उडुङवेःकुवाय। अरो उनी सुबिन हासु-दुकु वनकु के बुगी वेःकुवाय। 17#जसा 53:4नुवां इनाते होयना ताकि परमेसर ता परमेसर सोझ एते नधनी वनीः जसायाह दोवासते जे गाम लाःआय पुराव वोःका, “उनी ता अबुन रआ कोमजोरी अरो हासु-दुकु अपन रे गोः इदी वनाय।”

ईसु रिई चेला बयुः रआ गोनोंङ

(लूका 9:57–62)

18ईसु ता जोब अपन चइरो सोझ भीड़ के नेलेःकुवाय, दो उनी ता अपन चेलाकु के हुकूम एमाःकुवाय चि समुदर रआ आना परोम सिनुःपे। 19तोब मिहोर जहुदी धरम पोथी सिखाव वनीः उनी ठिनुः हेच्‍चेनाय। अरो गामवादेयाय, “गुरु, जहां गी आम सिनुःआम, इञ आम रआ तयोम-तयोम सिनुःइञ।”

20नियां रे ईसु ता उनी के गामवादेयाय, “तुयूकु रआ भुलकाः अरो सिरमा रेन चेंड़ेकु कथिर खोंधाः होयुःका, मुदा मनवा रिई होपोन हेरेल कथिर बोहोः दोहो कथिर हों ठांव बनुःआं।”

21अरो मिहोर चेला ता ईसु के मेताःदेयाय, “परभु, सेन केते पहिल इञ के अपन आपु के तोपा कथिर सेन इरीवाञमी।”

22मुदा ईसु ता उनी के मेताःदेयाय, “इञ रआ तयोम कोःमी, गोच के अपन मुरदा तोपा इरीवाकुमी।”

ईसु आंधी थिराव एताय

(मरकुस 4:35–41; लूका 8:22–25)

23तोब ईसु मियाः डोंगा रे देच्‍चेनाय, उनी रेन चेला हों संघे तहिकेनाकु। 24इमिताः गी समुदर रे इमिनुः अंधगुंधाव आंधी बिरितेना, चि दाः हेलको एते डोंगा तोपाः केना। मुदा ईसु गितीच केनाय। 25तोब उनी रेन चेलाकु उनी ठिनुः हेच्‍चेनाकु अरो उनी के चेहाव केते मेताःदेयाकु, “परभु! आले के बनचाव लेम। आले गोजुः रेयाले!”

26तोब ईसु ता उनकु के मेताःकुवाय, “ए अधबिसवासी! अपे निमिनुः चिलिमेन बोरोय कनापे?” तोब उनी ता तिंगु केते आंधी अरो समुदर ता डपटाव वेताय अरो चइरो सोझ सांति होय्येना।

27उनकु चकरीत एनाकु। अरो गागाम हेलावेनाकु, “नोय चिलकन मनवा हेकेय? आंधी अरो दाः तक हों नोंय रआ गानाम मनाः काना!”

मुवां रावा एते कइल बार होर के छुटकारा

(मरकुस 5:1–20; लूका 8:26–39)

28जोब ईसु समुदर रआ आना परोम गदरेनियो रआ दिसुम तेबाःएनाय, दो उनी के मरघाटी एते उडुङ हिजुः वते बार होर नपाम एनाकिन जेकर रे मुवां रावा तहिकेनाकु। उनकिन इमिनुः भयभयान तहिकेनाकिन चि उना होरा एते जहय हों हिजुः-सिनुः काकु दड़िवाकन केना। 29उनकिन कुर्री एताकिन, “ए परमेसर रिई होपोन हेरेल, अलिञ रआ आम एते चिलि कामि? चिलि आम नोन्डो निचित समेय एते पहिल गी अलिञ के सताव कथिर हेच्‍चेकानाम?”

30ओन्डो एते मीःजंग संगिञ रे सुकरी रआ मियाः मरंग गोहड़ा अतिञ केनाकु। 31उनकिन मुवां रावा ता उनी के गोहराव वते मेताःदेयाकिन, “जदि आम अलिञ के टांड़ी उडुङ गी हेनाःआं, दो अलिञ के उनकु सुकरी रआ गोहड़ा रे कुल कलिञ।”

32ईसु ता मुवां रावाकु के मेताःकुवाय, “सेन जोनपे।” तोब उनकिन बनार होर रआ भीतरी एते टांड़ी उडुङएनाकु अरो सुकरिकु रे सेन बोलो एनाकु। अरो सुबिन सुकरिकु टोंगरी अखा एते निर अरगु वते समुदर रे उयुःएनाकु। सुबिन सुकरिकु दाः रे डुबाव गोच्‍चेनाकु।

33अरो सुकरी गोरखिवानकु, ओन्डो एते चट्टी निर अगुवेताकु अरो सुकरी लोः अरो मुवां रावा एते कइल, उनकु मनवा लोः जे होयकेना, चट्टी रेन के उदुःवाःकुवाकु। 34अरो चट्टी रेन सुबिन होर ईसु एते नपाम्‍मोः कथिर टांड़ी उडुङओः हेलावेनाकु; जोब उनकु ईसु के नेलेःदेयाकु, दो उनी एते गोहराव हेलावेनाकु चि आले रआ इलाका एते सेन जोनमी।

Currently Selected:

मती 8: BIY

Highlight

Compare

Copy