मती 28

ईसु रआ जुवेत बिरीतोः अरो सोवारागदूत रआ खभेर

(मरकुस 16:1–10; लूका 24:1–12; जोहन 20:1–10)

1जिराः रआ हिलोः तयोम हापता रआ पहिल हिलोः अंगा तागी मरियम मगदलना हातु रिई अरो एटाः मरियम मरघाटी ता नेनेल तोराकिना। 2अरो नेलपे मियाः मरंग भुइडोल हेच्‍चेना, चिलिमेनचि परभु रिई मिहोर दूत सोवाराग एते अरगु एनाय अरो मरघाटी रे हेच केते दिड़ी ता पेलहो कताय, अरो उना रे दुरुपेनाय। 3उनी रआ रुप सिरमा रआ ठेरकाव-मलकाव लेका चमकाः केना अरो उनी रआ बराफ लेका पुन्डी किचरीः तहिकेना। 4उनकु सिपाहिकु जे मरघाटी ता पहरा एम्‍मेकेनाकु, बोरोय एते थड़थड़ाः हेलावेनाकु अरो नुंकाएनाकु जेलेका गोच एकानाकु।

5तोब सोवारागदूत ता उनकु एरा के मेताःकुवाय, “ओलोपे बोरोया, इञ सारीइ कनिञ चि अपे ईसु के दंड़ाय कनापे जेके कुरुस रे रकाप लेदेयाकु। 6उनी नोन्डो बनुः इचाय, मुदा अपन बचन रआ मोताबिक जुवेत बिरीत एकानाय; हिजुःपे उना ठांव नेलपे, जे ठिनुः ईसु के दोहो लेदेयाकु। 7अरो एनेन गी सेन केते उनी रेन चेलाकु के गाम वकुबेन, ‘उनी गोच वनकु रे एते जुवेत बिरीत एकानाय अरो निमीः उनी अपे एते पहिल गलील सिनुः कनाय अपे उनी के एंडेगी नेलेयापे’, जे इञ अपे के गाम एकावाःपिञ उना ओयहर दोहोयपे।”

8उनकिन एरा ता एनेन गी मरघाटी एते रुवाड़ेनाकिन। उनकिन भोय अरो आनाद एते पेड़ेच केनाकिन। अरो ईसु रेन चेलाकु के नुवां उदुः कथिर उनकिन निनिर हेलावेनाकिन। 9अचाका ईसु उनकिन एते नपामेनाय अरो मेताःकिनाय, “अबेन के सांति नामुःका!” उनकिन ईसु ठिनुः हेच्‍चेनाकिन अरो उनकिन ता ईसु रआ बाका साप केते जोहार एदेयाकिन 10तोब ईसु ता उनकिन के मेताःकिनाय, “ओलोबेन बोरोया, इञ रेन बोयहाकु ठिनुः सिनुःबेन, अरो उनकु के मेताकुबेन चि उनकु गलील सिनुः अकु, उनकु एंडेगी इञ के नेलेञाकु”।

पहरा एएम वनकु रआ खभेर

11निमीः उनकिन एरा होरा रिगी तही केनाकिन चि आधा सिपाहिकु जे पहरा एएम वनकु रे एते तहिकेनाकु, चट्टी रे तोराकुवा अरो जे घटना घटाव केना, उना सुबिन रआ खभेर मुध जाजककु के सेन केते उदुःवाःकुवाकु। 12तोब उनकु ता जहुदी मुधकु एते नपाम केते मियाः जोजना बायेताकु। उनकु ता सिपाहिकु के बेचोट एते धन एम केते 13गाम वाःकुवाकु चि अपे के नुवां गागाम हेनाःआं चि ईसु के चेलाकु तेः निदा हेच्‍चेनाकु अरो जोब आले गितीच केनाले इमिताः गी लास तके कुमरु इदी एदेयाकु। 14जदि अपे रआ गानाम राजपाल तक तेबाः रेदो आले उनी के सोमझाव केयाले अरो अपे रे जहन आंच काले हेच इरीवाःआ।

15पहरा एएम वनकु ता टका लेयकेते इनका गी गाम्‍मेताकु, जे उनकु के उदुःवाःकु केनाकु। अरो नुवां गानाम जहुदिकु रे तिहिञ तक इना लेका गी फयलाव एकाना।

ईसु ता अपन चेलाकु लोः नधनी-गापम

(मरकुस 16:14–18; लूका 24:36–49; जोहन 20:19–23; कुलवानकु.कामि 1:6–8)

16 # मती 26:32; मर 14:28 अरो गारहों चेलाकु गलील पोरदेस रआ उना टोंगरी रे तेबाःएनाकु जहां सिनुः कथिर ईसु ता मेताः कुकेनाय। 17जोब उनकु ता ईसु के नेलेःदेयाकु दो, उनी के डोंडोत एदेयाकु मुदा आधा के मोन रे संदेह तहिकेना। 18अरो ईसु ता उनकु ठिनुः सेन केते मेताःकुवाय, “सोवाराग अरो ओते रआ सुबिन हक इञ के सोंपाव एकावादेञाय। 19#कु.कामि 1:8इनाते सिनुःपे अरो सुबिन जाइतकु के इञ रेन चेला बायकुपे। अरो उनकु के आबा, होपोन हेरेल, अरो पबितर रावा रआ लुतूम एते बतिसमा एमाकुपे। 20इञ अपे के जे-जे हुकूम एम एकावाःपिञ, उना सुबिन रे सेसेन कथिर उनकु के सिखाव कुपे। अरो ओयहर दोहोयपे चि नुवां दुनिया रआ मुडूः तक सोबदिन इञ अपे लोः हेनाञा।”

Currently Selected:

मती 28: BIY

Highlight

Compare

Copy