मती 23

परमेसर रआ बचन सिखाविकु अरो फरीसिकु एते चेम्पोर तहीःपे

(मरकुस 12:38–39; लूका 11:43–46; 20:45–46)

1तोब ईसु ता भीड़ एते अरो अपन चेलाकु के मेताःकुवाय। 2“धरम पोथी सिखाविकु अरो फरीसिकु मूसा रआ राज गधी रे दुरुपेकानाकु। 3इनाते उनकु अपे के जहन्‍नाः गामवापेयाकु, उना करावेपे अरो मनावेपे, मुदा उनकु लेका ओलोपे कामिया, चिलिमेनचि उनकु गाम दो गाम काना, मुदा काकु कराव काना। 4उनकु हम्बल बोझा तोल केते होर रआ खांधी रे गोः वकुकानाकु, मुदा अकु दो अंगुर ते हों देंगा कराव काकु चहाः काना। 5#मती 6:1; नियम 6:8; लेखा 15:38मुदा सुबिन कामि होरकु के देखाव कथिर कराव कनाकु। अरो उनकु किचरीः रआ मरंग-मरंग पाटी रे बचन ओल केते मोलोंङ अरो सुपू रे तोलुः केनाकु अरो अपन होरोः किचरीः रआ झालर ता जिलिंग एकेनाकु। 6अरो भोज रे मरंग-मरंग होर दुरुप ठांव रे दुरुप अरो बिनती ओड़ाः रे मरंग-मरंग होर दुरुप ठांव रे दुरुप पसिंद कनाकु। 7अरो बाजार रे उनकु जोहार इरीः नाम कनाकु अरो चहाः कनाकु चि होर गुरु गाम्‍माञकाकु। 8मुदा अपे गुरु ओलोपे मेन इरी नोःओ, चिलिमेनचि अपे रिई मिहोर गी गुरु हेनाःइचा अरो अपे सुबिन बोयहा-मिसी हेकेपे। 9आर ओते रे जहय के आबा ओलोपे मेताकुवा चिलिमेनचि अपे रिई आपु मिहोर गियाय, जे सोवाराग रेचाय। 10अरो एगवा ओलोपे गाम इरिनोःओ, चिलिमेनचि अपे रिई एगवा मिहोर गियाय, उनी मसी हेकेय। 11#मती 20:26,27; मर 9:35; 10:43,44; लूका 22:26जे अपे रे एते सुबिन एते मरंग हेनाया, उनी अपे रिई सेवा-सुसार वनीः बयुःकाय। 12#लूका 14:11; 18:14 जे अपन एते मरंग बयुःकाय, उनी के हुडिञ बयेयाय अरो जे अपन एते हुडिञ बयुःकानाय, उनी के मरंग बयेयाय।

परमेसर रआ बचन सिखाविकु अरो फरीसिकु के सात गो चेतोवन

(मरकुस 12:40; लूका 11:39–42,44,52; 20:47)

13“ए कपटाहा धरम पोथी सिखाविकु अरो फरीसिकु अपे के बेचोट कोसोट होयुःआ! चिलिमेनचि अपे मनवा कथिर सोवाराग राइज रआ दुवेर हंडेत कनापे। अपे खुद कपे बोलोः काना अरो जे बोलोः कथिर वोःकनाकु, उनकु के रोकाव कुकानापे। 14(ए कपटाहा धरम पोथी सिखाविकु अरो फरीसिकु, अपे के बेचोट कोसोट होयुःआ! अपे रेड़याहिकु रआ ओड़ाः उजड़ाव कनापे अरो देखाव कथिर बेचोट देरी तक पराथनाय कनापे, इनाते अपे बेचोट दंड नाम्‍मापे।)#23:14 सुबिन एते बुगिन मरी वनाः पोथी रे नुवां 14 पद बनुःआं।

15“ऐय कपटाहा, धरम पोथी सिखाविकु अरो फरीसिकु अपे के बेचोट कोसोट होयुःआ! अपे जहय के जहुदी धरम मनाव वान बबाय कथिर ओते अरो समुदर परोम केकानापे। अरो जोब अपे रआ होरा रे हेच कोः कनाकु दो अपे उनकु के अपे एते हों ढेर नरकिये बाय कुकानापे!

16“ऐय अंधरा एगवाकु अपे के बेचोट कोसोट होयुःआ! जे गाम कनापे चि जदि जहय मरंग बिनती ओड़ाः रआ किरया जोमाय दो, जहन्‍नाः बङा, मुदा जहय मरंग बिनती ओड़ाः रआ सोना रआ किरया जोमाय दो उना एते तोल कोःओय। 17ऐय मुर्खाहाकु अरो अंधराकु! चिलिकाः मरंग हेनाःआं, सोना चाहे मरंग बिनती ओड़ाः, जेकर एते उना सोना पबितर कोःकाना? 18अपे नुवां हों गाम कनापे ‘जदि जहय थान रआ किरया जोम कनाकु दो जहन्‍नाः बङा,’ मुदा जहय थान रे रकाप अनाः दान रआ किरया जोम कनाकु दो उनकु अपन किरया जोम रआ चलते तोल एकानोःकानाकु। 19ऐय अंधराकु चिलिकाः मरंग हेनाःआं? थान रे रकाप अनाः दान चहे उना थान जेकर एते उना रकाप अनाः दान पबितर कोःकाना? 20इनाते जदि जहय थान रआ किरया जोम कनाय दो उना थान लोः थान रे जे दोहो एकाना, उना सुबिन रआ हों किरया जोम कनाकु। 21जे होर मरंग बिनती ओड़ाः रआ किरया जोम कनाकु, उनकु सिरीफ मरंग बिनती ओड़ाः रआ चेतान गी बङा, मुदा संघे-संघे उना रे तहीः वनीः परमेसर रआ चेतान हों किरया जोम कनाकु। 22#जसा 66:1; मती 5:34अरो उनकु जे सोवाराग राइज रआ किरया जोम कनाकु, उनकु परमेसर रआ राइज गदी अरो उना रे दुरुप वनीः रआ हों किरया जोम कनाकु।

23 # लेवी 27:30 “ए कपटाहाकु धरम पोथी सिखाविकु अरो फरीसिकु, अपे ठिनुः जहन्‍नाः हेनाःआं, उना रआ दसवांस नोन्डो तक चि अपे फुदेना, सोंप अरो जीरा तक रआ दसवांस परमेसर के एमाय कनापे। रेहोंगी अपे मूसा रआ नियम रआ मुध गानाम अरो नेयाय, दया अरो बिसवास ता अनदेखा ककानापे, अपे के उना गानाम ता करावाते, उना हों कराव तहिकेना 24ऐय अंधरा एगवाकु, अपे भुसड़ी के दो छना केकुकानापे, मुदा उंट केदो उत केयकानापे।

25“ए कपटाहाकु धरम पोथी सिखाविकु अरो फरीसिकु अपे के बेचोट कोसोट होयुःआ! अपे डुभनी अरो थड़ा ता चेतान-चेतान दो गसार कनापे, मुदा भीतरी मोन तापे रे लुट-पाट एते अरो मौज-मस्ती एते पेड़ेच एकानापे। 26ए अंधरा फरीसिकु! पहिल थड़ा अरो डुभनी भीतरी एते गसारेपे ताकि भीतरी अरो बाहरी सफा कोःका।

27 # कु.कामि 23:3 “ए कपटाहाकु धरम पोथी सिखाविकु अरो फरीसिकु, अपे के हाय! अपे चुना पोताव वनाः मरघाटी लेका हेनापेया, जे चेतान तेदो चुनगुन नेलुः काना, मुदा भीतरी मुरदाकु रआ जंग अरो सुबिन रकम रआ अपबितरता एते पेड़ेच एकाना। 28इनका गी अपे बाहरी तेदो धरमी नेलुःकानापे, मुदा भीतरी एते अपे कपट अरो अधरम एते पेड़ेच एकानापे।

परमेसर रआ बचन सिखाविकु अरो फरीसिकु रे दंड रआ आगमजानी

(लूका 11:47–51)

29“ए कपटाहाकु धरम पोथी सिखाविकु अरो फरीसिकु अपे के हाय! अपे परमेसर सोझ एते नधनी वनकु रआ मरघाटी बाय कनापे अरो धरमिकु रआ मरघाटी ता संवराव कनापे, 30अरो गाम कनापे, ‘जदि अबु अपन आपु-आजाकु रआ हिलोः रे तहिलेन रेदोबुन परमेसर सोझ एते नधनी वनकु के गोगोच रे उनकु लोः काबु देंगावन होयुःआ होनांङ।’ 31मोतलोब नुवां चि अपे गी गोवाही एम कनापे चि अपे उनी रेन खंदान रेन हेकेपे, जे परमेसर सोझ एते नधनी वनकु के गोगोच वन तहिकेनापे। 32अपे जे अपे रेन पुरखाकु एटेच एताकु, उना कामि पुरावेपे। 33#मती 3:7; 12:34; लूका 3:7ए बिञ अरो बिञ रेन बुराय खंदानकु! अपे नरक रआ दंड एते चिलका बनचाव वोःओपे। 34इनाते इञ अपे के उदुः वपेकानिञ चि इञ अपे ठिनुः परमेसर सोझ एते नधनी वनकु के अरो बुधिमानकु के अरो धरम पोथी सिखाविकु के कुल कुकानिञ। अपे उनकु रे एते बेचोटकु के गोच कुवापे अरो कुरुस रे रकाप कुवापे। अरो आधा के अपे अपन बिनती ओड़ाः रे कोड़रा एते सोड़ेच इरिकुवापे अरो चट्टी-चट्टी रे सताव चित तहिनापे, 35#एटे 4:8; 2 इति 24:20,21बेगुनाह हबिल एते लेयकेते बिरकियाह रिई होपोन तेः हेरेल जकरयाह तक, जेकार-जेकार मयम नुवां ओते रे आतु एकाना, उनकु सुबिन धरमिकु रआ मयम रआ दंड अपे रआ चेतान होयुःआ। बिरकियाह रिई होपोन तेः हेरेल जकरयाह के मरंग बिनती ओड़ाः अरो थान रआ तला रे गोच लेदेयाकु। 36इञ अपे के सच गामवापे कनिञ नियां सुबिन्‍नाः कथिर नियां जुग रेन होर के दंड भोगाः पोड़ाव वोःओ।

जरुसलेम रेन होर कथिर ईसु दुख एनाय

(लूका 13:34–35)

37“ए जरुसलेम, ए जरुसलेम! अपे परमेसर सोझ एते नधनी वनकु के गोच कुकानापे अरो परमेसर रेन कुल वनकु के दिड़ी एते ठिनढेर कुकानापे। इञ चिमिन इसा चहाविनिञ चि जे लेका सिम आचरेन चेंगना के आच रआ फेकराः लतार हबरुत केकु कनाय इनका गी इञ अपे रेन होपोनकु के हबरुत कराव चहाविनिञ। मुदा अपे कपे चहावेना। 38#जिरमि 22:5नेबरीक दो अपे रआ मरंग बिनती ओड़ाः अपे कथिर उधनाव वोःओ। 39#सिरिञ 118:26 सचमुच इञ अपे के उदुः वपेकानिञ, अपे इञ के तोब तक कपे नेलेञा, जोब तक अपे नुवां कपे गाम्‍मा, ‘धेनया हेनाया उनी जे परभु रआ लुतूम एते दावराय काना!’”

Currently Selected:

मती 23: BIY

Highlight

Compare

Copy