मती 25

दस कुवारिकु रआ कहनी

1 # लूका 12:35 “उना हिलोः सोवाराग रआ राइज उनकु दस डिड़ा कुरीकु लेका होयुःआ जे अपन दीया लेयकेते बोरबाबु एते नपाम्‍मोः कथिर चइल्‍लेताकु। 2उनकु रे एते पांच लपरवाही तहिकेनाकु अरो पांच सोमझदारकु तहिकेनाकु। 3पांचो लपरवाहिकु ता अपन दीया दो साप्पेताकु मुदा सुनूम काकु साप लाःआ। 4मुदा सोमझदारकु ता अपन दीया लोः चुकाः रे सुनूम पेड़ेच केते अगुवेताकु। 5बोरबाबु के हिजुः रे देरीः केना, सुबिन कुवारिकु ता दुदरुम हेलावेनाकु अरो गितीच एनाकु।

6“ताला-माला निदा हकवा एताकु, ‘बोरबाबु हिजुः कनाय! उनी एते नपाम्‍मोः टांड़ी देलाबुन।’ 7इमिताः गी उनकु सुबिन डिड़ा कुरीकु बिरीत तिंगु एनाकु अरो अपन दीया सम्पार एताकु। 8लपरवाहिकु ता सोमझदारकु के मेताःकुवाकु, ‘आले कथिर अपे रआ हुडिञगन सुनूम एमुःपे, आले रआ दीया इड़िचोःका।’ 9जबाब रे उनकु सोमझदारकु ता मेताःकुवाकु, ‘बङा! आले काले एम दड़िवापेया। आले अरो अपे कथिर का पुराव वो:ओ, भला दो नुवां हेनाःआं चि अपे दोकान सेन केते अपन कथिर किरीञ जोनपे।’ 10जोब उनकु किरीञ कथिर सिनुः केनाकु चि बोरबाबु हेच तेबाःएनाय। अरो जे कुवारिकु सम्पार तहिकेनाकु, उनी लोः बपलाः रआ रिझ-रंग रे भीतरी तोराकुवा अरो जहय ता दुवेर हंडेत कताय।

11 # लूका 13:25 “इना तयोम एटाः डिड़ा कुरिकु तहों हेच केते गापाम हेलावेनाकु, ‘मुवार-मुवार, आले कथिर दुवेर निच वलेम!’ 12उनी ता जबाब एमाःकुवाय, ‘इञ अपे के सच गामवापे कनिञ, इञ अपे के काइञ सारी पेकाना।’

13“इनाते चिरगर तहीःपे, चिलिमेनचि अपे ना उना हिलोः सारीइ कनापे, ना उना घरीक ता।

तीन धंगोर रआ कहनी

(लूका 19:11–27)

14 # लूका 19:11–27 “सोवाराग रआ राइज उनी मनवा लेका होयुःआ, जे पोरदेस सिनुः घरीक अपन बन्धुवा के होहो केते अपन सम्पति रआ जिमेवारी बायेःकुवाय। 15उनी ता उनकु रआ बोल मोताबिक मिहोर के पांच बोरा टका अरो मिहोर के बार बोरा टका अरो मिहोर के मीः बोरा टका एमाःकुवाय, अरो पोरदेस सिनुः कथिर उडुङ एनाय। 16तोब जेके पांच बोरा टका मिलाव केना, उनी ता एनेनगी टका रआ लेन-देन कराव एटेच केते अरो पांच बोरा टका कामि एताय। 17इना लेका गी जेके बार बोरा टका मिलाव केना, उनी हों बार बोरा टका अरो कामि एताय। 18मुदा जेके मीः बोरा टका मिलाव केना उनी ता सेन केते ओते रे गाड़हा ऊर एताय अरो अपन मुवार रआ टका ता तोपा कताय।

19“बेचोट हिलोः तयोम मुवार ता हेच्‍चेनाय अरो उनकु बन्धुवाकु एते लेखा-जोखा अगु एटेच एताय। 20जेके पांच बोरा टका मिलाव केना, उनी ता पांच बोरा टका अरो अगु केते मेताःदेयाय, ‘मुवार आम इञ के पांच बोरा टका एमाःदेञ केनाम, नेलमी, इञ ता पांच बोरा टका अरो कामि एकाःइञ।’ 21उनी रिई मुवार ता उनी के गामवादेयाय, ‘बुगिन एकाःआम, ए बुगिन अरो भोरोसा लाइख बन्धुवा, आम हुडिञगन रिगी भोरोसा लाइख तहिएनाम, इञ आम के बेचोट जिनिस रआ जिमेवारी बायमिञ। अपन मुवार रआ आनाद रे मेसाःमी।’ 22जेके बार बोरा टका मिलाव केना, उनी हों हेच केते गामवादेयाय, ‘मुवार, आम इञ के बार बोरा टका एमाःदेञ केनाम, नेलमी, इञ बार बोरा टका अरो कामि इतिञ।’ 23उनी रिई मुवार ता उनी के गामवादेयाय, ‘बुगिन एकाःआम, ए बुगिन अरो भोरोसा लाइख बन्धुवा, आम हुडिञगन रिगी भोरोसा लाइख तहिएनाम, इञ आम के बेचोट जिनिस रआ जिमेवारी बायमिञ। अपन मुवार रआ आनाद रे मेसाःमी।’ 24तोब जेके मीः बोरा टका मिलाव केना, उनी ता हेच केते गामवादेयाय, ‘मुवार, इञ आम के सारिमिकन किनिञ चि आम हुरमुठ मनवा हेकेम, आम जे ठिनुः कम हेर काना, ओन्डो आम इर कनाम अरो जे ठिनुः आम जहन बिहेन कम रोवाय काना ओन्डो एते आनाज जमाय कनाम। 25इनाते इञ बोरो वनिञ अरो सेन केते आम रआ टका ओते रे तोपा कतिञ। नेलमी, जे आम रआ हेके, उना नुवां हेके।’ 26उनी मुवार ता उनी के जबाब एमाःदेयाय, ‘आम कुचड़ अरो कोड़ही बन्धुवा हेकेम, आम सारीइ कनाम चि इञ बिन हेर रिगी इर कनिञ अरो जे ठिनुः इञ काइञ हेर, ओन्डो एते आनाज जमाय कनिञ। 27आम के इञ रआ धन महाजानकु ठिनुः जमा काःआम होनांङ। अरो जोब इञ हिजुःइञ रे जे इञ रआ तहिकेना सूद सहित अगुकिञ होनांङ। 28इनाते उना मीः बोरा टका उनी एते अगु केपे अरो जेकर ठिनुः दोस बोरा टका हेनाःआं, उनी के एमायपे। 29#मती 13:12; मर 4:25; लूका 8:18चिलिमेनचि जेकर ठिनुः हेनाःआं, उनी के अरो एमाया अरो उनी ठिनुः बेचोट होय कोःओ। मुदा जेकर ठिनुः बनुःआं, उनी एते उना हों जे उनी ठिनुः हेनाःआं, अगु केया। 30#मती 8:12; 22:13; लूका 13:28अरो नोय बेकामा बन्धुवा के टांड़ी लुबाः रे संजो कायपे, जे ठिनुः इयाम अरो डाटा तोगोच होयुःआ।’

नेयाय रआ हिलोः

31 # मती 16:27; मती 19:28 “मनवा रिई होपोन तेः हेरेल जोब अपन सोवारगिये महिमा रे अपन सुबिन दूतकु समेत हेच केते अपन राइज गदी रे दुरुप्पाय, 32दो सुबिन जाइतकु के उनी रआ सामने जवरा कुवाकु अरो उनी मिहोर के एटाः होर एते इनका गी छिनगाव कुवाय, जे लेका मिहोर भेड़ी गोरखी वनीः अपन मेरोमकु के भेड़िकु एते छिनगाव कुकानाय। 33उनी भेड़िकु के अपन जोम ती सोझ दोहो कुवाय अरो मेरोमकु के लेंगा ती सोझ दोहो कुवाय। 34अरो उनी राजा, जे उनी रआ जोम ती सोझ रे हेनाकुवा, उनकु के मेताकुवाय, ‘ए इञ रेन आपुञ रेन धेनया होर, हिजुःपे अरो जे राइज अपे कथिर दुनिया रआ उपनेग एते पहिल तेयार एकाःइञ, उना रआ हकदार बयुःपे। 35नुवां राइज अपे रआ हेके, चिलिमेनचि इञ रेंगेच तहिकिनिञ अरो अपे इञ के जोजोम अनाः एमाःदिञापे, इञ तेतांङ किनिञ अरो अपे इञ के दाः एमाःदिञापे। इञ पोरदेसी तहिकिनिञ अपे इञ के अपन ओड़ाः इदिदेञापे, 36इञ लंगटा तहिकिनिञ, अपे इञ के किचरीः होरोः एदेञापे। इञ हासु किनिञ, अरो इञ के अपे सेवा-सुसार एदेञापे। इञ के जेहेल ओड़ाः रे हंडेत लेदेञाकु, अरो अपे इञ ठिनुः हेच्‍चेनापे।’ 37अरो धरमी होर ता उनी के जबाब एमायाकु, ‘परभु आले आम के चिमिस रेंगेच नेलेःमाले अरो खियाव वेःमाले? चाहे तेतांङ एते नेलेःमाले अरो दाः पियाव वेःमाले? 38आले चिमिस आम के पोरदेसी नेलेःमाले अरो अपन ओड़ाः रे अगु वेःमाले? चाहे लंगटा नेलेःमाले अरो किचरीः होरोः वेःमाले? 39आले आम के चिमिस हासु चहे जेहेल ओड़ाः रे नेलेःमाले अरो आम एते भेपेटोः हेच केनाले?’ 40तोब राजा उनकु के जबाब एमाकुवाय, ‘इञ अपे के सच गामवापे कनिञ चि अपे जे इञ रेन हुडिञ एते हुडिञ बोयहा-मिसी रे ते जहय मिहोर लोः कराव एतापे उना इञ लोः गी कराव एतापे।’

41“तोब उनी लेंगा ती सोझ वन के मेताकुवाय, ‘ए सपित होर, इञ ठिनुः एते उना का इड़िचोः अनाः सेंगेल रे सेन जोनपे, जे सयतान अरो उनी रेन दूतकु कथिर तेयार एकाना। 42नियागी अपे रआ दंड हेके, चिलिमेनचि इञ रेंगेच तहिकीनिञ लिकिन अपे इञ के जोजोम कथिर जहन्‍नाः कपे एमाःदेञा, इञ तेतांङ किनिञ दाः कपे पियाव लेदेञा 43इञ पोरदेसी तहिकीनिञ लिकिन अपे इञ के ओड़ाः रे कपे इदिलेदेञा। इञ ठिनुः किचरीः का तहीः रआ एते लंगटा तहिकीनिञ लिकिन अपे इञ के किचरीः कपे होरोः लेदेञा, इञ हासु किनिञ अरो जेहेल ओड़ाः रे तहिकीनिञ, मुदा अपे इञ एते नपाम कपे हेच केना।’ 44तोब उनकु जबाब एमायाकु, ‘परभु, आले आम के रेंगेच चाहे तेतांङ, चाहे पोरदेसी, चाहे बिन किचरीः होरोः लंगटा, चाहे हासु अरो जेहेल ओड़ाः रे हंडेत चिमिस नेलेःमाले अरो आले आम के काले सेवा-सुसार लेःमा।’ 45तोब उनी ता उनकु के जबाब एमाकुवाय, ‘इञ अपे के सच गामवापे कनिञ चि अपे जे नेकु हुडिञ एते हुडिञ रे एते जहय मिहोर लोः कपे कराव लाःआ, उना इञ लोः हों कपे कराव लाःआ।’ 46#दानि 12:2अरो नोकु का मुडूः दंड नाम्‍माकु, मुदा धरमी का मुडूः जीवन रे बोलोनाकु।”

Currently Selected:

मती 25: BIY

Highlight

Compare

Copy